Taem Blong Lukaotem God
PIJA we i stap long pej ya i soemaot Akropolis long Atens, olsem wan impoten ples blong wosip long plante god mo woman god. Narasaed daon long Akropolis hem i Ereopagas, oli talem se ples ya bifo oli stap mekem miting blong Kaonsel long hem. Ples ya nao we kolosap 2,000 yia bifo, aposol Pol i stanap long fes blong Kaonsel mo i givim wan nambawan tok. Hemia sam long ol tok blong hem:
“[God] i stat long wan man nomo, nao i mekem olgeta man blong wol, mo i putum olgeta oli stap long evri ples long wol. Mo hem i makemaot fastaem we ples blong ol man bambae i bigfala olsem wanem, mo oli save stap long hem longtaem olsem wanem. God ya, hem i mekem olsem, blong bambae yumi evriwan yumi stap traem lukaot hem. From samting ya, maet taem yumi stap pusum han blong yumi i go olbaot, bambae yumi save faenem hem. Be i tru tu, we hem i no stap longwe long yumi nating. Olsem we wan man i talem bifo, i se ‘From we yumi joen long God nomo, yumi gat laef, yumi stap wokbaot, mo yumi stap mekem evri samting.’”—Ol Wok 17:26-28.
!Sipos ol man oli luksave tok ya blong Pol bambae laef long histri blong man i defren! Bambae plante faet, plante trabol, oli no save kamaot sipos ol man oli luksave se evri man i kamaot long wan man nomo we Hae God Jeova i wokem.
Tede, ol man oli stap flas from kantri blong olgeta, ol rijman mo ol puaman oli seraot, fasin blong no laekem man from kala no laen blong hem, mo ol narafala trabol long laef olsem. Be, tok ya blong Pol i save wok yet sipos ol man oli kasem save long hem. Yumi evriwan i kamaot long wan man nomo we God i wokem. Yumi evriwan, i olsem brata mo sista. Mo i gat taem yet blong lukaotem God from we naoia yumi save faenem hem yet.
Tok blong Pol i impoten moa taem yumi tingbaot ol lastok we hem i talem long taem ya. Hem i se: “[God] i putum dei finis, we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae i yusum blong jajem olgeta man. Mo hem i soemaot finis long olgeta man we bambae i mekem olsem, from we hem i mekem man ya i laef bakegen finis long ded.”
Laef bakegen blong Jisas i wan trufala store, mo olsem Pol i talem, hem i olsem wan promes blong soemaot se bambae i gat wan dei blong jajem olgeta man. ?Wetaem? Yumi save se yumi kam 2,000 yia kolosap long dei ya we Pol i tokbaot taem hem i stanap long fes blong Kaonsel long Ereopagas. Tru ya, ol profet tok blong Baebol we oli stap kamtru oli soemaot se dei ya i kolosap tumas. !Tingting ya i save mekem man i fraet! !I impoten se yumi mas lukaotem God wetem gudfala hat, from we Pol i talem long ol man Atens, i se: “Be nao hem i stap talem long yumi evriwan long evri ples, se ‘Yufala evriwan i mas tanem tingting blong yufala from ol sin blong yufala.’”!—Ol Wok 17:30, 31.