?From Wanem i Gat Trabol Mo Man i Safa?

Taem wan man i kasem trabol, plante taem hem i askem kwestin ya se: “?From wanem?” !Yumi glad we Baebol i ansa long kwestin ya!

1. ?Olsem wanem Setan i statem trabol long wol ya?

Devel Setan i rebel agensem God. Hem i wantem rulum ol narafala taswe hem i pulum Adam mo Iv, blong joenem hem. Setan i mekem olsem taem hem i giaman long Iv. (Jenesis 3:1-5) Hem i pulum Iv blong ting se Jehova i no wantem givim gudfala samting long hem. Nao hem i mekem olsem se ol man oli save glad moa sipos oli no obei long God. Hem i talem long Iv se hem i no save ded, hemia faswan giaman tok. Taswe Baebol i singaot Setan se “man blong giaman mo hem i papa blong ol giaman toktok.”—Jon 8:44.

2. ?Adam mo Iv i jusum blong mekem wanem?

Jehova i givim plante samting long Adam mo Iv. Hem i talem se tufala i save kakae long evri tri we i stap long garen, be wan nomo tufala i no save kakae long hem. (Jenesis 2:15-17) Be tufala i gohed nomo blong kakae frut blong tri ya. Iv “i tekem frut blong tri ya mo i kakae.” Biaen, Adam “tu i kakae.” (Jenesis 3:6) Tufala tugeta i no obei long God. Long taem ya, i nomol nomo blong Adam mo Iv i obei from we tufala i stret gud olgeta. Be taem tufala i jusum blong no obei, tufala i mekem sin mo soem se tufala i no wantem stap aninit long rul blong God. Desisen ya i mekem tufala i safa bigwan.—Jenesis 3:16-19.

3. ?Olsem wanem desisen blong Adam mo Iv i afektem yumi?

Taem Adam mo Iv i mekem sin tufala i no moa stret gud olgeta, mo tufala i pasem sin long olgeta pikinini blong tufala. Baebol i tokbaot Adam, i se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man.”—Rom 5:12.

Yumi safa from ol defren risen. Samtaem yumi safa from ol nogud desisen blong yumi. Samtaem from ol nogud desisen blong narafala. Samtaem from we yumi stap long rong ples mo long rong taem.—Ridim Prija 9:11.

DIGIM MOA

4. ?Hu i mekem se ol man oli stap safa?

Plante man oli bilif se God i kontrolem ful wol. ?I tru olsem? Plei VIDEO.

VIDEO: ?Hu i Kontrolem Wol? (1:24)

Ridim Jemes 1:13 mo 1 Jon 5:19, mo tokbaot kwestin ya:

• ?God nao i mekem se ol man oli safa mo i gat ol trabol?

5. ?Wanem i hapen taem Setan i stat blong rul?

VIDEO: ?From Wanem God i Letem Ol Man Oli Safa?—Wan Smol Haf (3:07)

Ridim Jenesis 3:1-6, mo tokbaot ol kwestin ya:

• ?Wanem giaman tok we Setan i talem?—Luk vas 4 mo 5.

• ?Setan i talem wanem blong givim tingting se God i stap blokem ol man blong kasem ol gudfala samting?

• ?Setan i talem wanem blong soem se ol man oli no nidim rul blong Jehova blong oli hapi?

Ridim Prija 8:9, mo tokbaot kwestin ya:

• ?Wanem i hapen taem Jehova i no moa rulum wol?

1. Adam mo Iv oli stret gud olgeta mo oli laef long Paradaes. Be oli lesin long Setan mo oli rebel agensem Jehova

2. Afta we tufala i rebel, wol ya i fulap long ol sinman, plante man oli safa mo oli ded

3. Jehova bambae i finisim sin, ded mo fasin safa. Nao bambae ol man oli kam stret gud olgeta mo laef long paradaes olsem bifo

6. Jehova i tingbaot yumi taem yumi safa

God i kea long yumi taem yumi safa. Makem samting we King Deved mo aposol Pita i raetem. Ridim Ol Sam 31:7 mo 1 Pita 5:7, mo tokbaot kwestin ya:

• ?Yu harem olsem wanem taem yu save se Jehova i kea mo i luk yumi taem yumi safa?

SAMARI

Devel Setan mo tufala faswan man oli responsibol long ol nogud samting we i hapen long wol ya. Jehova i rili kea long yumi taem yumi safa mo bambae i no longtaem hem i finisim ol samting we i mekem yumi safa.

Tingtingbak

• ?Wanem giaman tok we Setan i talem long Iv?

• ?Olsem wanem fasin blong Adam mo Iv blong rebel i afektem yumi evriwan?

• ?Olsem wanem yumi save se Jehova i tingbaot yumi taem yumi safa?

FAENEMAOT

Lanem mining blong tok ya sin long Baebol.

“?Sin Hem i Wanem?” (Web atikol)

Faenemaot moa long topik we Setan i talem long garen blong Iden.

“Why Does God Allow Suffering?” (Wajtaoa, 1 Jenuware 2014)

Jekem ol gudfala ansa long wan impoten topik.

“?From Wanem Samtaem Sam Man Oli Kilim i Ded Plante Taosen Man Wantaem? ?From Wanem God i No Stopem Trabol Ya?” (Web atikol)

Luk olsem wanem wan man i lanem lesen long ol trabol raonabaot long hem.

Mi No Moa Stap Mi Wan (5:09)

Yumi stap sin, safa mo ded from we faswan kapol ya Adam mo Iv oli no obei long God.a Be yumi stil gat hop. Jehova i yusum Pikinini blong hem Jisas, blong tekemaot yumi long sin mo ded. Baebol i tijim se ded blong Jisas i olsem wan ransom. Ransom hem i praes we man i pem blong mekem narafala i fri. Mo laef blong Jisas we i stret gud olgeta, hem i praes ya. (Ridim Matiu 20:28.) Jisas i stret gud olgeta mo hem i save laef olwe long wol ya, be hem i no mekem olsem. Hem i rere nomo blong ded blong yumi save kasembak laef ya we Adam mo Iv i lusum. Mo Jisas i soemaot tu se hem mo Jehova i lavem yumi tumas. Lesen ya bambae i halpem yumi blong tinghae moa long ded blong Jisas.

1. ?Olsem wanem ded blong Jisas i halpem yumi tede?

Yumi sinman, taswe yumi stap mekem plante samting we i mekem se Jehova i no glad. Be sipos yumi rili sori, yumi askem Jehova blong i fogivim yumi, mo yumi traehad blong no mekem sin ya bakegen, Jehova bambae i fogivim yumi. Yes, tru long Jisas yumi save kam fren blong God. (1 Jon 2:1) Baebol i talem se: “Kraes i ded blong karemaot sin, hem i ded wan taem nomo mo blong olwe. Stret man ya i ded from ol man we oli no stret, blong hem i save lidim yufala i go long God.”—1 Pita 3:18.

2. ?Olsem wanem ded blong Jisas i save halpem yumi long fiuja?

Jehova i sanem Jisas blong i givim laef blong hem we i stret gud olgeta “blong olgeta man we oli soemaot se oli bilif long [Jisas], oli no ded be oli kasem laef we i no save finis.” (Jon 3:16) Yumi glad se tru long samting we Jisas i mekem, Jehova bambae i finisim ol trabol we oli kamaot from we Adam i no obei. Hemia i min se, sipos yumi bilif long sakrefaes blong Jisas, bambae yumi gat janis blong enjoem laef olwe long wan paradaes long wol.—Aesea 65:21-23.

DIGIM MOA

3. Ded blong Jisas i mekem yumi fri long sin mo ded

VIDEO: ?From Wanem Jisas i Ded?—Haf 1 (2:01)

• ?Adam i lusum wanem taem hem i no obei long God?

Ridim Rom 5:12, mo tokbaot kwestin ya:

• ?Olsem wanem sin we Adam i mekem i afektem laef blong yu?

Ridim Jon 3:16, mo tokbaot kwestin ya:

• ?From wanem Jehova i sanem Pikinini blong hem i kam long wol ya?

1. Adam i stret gud olgeta be i no obei long God mo i lidim ol man oli go long rod blong sin mo ded

2. Jisas i stret gud olgeta mo i obei long God nao i lidim ol man i go long rod blong kam stret gud olgeta mo kasem laef olwe

4. Ded blong Jisas i save halpem olgeta man

VIDEO: ?From Wanem Jisas i Ded?—Haf 2 (2:00)

• ?Olsem wanem ded blong wan man nomo i save halpem olgeta man?

Ridim 1 Timoti 2:5, 6, mo tokbaot kwestin ya:

• Adam mo Jisas tufala i stret gud olgeta, be Adam i lidim ol man oli go long rod blong sin mo ded. ?Be Jisas i mekem wanem?

5. Jehova i givim presen ya ransom long yu

Ol fren blong Jehova oli luk ransom olsem presen blong olgeta. Eksampol, ridim Galesia 2:20, mo tokbaot kwestin ya:

• ?Wanem i soem se Pol i tingbaot ransom olsem wan presen we i kam stret long hem?

Taem Adam i sin, hem wetem olgeta we oli kamaot biaen long hem oli blong ded nomo. Be Jehova i sanem Pikinini blong hem blong i ded, nao yu save enjoem laef olwe.

Taem yu ridim ol vas we oli stap, tingbaot filing we Jehova i gat taem hem i luk Pikinini blong hem i safa. Ridim Jon 19:1-7, 16-18, mo tokbaot kwestin ya:

• ?Wanem tingting blong yu long ol samting we Jehova mo Jisas i mekem blong yu?

SAMARI

Ded blong Jisas i mekem se Jehova i save fogivim ol sin blong yumi mo i givim janis long yumi blong enjoem laef olwe.

Tingtingbak

• ?From wanem Jisas i ded?

• ?Olsem wanem Jisas i givim wan ransom we i stret gud?

• ?Ded blong Jisas i halpem yu olsem wanem?

FAENEMAOT

Lanem from wanem oli se laef blong Jisas we i stret gud olgeta i wan ransom.

“?Sakrefaes Blong Jisas i ‘Wan Ransom Blong Pembak Plante Man’?” (Web atikol)

Faenemaot samting we yumi mas mekem blong yumi stap sef.

“Jisas i Sevem Ol Man—?Hem i Mekem Olsem Wanem?” (Web atikol)

?Jehova i save fogivim ol bigfala sin tu?

“Baebol i Ansa” (Wajtaoa, 1 Julae 2013)

Makem olsem wanem sakrefaes blong Kraes i halpem wan man blong jenisim ol nogud fasin blong hem.

“Mi Mi No Moa Wan Slef Blong Faet” (Web atikol)