1. ?Hu ya Jisas?

Jisas i wan enjel long heven we i gat bigfala paoa. Jehova i wokem hem fastaem long ol narafala samting. Taswe, Baebol i talem se hem i “fasbon blong olgeta samting we God i mekem.” (Kolosi 1:15) Jisas i “stret Pikinini blong [God], wan nomo we hem i gat,” hemia from we Jehova nomo i wokem hem. (Jon 3:16) Biaen, Jisas i wok wetem Papa blong hem Jehova, blong wokem ol nara samting. (Ridim Ol Proveb 8:30.) Jisas i gohed blong enjoem frensip blong hem wetem Jehova. Hem i man blong karem tok blong God, i stap talemaot ol mesej mo ol instraksen blong God, taswe Baebol i singaot hem se “Tok ya.”—Jon 1:14.

Yumi stap sin, safa mo ded from we faswan kapol ya Adam mo Iv oli no obei long God.a Be yumi stil gat hop. Jehova i yusum Pikinini blong hem Jisas, blong tekemaot yumi long sin mo ded. Baebol i tijim se ded blong Jisas i olsem wan ransom. Ransom hem i praes we man i pem blong mekem narafala i fri. Mo laef blong Jisas we i stret gud olgeta, hem i praes ya. (Ridim Matiu 20:28.) Jisas i stret gud olgeta mo hem i save laef olwe long wol ya, be hem i no mekem olsem. Hem i rere nomo blong ded blong yumi save kasembak laef ya we Adam mo Iv i lusum. Mo Jisas i soemaot tu se hem mo Jehova i lavem yumi tumas. Lesen ya bambae i halpem yumi blong tinghae moa long ded blong Jisas.

1. ?Olsem wanem ded blong Jisas i halpem yumi tede?

Yumi sinman, taswe yumi stap mekem plante samting we i mekem se Jehova i no glad. Be sipos yumi rili sori, yumi askem Jehova blong i fogivim yumi, mo yumi traehad blong no mekem sin ya bakegen, Jehova bambae i fogivim yumi. Yes, tru long Jisas yumi save kam fren blong God. (1 Jon 2:1) Baebol i talem se: “Kraes i ded blong karemaot sin, hem i ded wan taem nomo mo blong olwe. Stret man ya i ded from ol man we oli no stret, blong hem i save lidim yufala i go long God.”—1 Pita 3:18.

2. ?Olsem wanem ded blong Jisas i save halpem yumi long fiuja?

Jehova i sanem Jisas blong i givim laef blong hem we i stret gud olgeta “blong olgeta man we oli soemaot se oli bilif long [Jisas], oli no ded be oli kasem laef we i no save finis.” (Jon 3:16) Yumi glad se tru long samting we Jisas i mekem, Jehova bambae i finisim ol trabol we oli kamaot from we Adam i no obei. Hemia i min se, sipos yumi bilif long sakrefaes blong Jisas, bambae yumi gat janis blong enjoem laef olwe long wan paradaes long wol.—Aesea 65:21-23.

DIGIM MOA

3. Ded blong Jisas i mekem yumi fri long sin mo ded

VIDEO: ?From Wanem Jisas i Ded?—Haf 1 (2:01)

• ?Adam i lusum wanem taem hem i no obei long God?

Ridim Rom 5:12, mo tokbaot kwestin ya:

• ?Olsem wanem sin we Adam i mekem i afektem laef blong yu?

Ridim Jon 3:16, mo tokbaot kwestin ya:

• ?From wanem Jehova i sanem Pikinini blong hem i kam long wol ya?

1. Adam i stret gud olgeta be i no obei long God mo i lidim ol man oli go long rod blong sin mo ded

2. Jisas i stret gud olgeta mo i obei long God nao i lidim ol man i go long rod blong kam stret gud olgeta mo kasem laef olwe

4. Ded blong Jisas i save halpem olgeta man

VIDEO: ?From Wanem Jisas i Ded?—Haf 2 (2:00)

• ?Olsem wanem ded blong wan man nomo i save halpem olgeta man?

Ridim 1 Timoti 2:5, 6, mo tokbaot kwestin ya:

• Adam mo Jisas tufala i stret gud olgeta, be Adam i lidim ol man oli go long rod blong sin mo ded. ?Be Jisas i mekem wanem?

5. Jehova i givim presen ya ransom long yu

Ol fren blong Jehova oli luk ransom olsem presen blong olgeta. Eksampol, ridim Galesia 2:20, mo tokbaot kwestin ya:

• ?Wanem i soem se Pol i tingbaot ransom olsem wan presen we i kam stret long hem?

Taem Adam i sin, hem wetem olgeta we oli kamaot biaen long hem oli blong ded nomo. Be Jehova i sanem Pikinini blong hem blong i ded, nao yu save enjoem laef olwe.

Taem yu ridim ol vas we oli stap, tingbaot filing we Jehova i gat taem hem i luk Pikinini blong hem i safa. Ridim Jon 19:1-7, 16-18, mo tokbaot kwestin ya:

• ?Wanem tingting blong yu long ol samting we Jehova mo Jisas i mekem blong yu?

SAMARI

Ded blong Jisas i mekem se Jehova i save fogivim ol sin blong yumi mo i givim janis long yumi blong enjoem laef olwe.

Tingtingbak

• ?From wanem Jisas i ded?

• ?Olsem wanem Jisas i givim wan ransom we i stret gud?

• ?Ded blong Jisas i halpem yu olsem wanem?

FAENEMAOT

Lanem from wanem oli se laef blong Jisas we i stret gud olgeta i wan ransom.

“?Sakrefaes Blong Jisas i ‘Wan Ransom Blong Pembak Plante Man’?” (Web atikol)

Faenemaot samting we yumi mas mekem blong yumi stap sef.

“Jisas i Sevem Ol Man—?Hem i Mekem Olsem Wanem?” (Web atikol)

?Jehova i save fogivim ol bigfala sin tu?

“Baebol i Ansa” (Wajtaoa, 1 Julae 2013)

Makem olsem wanem sakrefaes blong Kraes i halpem wan man blong jenisim ol nogud fasin blong hem.

“Mi Mi No Moa Wan Slef Blong Faet” (Web atikol)

1. ?Yumi save mekem wanem blong soem tangkiu long God mo Kraes?

Baebol i promes se: “olgeta man we oli soemaot se oli bilif long [Jisas]” oli save laef olwe. (Jon 3:16) ?Soemaot bilif i minim wanem? I min se yumi no bilif nomo, be yumi soemaot tu long ol jus mo ol aksen blong yumi. (Jemes 2:17) Taem yumi soemaot bilif tru long ol toktok mo aksen blong yumi, bae yumi fren moa wetem Jisas mo Papa blong hem Jehova.—Ridim Jon 14:21.