4. ?Pol i givim wanem advaes long 1 Korin 10:​12, 13?

⁴ Taem Pol i raet i go long ol Kristin long Korin​—wan taon we i fulap long rabis fasin​—hem i givim strongfala woning agensem ol traem mo paoa blong sin. Hem i talem se: “Man we i ting se i stap stanap strong, hem i mas lukaot gud, blong bambae i no foldaon bakegen. Ol samting ya we oli stap traem yumi, oli sem mak nomo long ol samting we oli stap traem ol narafala man. Be God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.” (1 Korin 10:12, 13) Yumi evriwan, ol yangfala mo ol olfala, ol man mo ol woman, yumi stap fesem plante traem long skul, long wok, mo long evri ples. Taswe, i gud yumi stadi long ol tok blong Pol blong luk olsem wanem ol tok ya oli save halpem yumi.

7. ?From wanem yumi harem gud tumas taem yumi save se samfala oli bin winim ol traem?

⁷ Ol tok ya blong Pol oli mekem yumi harem gud tumas, se: “Ol samting ya we oli stap traem yumi, oli sem mak nomo long ol samting we oli stap traem ol narafala man.” (1 Korin 10:13) Aposol Pita i talem se: “Yufala i mas stanap strong long bilif blong yufala [agensem Setan], blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” (1 Pita 5:9) Plante brata sista oli bin fesem ol sem traem olsem yumi, mo God i halpem olgeta blong winim ol traem ya. Taswe, yumi tu, yumi save winim ol traem we yumi kasem. Yumi evriwan i stap long wan wol we i fulap long rabis fasin, taswe yumi save se bambae yumi kasem traem. ?Nao olsem wanem blong meksua se bambae yumi winim ol slak fasin blong yumi mo ol samting we oli stap pulum yumi blong mekem sin?