-
?Kingdom Blong God Hem i Wanem?!Enjoem Laef Olwe!—Baebol Kos
-
-
7. Loa blong Kingdom i gud moa i bitim blong ol man
Ol gavman oli putumap ol loa blong i givhan mo protektem ol sitisen blong olgeta. Kingdom blong God tu i gat ol loa we ol sitisen blong hem oli mas folem. Ridim 1 Korin 6:9-11, mo tokbaot ol kwestin ya:
?Yu ting se wol bambae i olsem wanem sipos evriwan i folem ol rul blong Kingdom?a
?Yu ting se i stret we Jehova i ekspektem ol sitisen blong hem, blong oli respektem ol rul blong Kingdom? ?From wanem?
?Wanem i soemaot se ol man we oli no obei long loa ya, oli save jenis?—Luk vas 11.
Ol gavman oli stanemap ol loa blong protektem mo givhan long ol sitisen blong olgeta. Be Kingdom i gat ol loa we oli gud moa blong protektem mo givhan long ol sitisen blong hem
-
-
?Baebol i Talem Wanem Long Saed Blong Seks?!Enjoem Laef Olwe!—Baebol Kos
-
-
LESEN 41
?Baebol i Talem Wanem Long Saed Blong Seks?
Plante man oli sem blong tokbaot seks. Be Baebol i no mekem olsem, hem i tokbaot seks long fasin we i klia mo i soem respek. Mo samting we hem i talem i givhan long yumi, from we Baebol i kam long Jehova we i Krieta blong yumi. Jehova i save samting we i gud long yumi. Taswe hem i talem samting we yumi save mekem blong hem i glad mo samting we bambae i givhan long yumi blong enjoem laef olwe.
1. ?Wanem tingting blong Jehova long saed blong seks?
Seks i wan presen we God i givim long ol man. Hem i wantem se man mo woman we tufala i mared i haremgud long seks. Presen ya i blong mekem kapol i gat ol pikinini mo tu i blong givhan long tufala blong soem lav blong tufala long fasin we i stret mo haremgud long hem. From samting ya, Baebol i talem se: “I gud yu harem gud long waef blong yu we yu mared wetem taem yu yangfala.” (Ol Proveb 5:18, 19) Jehova i ekspektem ol Kristin we oli mared blong oli mas stap tru long hasban o waef blong olgeta, olsem ya bambae oli no save mekem adaltri.—Ridim Hibru 13:4.
2. ?Eni kaen doti fasin blong seks hem i wanem?
Baebol i talem long yumi se: “olgeta we oli stap mekem enikaen doti fasin blong seks . . . bambae oli no kasem Kingdom blong God.” (1 Korin 6:9, 10) Ol man blong raetem Baebol we oli raet long lanwis Grik, oli yusum tok ya por·neiʹa blong tokbaot eni kaen doti fasin blong seks. Tok ya i minim (1) fasin blong mekem seksa bitwin ol man we oli no mared long olgeta, (2) homoseksuol, mo (3) fasin blong mekem seks wetem ol animol. Taem yumi no “mekem enikaen doti fasin blong seks, yumi mekem Jehova i glad, mo yumi mekem i gud long yumi wan.”—1 Tesalonaeka 4:3.
DIGIM MOA
Faenemaot olsem wanem blong blokem eni kaen doti fasin blong seks, mo olsem wanem samting ya bambae i givhan long yu blong stap klin.
3. Ronwe long doti fasin blong seks
Josef i traehad blong stap klin long fasin blong hem. Ridim Jenesis 39:1-12, mo tokbaot ol kwestin ya:
?Wanem i givhan long Josef blong i ronwe?—Luk vas 9.
?Yu ting se desisen blong Josef i stret? ?From wanem?
?Ol yangfala tede oli save mekem wanem blong ronwe long doti fasin blong seks, olsem Josef? Plei VIDEO.
Jehova i wantem se yumi evriwan i blokem doti fasin blong seks. Ridim 1 Korin 6:18, mo tokbaot ol kwestin ya:
?Wanem i save lidim wan man blong mekem doti fasin blong seks?
?Olsem wanem yu save ronwe long doti fasin ya?
4. Yu save blokem ol traem
?From wanem samtaem i had blong blokem ol traem long saed blong seks? Plei VIDEO, mo tokbaot kwestin ya.
Long video ya, taem brata i kasemsave se ol tingting mo ol aksen blong hem i save pulum hem blong i no stap tru long waef blong hem, ?hem i mekem wanem?
Samtaem ol trufala Kristin tu oli mas traehad blong gat tingting we i klin. ?Olsem wanem blong no tingting oltaem long ol doti fasin blong seks? Ridim Filipae 4:8, mo tokbaot ol kwestin ya:
?Yumi sud tingting oltaem long wanem samting?
?Olsem wanem fasin blong ridim Baebol mo bisi long wok blong Jehova, i save halpem yumi blong blokem ol traem?
5. Ol rul blong Jehova oli mekem i gud long yumi
Jehova i save samting we i gud long yumi. Taswe, hem i talem olsem wanem yumi save stap klin mo i talemaot ol blesing we yumi save kasem. Ridim Ol Proveb 7:7-27 o plei VIDEO, mo tokbaot ol kwestin ya.
?Yang man ya i mekem wanem blong pulum trabol i kam long hem?—Luk Ol Proveb 7:8, 9.
Folem Ol Proveb 7:23, 26, doti fasin blong seks i save givim bigfala problem. ?Wanem ol problem we yumi save blokem sipos yumi stap klin?
?Olsem wanem fasin blong stap klin i save halpem yumi blong enjoem laef olwe?
Sam man oli ting se samting we Baebol i talem long saed blong homoseksuol i no soem lav. Be Jehova i God blong lav, mo hem i wantem se evriwan i enjoem laef olwe. Blong kasem laef ya, yumi mas folem ol rul blong hem. Ridim 1 Korin 6:9-11, mo tokbaot kwestin ya:
?Yu ting se fasin blong homoseksuol nomo i no klin long fes blong God?
Blong mekem God i glad long yumi, yumi evriwan i mas jenisim fasin blong yumi. ?Yu ting se ol jenis ya bambae oli givhan long yu? Ridim Ol Sam 19:8, 11, mo tokbaot ol kwestin ya:
?Yu ting se ol rul blong Jehova oli strong tumas? ?From wanem yu ansa olsem?
Jehova i halpem plante man blong oli obei long ol rul blong hem. Hem i save halpem yu tu
SAM MAN OLI SE: “Sipos wan man mo woman i lavlavem tufala, i oraet nomo blong tufala i slip tugeta bifo mared.”
?Bambae yu talem wanem?
SAMARI
Seks i wan presen we Jehova i givim long wan hasban mo waef blong tufala i enjoem.
Tingtingbak
?Eni kaen doti fasin blong seks i minim wanem?
?Wanem i save halpem yumi blong no mekem eni kaen doti fasin blong seks?
?Wanem ol blesing we yumi save kasem taem yumi folem ol rul blong Jehova?
FAENEMAOT
Lanem from wanem God i wantem se wan man mo woman i mared bifo we tufala i laef tugeta.
“?Baebol i Talem Wanem Long Saed Blong Laef Tugeta Bifo Mared?” (Web atikol)
Lanem from wanem rul blong Baebol long saed blong homoseksuol i no pulum man blong agensem narafala.
Lanem olsem wanem loa blong God long saed blong seks i protektem yumi.
Long ekspiriens ya “They Treated Me With Dignity,” faenemaot wanem i pulum wan homoseksuol blong jenisim laef blong hem, mo mekem God i glad.
a Ol rabis fasin blong seks i minim tu, man mo woman i mekem seks, fasin blong yusum maot o as blong mekem seks, mo fasin blong pleplei wetem praevet pat blong narafala.
-
-
?Olsem Wanem Sipos Yu Mekem Wan Bigfala Sin?!Enjoem Laef Olwe!—Baebol Kos
-
-
Nating se yu rili lavem Jehova mo yu no wantem mekem hem i harem nogud, be samtaem bambae yu mekem mastik. Mo i gat sam mastik o sin we oli bigwan moa i bitim ol narawan. (1 Korin 6:9, 10) Sipos yu mekem wan bigfala sin, i gud yu tingbaot se Jehova i stil lavem yu mo hem i rere blong fogivim yu mo givhan long yu.
1. ?Yumi mas mekem wanem blong Jehova i fogivim yumi?
Olgeta we oli lavem Jehova oli harem nogud tumas taem oli luksave se oli mekem wan bigfala sin. Be oli harem gud taem oli tingbaot promes we Jehova i mekem long ol man blong hem se: “Nating se ol sin blong yufala oli olsem kala we i laet red, be bambae oli kam waet olsem sno.” (Aesea 1:18) Sipos yumi rili tanem tingting blong yumi, Jehova bambae i fogivim yumi. ?Be olsem wanem yumi tanem tingting blong yumi? Yumi mekem olsem taem yumi rili sore from samting we yumi mekem nao yumi stop blong mekem samting ya mo yumi askem Jehova blong i fogivim yumi. Biaen, yumi traehad blong jenisim ol rong tingting mo ol fasin we oli lidim yumi blong mekem sin ya, mo yumi traehad blong laef folem ol rul blong Jehova.—Ridim Aesea 55:6, 7.
2. ?Olsem wanem Jehova i yusum ol elda blong halpem yumi taem yumi mekem sin?
Sipos yumi mekem wan bigfala sin, Jehova i talem long yumi blong “singaot ol elda blong kongregesen.” (Ridim Jemes 5:14, 15.) Ol man ya oli lavem Jehova mo ol sipsip blong Hem. Olgeta oli naf blong givhan long yumi blong yumi frengud bakegen wetem Jehova.—Galesia 6:1.
?Olsem wanem ol elda oli save givhan long yumi, taem yumi mekem wan bigfala sin? Tu o tri elda bambae oli yusum Baebol blong stretem yumi. Mo tu, bambae oli enkarejem yumi mo givim sam advaes blong halpem yumi blong no moa mekem sin ya. Be sipos wan man i mekem wan bigfala sin, mo i no wantem tanem tingting blong hem, bambae ol elda oli putumaot hem long kongregesen blong hem i no spolem ol narafala.
DIGIM MOA
Soem tangkiu long fasin blong Jehova blong givhan long yumi taem yumi mekem wan bigfala sin.
3. Taem yumi talemaot sin blong yumi bambae yumi harem gud moa
Eni sin we yumi mekem i mekem Jehova i harem nogud, taswe yumi mas talemaot long hem. Ridim Ol Sam 32:1-5, mo tokbaot kwestin ya:
?From wanem i gud yumi talemaot ol sin blong yumi long Jehova i bitim we yumi haedem?
Taem yumi talemaot ol sin blong yumi long ol elda afta we yumi talemaot long Jehova, bambae yumi harem gud moa. Plei VIDEO, mo tokbaot kwestin ya.
Long video ya, ?olsem wanem ol elda oli givhan long Canon blong kambak long Jehova?
Yumi mas talemaot evri samting mo tok tru long ol elda, from we oli stap blong givhan long yumi. Ridim Jemes 5:16, mo tokbaot kwestin ya:
?From wanem i isi moa long ol elda blong givhan long yumi taem yumi tok tru?
Talemaot sin blong yu, tok tru long ol elda, mo akseptem help blong Jehova
4. Jehova i sore long man we i mekem bigfala sin
Sipos wan man i mekem wan bigfala sin mo i no wantem folem ol rul blong Jehova, bambae kongregesen i putumaot hem. Taem oli putumaot hem, yumi no moa spenem taem wetem hem. Ridim 1 Korin 5:6, 11, mo tokbaot kwestin ya:
Is i save mekem bred i solap, long sem fasin, ?olsem wanem fasin blong joen wetem man we i no wantem tanem tingting blong hem i save spolem kongregesen?
Jehova i sore long man we i mekem bigfala sin. Taswe ol elda oli folem fasin blong Hem mo oli traehad blong halpem olgeta we kongregesen i putumaot olgeta. Nating se olgeta we kongregesen i putumaot olgeta oli harem nogud, be fasin stretem we oli kasem i givhan long plante long olgeta blong luksave rong we oli mekem nao oli kambak.—Ol Sam 141:5
Taem yu tingbaot samting we Jehova i mekem long man we i mekem bigfala sin, ?olsem wanem hemia i soemaot se Hem i no mekem i strong tumas long man, i gat sore, mo i gat lav?
5. Jehova i fogivim yumi taem yumi tanem tingting
Jisas i yusum wan pijatok blong halpem yumi blong kasem save filing we Jehova i gat taem wan man i tanem tingting blong hem. Ridim Luk 15:1-7, mo tokbaot kwestin ya:
?Yu yu lanem wanem long saed blong Jehova?
Ridim Esikel 33:11, mo tokbaot kwestin ya:
?Wanem impoten samting we yu mas mekem blong soem se yu rili sore?
Jehova i olsem wan man blong lukaot long sipsip we i kea long ol sipsip blong hem
SAM MAN OLI SE: “Mi fraet se sipos mi talemaot sin blong mi long ol elda, bambae oli putumaot mi long kongregesen.”
?Bambae yu talem wanem long wan man we i gat tingting ya?
SAMARI
Sipos yumi mekem wan bigfala sin, mo yumi rili sore from samting ya, nao yumi stop blong mekem, bambae Jehova i fogivim yumi.
Tingtingbak
?From wanem i gud blong yumi talemaot ol sin blong yumi long Jehova?
?Yumi mas mekem wanem blong Jehova i fogivim yumi?
?Sipos yumi mekem wan bigfala sin, from wanem i gud blong askem help blong ol elda?
FAENEMAOT
Luk olsem wanem Jehova i soem sore long wan man, olsem we Aesea 1:18 i tokbaot.
?Ol elda oli stap mekem wanem blong givhan long man we i mekem bigfala sin?
“?Olsem Wanem Ol Elda Oli Soemaot Lav Mo Sore Long Man We i Mekem Sin?” (Wajtaoa, Ogis 2024)
Faenemaot olsem wanem kongregesen i soemaot lav mo sore long man we kongregesen i putumaot hem.
“Givhan Long Olgeta We Kongregesen i Putumaot Olgeta” (Wajtaoa, Ogis 2024)
Long stori ya “I Needed to Return to Jehovah,” luk olsem wanem wan man we i gowe long trutok i harem se Jehova i pulum hem i kambak.
-