Rom 15:13—“Mi Prea Se God Ya We i Stap Givim Hop, i Givim Bigfala Glad Mo Pis Long Yufala”

“Mi prea se God ya we i stap givim hop, i givim bigfala glad mo pis long yufala from we yufala i trastem hem, nao bambae tabu spirit i mekem se hop blong yufala i kam strong moa.”—Rom 15:13, Baebol Long Niu Wol Translesen.

“God ya we i stap givim hop, bambae i givim bigfala glad mo pis long yufala taem yufala i stap gohed blong trastem hem, nao paoa blong Tabu Spirit bambae i fulumap yufala wetem hop.”—Rom 15:13, New International Version.

Mining blong Rom 15:13

Aposol Pol i talem ol tok ya blong soemaot se hem i wantem we God i fulumap ol Kristin brata mo sista wetem “glad mo pis.” Tufala fasin ya i joen wetem paoa blong tabu spirit mo hop we God i givim.

Yumi kasem save long hop we God i givim, taem yumi ridim Tok blong hem, Baebol. Folem Rom 15:4, “olgeta tok we oli raetem bifo [long Baebol], oli blong tijim yumi. Nao yumi save gat hop from we Ol Tok Blong Baebol oli mekem yumi harem gud mo oli mekem se yumi save stanap strong longtaem.” Baebol i soemaot promes blong God se bambae hem i stretem ol trabol we oli mekem se man i harem se i no gat hop, olsem fasin pua, no gat jastis, sik, mo ded. (Revelesen 21:4) Bambae God i yusum Jisas Kraes blong mekem ol promes ya oli kamtru, from samting ya, yumi save sua long hop ya blong wan gudfala fiuja.—Rom 15:12.

Taem yumi trastem God fulwan, hop ya we God i givim i save “kam strong moa,” o “fulumap” yumi. Taem yumi kasem save moa long God, bambae yumi sua gud se yumi save trastem hem fulwan. (Aesea 46:10; Taetas 1:2) Hop ya we God i givim mo yumi save trastem, i mekem se yumi glad mo pis i fulumap yumi, nating se laef i had.—Rom 12:12.

Pis, glad, mo hop, oli joen long “tabu spirit” tu, hemia paoa blong God we i stap wok.a God i yusum tabu spirit blong mekem ol promes blong hem oli kamtru, mo samting ya i givim hop. Spirit ya i save givhan long ol man tu, blong oli wokem ol gudfala fasin olsem glad mo pis.—Galesia 5:22.

Ol vas raonabaot long Rom 15:13

Buk blong Rom i wan leta we i go long ol Kristin long Rom. Sam long olgeta oli man Jiu, be samfala nogat. Pol i pulum olgeta blong traehad blong joen gud long wan tingting mo aksen, nating se oli kamaot long defdefren laen mo kalja.—Rom 15:6.

Pol i rimaenem ol Kristin long Rom se longtaem finis, God i talemaot wan taem we ol nesen bambae oli joen gud blong presem Hem. Blong sapotem poen ya, fo taem Pol i talem tok we i kamaot long Hibru haf blong Baebol.b (Rom 15:9-12) Bigfala tingting we hem i wantem givim se: Ol man blong ol nesen oli save kasem blesing from minista wok we Kraes i statem, olsem ol man Jiu. God i save givim sem hop long ol man Jiu mo ol man blong ol narafala nesen tu. Taswe, nomata se oli kamaot long wanem laen, i stret we evriwan long kongregesen blong Rom oli ‘stap welkamem olgeta,’ i min se oli glad blong tekem olgeta oli kam long haos mo mekem kaen fasin long olgeta.—Rom 15:7.