Rom i dipen bigwan long ol sip blong karem kakae i kam long olgeta. I gat klosap wan milyan man long Rom, taswe oli nidim bigfala saplae blong sid​—bitwin 250,000 mo 400,000 tan evri yia. ?Ol sid ya oli kam wea? Flavius Josephus i talem tok blong Agrippa 2, we hem i se: ‘Not Afrika i stap fidim Rom eit manis long wan yia, mo Ijip i sanem plante sid long ol fofala manis we i stap.’ I nidim plante taosen sip blong karem ol sid i go kasem taon blong Rom.

?Yumi save talem wanem long saed blong sip ya we i rek long Molta wetem Pol i stap long hem? Hemia “wan sip we i aot long Aleksandria, i stap go long Itali.” (Ol Wok 27:6) Ol sip blong sid oli stap long han blong ol man Gris, ol man Fonisia, mo ol man Siria. Trifala kantri ya oli lidim mo lukaot long prapa sip blong olgeta, be, gavman blong Rom i rentem ol sip ya. Wan man we i stap stadi long histri, nem blong hem William M. Ramsay, i talem se: “Gavman blong Rom i luk se i moa isi blong mekem kontrak wetem sam man blong oli mekem wok blong olgeta, i bitim we Rom hem wan i lukaot long bigfala wok long saed blong ol wokman mo ol ting we ol sip oli nidim.”