6, 7. (a) ?From wanem yumi mas tijim yumi wan fastaem? (b) ?From wanem ol tija blong ol man Jiu long faswan handred yia oli no mekem gud wok ya blong tij?

⁶ ?From wanem yumi mas tijim yumi wan fastaem? From we yumi no save tijimgud ol narafala sipos yumi no tijim yumi wan fastaem. Pol i soemaot se samting ya i impoten taem hem i tok blong wekemap tingting blong ol man Jiu bifo. Tok blong hem i karem wan impoten mesej we i stret long ol Kristin tede tu. Hem i askem se: “Yufala i save tijim ol narafala man. ?Be from wanem yufala i no save tijim yufala bakegen? Yufala i stap talem long olgeta se, ‘Bambae yu no mas stil.’ ?Be from wanem yufala i stap stil? Yufala i stap talem se, ‘Bambae yu no mas stilim woman blong narafala man.’ ?Be from wanem yufala i stap stilim woman? Yufala i stap lukluk nogud long ol narafala god, se oli rabis. ?Be from wanem yufala i stap stilim ol samting long ol haos blong wosip blong olgeta? !Yufala i stap tok flas from we yufala i gat Loa blong God, be yufala nao i stap spolem nem blong hem long fasin ya we yufala i stap brekem Loa blong hem!”—Rom 2:21-23.

⁷ Wetem ol kwestin ya, Pol i soemaot tufala fasin we ol Tenkomanmen oli talem stret se tufala i rong, hemia se: Yufala i no mas stil, mo yufala i no mas slip wetem woman blong narafala. (Eksodas 20:14, 15) Sam man Jiu long taem blong Pol oli flas from we olgeta nao oli holem Loa blong God. ‘Loa ya i tijim olgeta finis, mo from we oli save Loa ya, oli ting se oli savegud fasin blong lidim ol blaenman, mo oli save givim laet long olgeta we oli stap yet long tudak. Oli ting se oli save lanem ol pikinini.’ (Rom 2:17-20) Be sam long olgeta ya oli gat tu fes from we long fasin haed oli stap stil no oli stap slip wetem ol woman blong narafala man. Ol fasin ya oli sakem doti long Loa mo long Bigman long heven we hem nao i stanemap loa ya. Yumi luk se olgeta ya oli no naf nating blong tijim ol narafala from we oli no stap tijim olgeta fastaem.

8. ?Ating sam man Jiu long taem blong Pol oli stap ‘stilim samting long wan haos blong prea’ olsem wanem?

⁸ Pol i tokbaot fasin blong stilim samting long haos wosip. ?I gat sam man Jiu we oli rili mekem samting ya? ?Pol i stap tingbaot wanem taem hem i talem olsem? From we vas ya i no klia moa long poen ya, yumi no save talem stret se olsem wanem nao sam man Jiu oli bin ‘stilim samting long wan haos blong prea.’ Bifo we Pol i raetem tok ya, taon klak blong Efesas i talemaot se ol fren blong Pol oli no ‘stilim samting long wan haos prea.’ Tok blong man ya i soemaot se ol man Jiu oli gat fasin ya blong stil long ol haos prea. (Ol Wok 19:29-37) ?Wanem nao we oli stap mekem? ?Oli stap yusum no salem sam tabu samting blong ol haos prea blong ol hiten man we maet sam soldia oli bin karem i kam taem oli winim faet agensem narafala kantri no we maet skul blong ol silot i stilim long narafala man? Sipos i olsem, oli stap mekem rong from we Loa blong God i talem se oli mas spolem olgeta gol mo silva blong ol aedol ya, oli no mas kipim i blong olgeta. (Dutronome 7:25)a Taswe maet Pol i stap tokbaot ol man Jiu ya we oli no obei long oda blong God mo oli stap yusum ol samting we oli kamaot long haos prea blong ol hiten man.

9. ?Wanem nogud samting we ol man oli mekem we i sem mak nomo olsem se oli stil long tempol ya?

⁹ Josephus i tokbaot wan bigfala trabol we fo man Jiu oli mekem long Rom. Man we i biaenem trabol ya hem i wan tija blong Loa. Fofala man ya oli pulum wan woman Rom, we hem i joenem skul blong ol man Jiu, blong givim ol gol mo narafala sas samting i go long fofala ya blong oli karem i go olsem presen blong tempol long Jerusalem. Be taem fofala ya i kasem ol sas samting ya, oli yusum blong olgeta nomo—i olsem we oli stil long tempol.b Sam narafala man Jiu oli stap stil long tempol blong God from we oli givim ol sakrefaes we oli nogud mo oli stap mekem bisnes insaed long hem. Oli mekem tempol “i kam ples blong haed blong ol man blong stil.”—Matiu 21:12, 13; Malakae 1:12-14; 3:8, 9.