Ol Man, ?Yufala i Stap Daon Aninit Long Kraes We i Hed Blong Yufala?

“Kraes, hem i hed blong man.”—1 KOR. 11:3.

1. ?Wanem i soemaot se Jeova i wan God we i wok folem plan?

“YU YU . . . God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” Ol tok ya blong Revelesen 4:11 oli soemaot se, from we Jeova God i wokem olgeta samting, hem i hae moa long olgeta. Yes, hem i King blong heven mo wol. Mo tu, Jeova ‘God i no stamba blong fasin ya we olgeta samting oli paspas, be hem i stamba blong pis.’ Yumi luksave samting ya, from we hem i mekem se ol enjel we oli pikinini blong hem, oli wok folem wan plan, oli no wok long fasin we i olbaot nomo.—1 Kor. 14:33; Aes. 6:1-3; Hib. 12:22, 23, NW.

2, 3. (a) ?Hu ya i faswan we Jeova i wokem? (b) ?Wanem posisen blong fasbon Pikinini ya mo Papa blong hem?

² Bifo we God i wokem ol samting long heven mo wol, hem i stap hem wan. Yumi no save kaontem ol yia we God i stap olsem. Faswan samting we hem i wokem, hemia wan enjel we nem blong hem “Tok.” Hem i kasem nem ya from we hem i man blong talemaot ol tok blong Jeova. Jeova i yusum Tok ya nao blong wokem olgeta samting. Biaen, Tok ya i kamdaon long wol. Hem i bon olsem wan man we i no gat sin, mo nem blong hem, Jisas Kraes.—Ridim Jon 1:1,a 2, 3, 14.

³ ?Baebol i talem se God i gat wanem posisen, mo fasbon Pikinini blong hem i gat wanem posisen? Tabu spirit i pulum aposol Pol blong raetem se: “I gat wan tok we mi wantem yufala i savegud mining blong hem. God, hem i hed blong Kraes, mo Kraes, hem i hed blong man, mo man, hem i hed blong woman blong hem.” (1 Kor. 11:3) Yes, Kraes i stap daon aninit long Papa blong hem, we i Hed blong hem. Blong mekem se i gat pis mo ol man oli wok folem plan, i mas gat samfala we oli hed, mo samfala we oli stap daon aninit long olgeta. Kraes tu, we ‘God i yusum hem blong mekem olgeta samting,’ hem i mas stap daon aninit long God we i hed blong hem.—Kol. 1:16.

4, 5. ?Wanem tingting blong Jisas long saed blong posisen blong hem mo Jeova?

⁴ ?Olsem wanem? ?Jisas i glad blong stap daon aninit long Jeova we i hed blong hem? ?Hem i glad blong kam long wol? Baebol i talem se: “Fastaem, bifo olgeta, bodi blong hem i olsem bodi blong God, be hem i no ting se hem i mas traem kam olsem we hem i sem mak wetem God, no gat. Hem nomo i lego ol samting blong laef ya, nao i kam olsem man blong wok nomo. Hem i bon long wol ya, i kam olsem man. Mo tu, hem i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long pos.”—Fil. 2:5-8, NW.

⁵ From we tingting blong Jisas i stap daon, oltaem hem i glad blong mekem samting we Papa blong hem i wantem. Hem i talem se: “Mi mi no save mekem wan samting nating long tingting blong mi nomo . . . taem mi jajem man, mi save mekem i stret, from we mi no traem mekem olsem we mi nomo mi wantem, mi stap traem mekem olsem we Papa blong mi we i sanem mi mi kam, hem i wantem.” (Jon 5:30) Bakegen hem i talem se: “Oltaem, mi stap mekem ol samting we [Papa blong mi] i wantem.” (Jon 8:29) Long en blong laef blong Jisas long wol, hem i prea long Papa blong hem, se: “Mi mi leftemap nem blong yu long wol ya, mo mi finisim ol wok ya we yu givim long mi blong mi mekem.” (Jon 17:4) I klia se, i no had long Jisas blong luksave God olsem hed blong hem, mo blong stap daon aninit long hem.

Pikinini i Stap Daon Aninit Long Papa, Nao Samting Ya i Mekem i Gud Long Hem

6. ?Wanem ol nambawan fasin we Jisas i soemaot?

⁶ Taem Jisas i stap long wol, hem i soemaot plante nambawan fasin. Wan long olgeta, hemia bigfala lav we hem i gat long Papa blong hem. Hem i talem se: “Mi lavem Papa blong mi.” (Jon 14:31) Jisas i lavem ol man tu. (Ridim Matiu 22:35-40.) Hem i kaen, i tingbaot narafala. Hem i no mekem i strong tumas long ol man mo bos long olgeta. Hem i talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Mat. 11:28-30) Olgeta man we oli gat fasin olsem sipsip, nomata se oli yangfala no olfala, oli harem gud tumas long ol nambawan fasin blong Jisas, mo long ol tok blong hem we i leftemap tingting blong olgeta. Olgeta we oli harem gud moa, hemia olgeta we ol narafala man oli spolem olgeta.

7, 8. ?Loa i talem wanem long saed blong woman we sik blong woman i stap long hem? ?Be Jisas i mekem wanem long hem?

⁷ Tingbaot olsem wanem Jisas i mekem long ol woman. Long olgeta yia we oli pas, plante man oli mekem i nogud tumas long ol woman. Samfala we oli mekem olsem, hemia ol lida blong skul blong ol man Isrel long taem bifo. Be Jisas i respektem ol woman. Yumi luk samting ya klia nomo, long fasin we hem i mekem long wan woman we sik blong woman i stap long hem 12 yia. “Oltaem [woman ya] i stap harem nogud tumas.” Hem i pas long plante dokta, mo i spenem ol mane blong hem blong traem faenem rod blong kamgud. “Be sik ya i no godaon nating i stap kam mowas.” Folem ol tok blong Loa, woman ya i doti long fes blong God. Mo man we i tajem hem, hem tu bambae i kam doti.—Lev. 15:19, 25.

⁸ Taem woman ya i harem nius se Jisas i stap mekem ol sikman oli kamgud bakegen, hem i go stanap wetem hip man we oli raonem Jisas. Woman ya i stap tingting se: “Sipos mi save tajem klos blong hem nomo, bambae sik blong mi i finis ya.” Ale hem i tajem klos blong Jisas, nao wantaem nomo sik blong hem i finis. Jisas i save se i no stret we woman ya i tajem klos blong hem. Be Jisas i no tok strong long hem. Defren olgeta, hem i tok kaen long hem. Hem i kasem save long filing blong woman ya, we i stap harem nogud plante yia from sik ya. Jisas i luksave se woman ya i nidim help tumas, hem i no moa save rod. Wetem bigfala sore, Jisas i talem long hem se: “Dota blong mi. Bilif blong yu i mekem yu yu gud bakegen. Yu go, yu no moa wari bakegen. Sik blong yu i finis nao.”—Mak 5:25-34.

9. ?Taem ol disaepol blong Jisas oli traem blokem ol pikinini blong oli no kam long hem, Jisas i mekem wanem?

⁹ Ol pikinini tu oli no fraet long Jisas. Wan taem, sam man oli tekem ol pikinini blong olgeta oli kam long Jisas. Be ol disaepol oli tok long ol man ya blong blokem olgeta. Ating oli gat tingting se Jisas i no wantem westem taem blong hem long ol pikinini. Be Jisas i no gat tingting olsem. Baebol i talem se: “Taem Jisas i luk samting ya, hem i tok strong, i talem long [ol disaepol blong hem] se, ‘!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man we God i King blong olgeta.’” Nao “hem i putum han blong hem i goraon long ol pikinini ya, mo i putum han blong hem long olgeta, i blesem olgeta.” Jisas i no fosem hem wan blong mekem i gud long ol pikinini ya, nogat. Hem i laekem tumas ol pikinini, mo hem i wantem se oli kam long hem.—Mak 10:13-16.

10. ?Olsem wanem Jisas i lanem ol gudfala fasin we hem i soemaot?

¹⁰ ?Olsem wanem Jisas i lanem ol gudfala fasin we hem i soemaot long ol man long wol? Long plante plante yia we hem i stap wetem Papa blong hem long heven bifo we i kam long wol, hem i wajem mo lanem ol fasin blong Papa blong hem. (Ridim Ol Proveb 8:22, 23, 30.) Long heven, hem i luk olsem wanem Jeova i hed long evri samting we hem i wokem, mo i lavem olgeta, nao hem i folem fasin ya. ?Yu ting se Jisas i save mekem olsem sipos hem i no glad blong stap daon aninit long Papa blong hem? Nogat. Hem i glad tumas blong obei long Papa blong hem. Mo Jeova i harem gud tumas blong gat wan Pikinini olsem. Taem Jisas i stap long wol, hem i soemaot gud ol nambawan fasin blong Papa blong hem we i stap long heven. !I wan bigfala ona blong yumi putum yumi i stap daon aninit long Kraes, we God i jusumaot hem blong rul long Kingdom blong heven!

Folem Ol Fasin Blong Kraes

11. (a) ?Yumi mas wok had blong folem fasin blong hu? (b) ?From wanem ol man long kongregesen oli mas traehad blong folem fasin blong Jisas?

¹¹ I impoten tumas we olgeta long Kristin kongregesen, antap moa ol man, oli wok had oltaem blong folem ol fasin blong Kraes. Olsem yumi luk finis, Baebol i talem se: “Kraes, hem i hed blong man.” Kraes i folem fasin blong trufala God we i Hed blong hem. Ale ol Kristin man oli mas traehad blong folem fasin blong Kraes, we i hed blong olgeta. Taem Pol i kam wan Kristin, hem i mekem olsem. Hem i talem long ol narafala Kristin se: “Yufala i mas folem fasin blong mi, olsem we mi mi stap folem fasin blong Kraes.” (1 Kor. 11:1) Aposol Pita tu i talem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) I gat wan narafala risen tu from wanem ol man oli mas lesin gud long advaes ya blong folem Kraes. Ol man nao oli kam elda mo man blong givhan. Ol Kristin man oli mas glad blong folem Kraes mo ol fasin blong hem, olsem we Jisas i glad blong folem fasin blong Jeova.

12, 13. ?Ol elda oli mas mekem olsem wanem long ol sipsip we God i putum long han blong olgeta?

¹² Ol elda long Kristin kongregesen oli mas lanem blong kam olsem Kraes. Pita i talem long ol elda se: “Yufala i mas lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. Yufala i mas lukaot gud long olgeta, we tingting blong yufala i glad blong mekem, olsem we God i wantem. I nogud yufala i mekem blong kasem pei . . . Yufala i mas mekem from we yufala i glad long hem. Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala, blong oli save folem, olsem we ol sipsip oli folem man blong lukaot long olgeta.” (1 Pita 5:1-3) Ol Kristin elda oli no mas gat strong fasin mo mekem bigfala bos long ol narafala. Oli mas folem eksampol blong Kraes mo traehad blong soemaot lav, tingbaot nid blong narafala, gat tingting daon, mo oli mas kaen long ol sipsip we God i putum long han blong olgeta.

¹³ Olgeta we oli lidim ol wok long kongregesen, oli sinman, mo oli neva mas fogetem samting ya. (Rom 3:23) Taswe oli mas wantem tumas blong kasem save moa long Jisas mo folem fasin blong hem blong lavem ol man. Oli mas tingting dip long fasin we God mo Kraes tufala i mekem long ol man, mo traehad blong mekem sem mak. Pita i talem se: “Yufala i mas mekem tingting blong yufala i stap daon. . . . God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.”—1 Pita 5:5.

14. ?Olsem wanem ol elda oli mas ona long ol narafala?

¹⁴ Ol man we God i putumap blong lukaot long ol sipsip blong hem long kongregesen, oli mas gat ol nambawan fasin. Rom 12:10 i talem se: “Yufala i mas lavlavem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.” Ol elda mo ol man blong givhan oli mas ona long ol narafala. Olsem ol narafala Kristin, ‘i nogud wan [elda no man blong givhan] i tok flas, no i mekem wan samting blong leftemap hem nomo. Hem i mas mekem tingting blong hem i stap daon, mo i mas luk ol narafala man olsem we oli gud moa long hem.’ (Fil. 2:3) Yes, ol man we oli lidim ol wok long kongregesen oli mas luk ol narafala olsem we oli gud moa long olgeta. Sipos oli mekem olsem, bambae oli folem advaes blong Pol se: ‘Yumi ya we yumi strong, yumi mas givhan gud long olgeta we i no strong. I no stret blong yumi folem ol fasin we yumi nomo i wantem. Yumi mas tingbaot ol fasin we ol Kristin brata mo sista blong yumi oli wantem, nao yumi mas mekem i gud long olgeta, blong mekem olgeta oli strong moa, from we Kraes i no folem ol fasin we hem nomo i wantem.’—Rom 15:1-3.

‘Ona Long Ol Woman Blong Olgeta’

15. ?Ol man oli mas mekem olsem wanem long ol woman blong olgeta?

¹⁵ Naoia bambae yumi tingbaot advaes we Pita i givim long ol man we oli mared. Hem i raetem se: “Yufala ol man we i mared, yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala.” (1 Pita 3:7) Taem yu ona long wan man, yu tinghae long hem. Taswe, yu lesin long ol tingting blong hem, yu tingbaot ol samting we hem i nidim mo wantem, mo maet yu folem tingting blong hem tu, sipos i no gat wan impoten risen we i mekem se i no stret blong folem. Hemia nao fasin we ol man oli mas mekem long ol woman blong olgeta.

16. ?Wanem woning we Tok blong God i givim long ol man long saed blong fasin blong ona long woman blong olgeta?

¹⁶ Taem Pita i talem long ol man se oli mas ona long ol woman blong olgeta, hem i ademap wan woning, se: “Yufala i mas mekem olsem blong bambae i no gat samting we i save blokem ol prea blong yufala.” (1 Pita 3:7) Ol tok ya oli soemaot klia se, long tingting blong Jeova, i impoten tumas we man i mekem i gud long woman blong hem. Sipos man i no ona long woman blong hem, samting ya i save blokem ol prea blong hem. Mo tu, taem ol man oli ona long woman blong olgeta, ol woman oli harem gud mo oli glad blong wok gud wetem ol man blong olgeta.

17. ?Lav we man i gat long woman blong hem i mas bigwan olsem wanem?

¹⁷ Tok blong God i givim advaes long ol man long saed blong fasin blong lavem ol woman blong olgeta, i se: “Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo. . . . I no gat man we i wantem spolem bodi blong hem. Man i stap kakae gud blong mekem bodi blong hem i strong, mo i stap lukaot gud long bodi blong hem, olsem we Kraes i stap lukaot gud long jos [“kongregesen,” NW] . . . Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo.” (Efes. 5:28, 29, 33) ?Lav we man i gat long woman blong hem i mas bigwan olsem wanem? Pol i raetem se: “Yufala ol man we i mared, yufala i mas lavem ol woman blong yufala, olsem we Kraes i lavem jos [“kongregesen,” NW] ya. Taswe hem i letem laef blong hem, blong sevem jos [kongregesen] ya.” (Efes. 5:25) Yes, wan man i mas rere blong lego laef blong hem from woman blong hem, olsem we Kraes i ded blong sevem ol man. Taem wan Kristin man i kaen long woman blong hem, i tingbaot hem, i lesin long hem, mo i tingbaot woman blong hem fastaem long hem wan, i moa isi long woman blong stap daon aninit long man ya we i hed blong hem.

18. ?Wanem i save givhan long ol man blong mekemgud wok blong olgeta insaed long mared?

¹⁸ ?Olsem wanem? ?I strong tumas long ol man blong oli ona long ol woman blong olgeta olsem? !Nogat! Jeova i no save askem long olgeta blong oli mekem samting we oli no naf blong mekem. Antap long hemia, ol man we oli wosipim Jeova oli save kasem wan strong paoa blong givhan long olgeta. Paoa ya we i strong moa i bitim ol narafala paoa long heven mo wol, hemia tabu spirit blong God. Jisas i talem se: ‘Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim tabu spirit long ol man we oli askem long hem.’ (Luk 11:13) Taem ol man oli prea, oli save askem long Jeova blong givim tabu spirit long olgeta, blong halpem olgeta blong mekem ol gudfala fasin long ol narafala, hemia long ol woman blong olgeta tu.—Ridim Ol Wok 5:32.

19. ?Bambae yumi tokbaot wanem long nekis stadi?

¹⁹ Tru ya, ol man oli gat wan bigfala wok blong mekem, hemia blong lanem olsem wanem blong stap daon aninit long Kraes, mo blong hed long woman blong olgeta olsem Kraes i hed blong kongregesen. ?Be olsem wanem long ol woman, antap moa, olgeta we oli mared? Nekis stadi bambae i tokbaot stret tingting we oli mas gat long wok we Jeova i givim long olgeta, folem plan we hem i stanemap.

Ol Woman, ?From Wanem Yufala i Mas Stap Daon Aninit Long Ol Man Blong Yufala?

“Man, hem i hed blong woman blong hem.”—1 KOR. 11:3.

1, 2. (a) ?Aposol Pol i raetem wanem long saed blong plan ya blong Jeova se samfala oli hed blong ol narafala? (b) ?Wanem sam kwestin we bambae yumi tokbaot long stadi ya?

JEOVA i stanemap plan ya we aposol Pol i tokbaot taem hem i raetem se, “Kraes, hem i hed blong man,” mo “God, hem i hed blong Kraes.” (1 Kor. 11:3) Stadi we yumi mekem las wik i soemaot se, long tingting blong Jisas, i wan bigfala ona blong stap daon aninit long Hed blong hem, Jeova God, mo hem i kasem glad from. Stadi ya i soemaot tu se Kraes i hed blong ol Kristin man. Kraes hem i kaen long ol man, i tingbaot olgeta, i gat sore, mo i mekem i gud long olgeta fastaem, bifo we i mekem i gud long hem wan. Ol man long kongregesen oli mas mekem ol fasin ya long ol narafala, antap moa, long ol woman blong olgeta.

² ?Be olsem wanem long ol woman? ?Hu i hed blong olgeta? Pol i raetem se: “Man, hem i hed blong woman blong hem.” ?Wanem tingting we ol woman oli mas gat long saed blong tok ya we i kamaot long God? ?Ol woman oli mas folem tok ya taem man blong olgeta i no bilif long trutok? ?Taem woman i stap daon aninit long man blong hem we i hed blong famle, hem i no gat raet blong toktok? ?Taem tufala i mas mekem wan desisen, hem i no save talemaot tingting blong hem? ?Wanem i save pulum ol man blong leftemap nem blong wan woman?

‘Mi Mekem Wan Fren Blong Hem, Blong i Givhan Long Hem’

3, 4. ?From wanem plan ya se man i hed blong woman, i mekem i gud long mared blong tufala?

³ Jeova God nao i stanemap plan ya se man i hed blong famle. Taem hem i wokem Adam, hem i talem se: “I nogud we man ya i stap hem wan. I moa gud mi mekem wan fren blong hem we i olsem hem, blong i givhan long hem.” Taem God i wokem Iv, Adam i harem gud tumas blong gat wan fren we i save givhan long hem. Hem i talem se: “Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi.” (Jen. 2:18-24) Adam mo Iv tufala i gat nambawan janis ya blong kam papa mo mama blong olgeta man long wol. Olgeta man ya bambae oli stret gud olgeta, mo oli save laef olwe long paradaes long wol, we oli glad oltaem nomo.

⁴ Be faswan papa mama ya blong yumi, tufala i mekem stronghed. Ale ol man mo woman oli no moa mekem wok blong olgeta long fasin we i stret gud, folem plan ya we God i stanemap. (Ridim Rom 5:12.) Nating se i olsem, tingting blong God i no jenis, man i hed yet blong woman blong hem. Taem tufala i folem gud plan ya, hemia i mekem i gud long mared blong tufala, mo tufala i glad. Bambae tufala i gat sem filing olsem Jisas, taem hem i stap daon aninit long Jeova, we i Hed blong hem. Bifo we Jisas i kam long wol, ‘oltaem nomo, hem i harem gud blong stap wetem [Jeova].’ (Prov. 8:30) From we ol man mo woman tede oli sinman, ol man oli no naf blong hed long ol woman blong olgeta long fasin we i stret gud. Mo ol woman oli no naf blong stap daon aninit long man blong olgeta long fasin we i stret gud. Be taem ol man mo woman oli traem mekem bes blong olgeta blong folem plan ya, hemia i save mekem olgeta oli glad fulwan, long mared blong olgeta naoia.

5. ?From wanem ol man mo woman we oli mared oli mas folem advaes long Rom 12:10?

⁵ Blong gat wan gudfala mared, i impoten tumas we ol man mo woman oli folem advaes ya we Baebol i givim long ol Kristin, se: “Yufala i mas lavlavem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.” (Rom 12:10) Antap long hemia, man mo woman tugeta, tufala i mas wok had blong ‘kaen gud long tufala. Mo tufala i mas fofogivim tufala.’—Efes. 4:32.

Wan Long Tufala i No Bilif Long Trutok

6, 7. ?Wanem i save kamaot sipos wan Kristin woman i stap daon aninit long man blong hem we i no bilif long trutok?

⁶ ?Olsem wanem sipos wan long tufala i no mekem wok blong Jeova? Plante taem, man nao i no bilif long trutok. ?Sipos i olsem, woman blong hem i mas mekem olsem wanem long hem? Baebol i ansarem kwestin ya, i se: “Yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.”—1 Pita 3:1, 2.

⁷ Tok blong God i talem se woman i mas stap daon aninit long man blong hem, nating se man ya i no bilif long trutok. Gudfala fasin blong woman i save pulum man blong hem blong tingbaot se, wanem nao i stamba blong ol gudfala fasin blong woman blong hem. Ale, maet man ya i wantem save moa long saed blong Kristin bilif blong woman blong hem. Sloslo maet hem tu i bilif long trutok.

8, 9. ?Kristin woman i save mekem wanem sipos gudfala fasin blong hem i no pulum man blong hem?

⁸ ?Be olsem wanem sipos gudfala fasin blong woman i no pulum man blong hem blong jenisim tingting blong hem? Baebol i talem se ol woman we oli bilif long trutok oli mas soemaot ol Kristin fasin oltaem long ol man blong olgeta, nomata sipos i had long olgeta blong mekem olsem. Yumi ridim long 1 Korin 13:4 se: “Man we i stap lavem man, tingting blong hem i longfala.” Ale i gud se oltaem tingting blong Kristin woman ‘i stap daon, mo i kwaet woman. Tingting blong hem i mas longfala,’ mo i mas lavem man blong hem we i no bilif long trutok. (Efes. 4:2) Paoa we God i givim, tabu spirit, i save mekem se woman i naf blong holem ol gudfala Kristin fasin taem man blong hem i no mekem i gud long hem.

⁹ Pol i raetem se: “Mi mi naf blong mekem evri samting long paoa blong Hemia we i stap givim paoa long mi.” (Fil. 4:13, NW) Spirit blong God i mekem se wan long tufala we i Kristin, hem i naf blong mekem plante samting we hem i no naf blong mekem long prapa paoa blong hem. Tingbaot: Taem wan long tufala i mekem i nogud long narawan, i isi nomo blong narawan i givimbak. Be Baebol i talem long ol Kristin se: “Sipos wan man i mekem i nogud long yufala, bambae yufala i no givimbak fasin ya long hem. . . . Baebol i talem se, ‘Hae God i talem se, “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.”’” (Rom 12:17-19) Fas Tesalonaeka 5:15 i givim advaes we i klosap sem mak, i se: “Sipos wan man i mekem i no stret long wan long yufala, yufala i mas lukaot gud blong bambae yufala i no go givimbak fasin we i no stret long man ya. Yufala i mas traehad oltaem blong mekem i gud long yufala mo long ol narafala man tu.” Taem tabu spirit blong Jeova i givhan long yumi, yumi naf blong mekem samting we i bigwan moa i bitim prapa paoa blong yumi. !Taswe, i gud we yumi prea from tabu spirit blong God, blong i givhan long yumi blong mekem samting we yumi no naf blong mekem long prapa paoa blong yumi!

10. ?Jisas i mekem wanem, taem samfala oli tok nogud no mekem samting we i nogud long hem?

¹⁰ Jisas i givim nambawan eksampol, taem samfala oli tok nogud no mekem samting we i nogud long hem. Fas Pita 2:23 i talem se: “Taem ol man oli tok nogud long hem, hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta. Hem i putum tingting blong hem i stap strong long God, we i stap jajem ol man long stret fasin.” Baebol i talem se yumi mas folem fasin blong hem. Yumi no mas kam kros from nogud fasin blong narafala. Advaes i go long olgeta Kristin se oli ‘mas gat sore, mo tingting blong olgeta i mas stap daon. Sipos man i mekem i nogud long olgeta, oli no mas givimbak long hem. Taem man i tok nogud long olgeta, oli no mas tok nogud long hem bakegen.’—1 Pita 3:8, 9.

?Woman i No Gat Raet Blong Toktok?

11. ?Wanem bigfala ona we sam Kristin woman oli kasem?

¹¹ ?Taem woman i stap daon aninit long man blong hem we i hed, hem i no gat raet blong toktok? ?Hem i no save talem tingting blong hem long saed blong famle mo ol narafala samting? I no olsem nating. Jeova i givim plante nambawan blesing long ol man mo ol woman tu. !Tingbaot bigfala ona we ol 144,000 man mo woman oli gat blong stap olsem ol king mo pris wetem Kraes long heven, taem hem i rul antap long wol! Yes, sam woman tu oli stap long grup ya. (Gal. 3:26-29) I klia se, folem plan we Jeova i putumap, ol woman tu oli gat wok blong mekem.

12, 13. ?Olsem wanem yumi save se sam woman long taem bifo oli talemaot profet tok?

¹² Long taem blong Baebol, sam woman oli talemaot profet tok. Joel 2:28, 29 i talem se: ‘Mi bambae mi givim spirit blong mi long olgeta man. Ol pikinini blong yufala, ol boe mo ol gel, bambae oli save talemaot ol tok we mi bambae mi givim long olgeta. Nating we ol boe blong wok mo ol gel blong wok nomo, be long taem ya, mi bambae mi givim spirit blong mi long olgeta.’

¹³ Long yia 33 K.T., long dei blong lafet blong Pentekos, samwe long 120 disaepol blong Jisas oli joen wanples, long wan rum antap long wan haos long Jerusalem. Sam long olgeta oli ol woman. God i givim tabu spirit blong hem long olgeta evriwan. Taswe, Pita i save yusum tok blong profet Joel, mo i soemaot se tok ya i stret long ol man mo woman tugeta, i se: ‘Profet Joel i talem se, “God i talem se, ‘Long taem ya [blong ol las dei], mi bambae mi givim spirit blong mi long olgeta man. Ol pikinini blong yufala, ol boe mo ol gel, bambae oli save talemaot ol tok we mi bambae mi givim long olgeta. Nating we ol boe mo ol gel blong wok nomo, be long taem ya, mi bambae mi givim spirit blong mi long olgeta, nao bambae oli save talemaot ol tok we mi bambae mi givim long olgeta.’”’—Wok 2:16-18.

14. ?Olsem wanem ol woman long taem bifo oli givhan blong mekem Kristin bilif i kasem plante moa man?

¹⁴ Long faswan handred yia, ol woman oli givhan bigwan blong mekem se Kristin bilif i kasem plante moa man. Oli talemaot Kingdom blong God long ol narafala, mo oli mekem plante narafala samting we i joen wetem wok blong prij. (Luk 8:1-3) Aposol Pol i tokbaot Fibi se hem ‘i stap givhan long wok blong kongregesen long Kengkria.’ Mo taem Pol i sanem halo i go long sam Kristin, hem i talem nem blong sam woman we oli stap holemstrong long God, olsem “tufala woman ya, Trifaena mo Trifosa, we tufala i stap mekem wok blong Masta blong yumi.” Mo tu, hem i tokbaot ‘woman ya Perisis, we i wan gudfala fren blong hem. Woman ya i wok had tumas long wok blong Masta.’—Rom 16:1, 12.

15. ?Olsem wanem ol woman long taem blong yumi oli givhan blong mekem Kristin bilif i kasem plante moa man?

¹⁵ Long taem blong yumi, bighaf blong ol seven milian man blong talemaot gud nius blong Kingdom blong God long olgeta ples blong wol, oli ol woman, we sam long olgeta oli yangfala mo samfala oli olfala. (Mat. 24:14, NW) Plante long olgeta oli prij fultaem, oli wok olsem misinari, no oli wok long Betel. Deved, we i raetem plante Sam, i singsing se: “God i Masta blong yumi, mo hem i givim tok blong hem, nao plante woman oli kam talemaot nius.” (Sam 68:11) !Ol tok ya i tru we i tru! Jeova i glad tumas long wok we ol woman oli mekem blong talemaot gud nius, mo ol narafala samting we oli mekem tu blong givhan long stamba tingting blong hem. Taswe, tok ya blong Jeova se ol Kristin woman oli mas stap daon aninit long ol man blong olgeta, i no min se oli no gat raet blong toktok.

Tu Woman We Tufala i No Fraet Blong Toktok

16, 17. ?Olsem wanem samting we Sera i mekem i soemaot se ol woman oli gat raet blong toktok insaed long famle?

¹⁶ Yes, Jeova i givim janis long ol woman blong mekem plante gudfala wok. Taswe, taem i gat wan bigfala desisen blong mekem long famle, ?yu ting se i stret we ol man oli toktok wetem ol woman blong olgeta? Oli waes sipos oli mekem olsem. Baebol i tokbaot sam woman we oli toktok no tekem aksen, nating se ol man blong olgeta oli no askem tingting blong olgeta. Tingbaot tufala stori ya.

¹⁷ Sera i stap talem long man blong hem Ebraham, se hem i mas sanemaot nambatu woman blong hem wetem pikinini boe blong tufala, from we boe ya mo mama blong hem tufala i no gat respek. Be “tok ya i mekem Ebraham i harem nogud tumas.” Nating se i olsem, Jeova i agri long samting we Sera i talem. Jeova i talem long Ebraham se: “Yu no harem nogud from pikinini ya blong yu wetem woman slef ya. Yu mekem olsem we woman blong yu i talem.” (Jen. 21:8-12) Ale Ebraham i obei long Jeova. Hem i lesin long Sera, mo i mekem samting we Sera i talem.

18. ?Abigel i mekem wanem samting, we i no askem long man blong hem fastaem?

¹⁸ Mo tu, i gat Abigel, woman blong Nabal. Taem Deved i stap ronwe long King Sol from we Sol i jalus long hem, hem i putum haos tapolen blong hem klosap long ples we ol sipsip mo nani blong Nabal oli stap long hem. Deved wetem ol man blong hem, oli no stilim wan samting blong rijman ya Nabal. Defren olgeta, oli stap gad long ol samting blong hem, blong lukaot gud long olgeta. Be Nabal “i wan had man, mo i man blong kros kwiktaem tu.” Ale “hem i sakem ol rabis tok” i go long ol man blong Deved. Nabal i wan man we “i no save mekem wan gudfala samting. !Nem blong hem i min se ‘Hafmad,’ mo fasin blong hem i stret gud long nem ya!” Ol man blong Deved oli askem gud long Nabal blong givim smol kakae long olgeta, be hem i no wantem. ?Taem Abigel i kasem save long samting we i hapen, hem i mekem wanem? Hem i no talem wan samting long Nabal, be hem “i hareap, i tekem tu handred bred, mo tu botel waen we botel ya oli wokem long skin blong nani, mo faef sipsip wetem twanti kilo bale we oli rusum finis, mo wan handred bandel grep wetem tu handred pasel frut blong figtri we oli sandrae.” Ale hem i go givim ol samting ya long Deved mo ol man blong hem. ?Olsem wanem? ?Abigel i mekem i stret? Ol samting we i kamaot biaen oli soemaot se hem i mekem i stret. Baebol i talem se: “Hae God i kilim [Nabal] i ded.” Samtaem biaen, Abigel i kam woman blong Deved.—1 Sam. 25:3, 14-19, 23-25, 38-42.

‘Olgeta Man Oli Stap Leftemap Nem Blong Woman Ya’

19, 20. ?Wanem bigfala samting we i save mekem se ol man oli leftemap nem blong wan woman?

¹⁹ Baebol i talem ol gudfala toktok long saed blong woman we i mekem ol samting long fasin we Jeova i glad long hem. Buk blong Ol Proveb i toktok gud long saed blong ‘woman we i save wokem evri samting,’ i se: “Praes blong woman olsem i antap we i antap, i winim praes blong ol flas ston ya perel. Woman olsem, man blong hem i stap putum tingting blong hem i stap strong long hem. Mo from we hem i mekem olsem, oltaem hem i no save sot long wan samting. Oltaem woman olsem i stap mekem i gud tumas long man blong hem, mo i no save mekem wan samting samtaem blong spolem hem.” Mo tu, woman olsem “i save toktok gud long ol man, mo ol tok blong hem i waes. Oltaem nomo hem i stap bisi, mo i stap lukaot gud long ol pikinini blong hem. Oltaem, ol pikinini blong hem oli stap soemaot we oli glad tumas long hem, mo man blong hem tu i stap talemaot long hem we i glad tumas long hem.”—Prov. 31:10-12, 26-28.

²⁰ ?Wanem bigfala samting we i save mekem se ol man oli leftemap nem blong wan woman? Ol Proveb 31:30 i talem se: “Gudfala fasin blong woman i save trikim man isi nomo, mo fes we i naes i no save stap longtaem. Be woman we i stap ona long Hae God, i stret blong olgeta man evriwan oli stap leftemap nem blong hem.” Wan samting we woman i mas mekem blong ona long Jeova, se hem i mas glad blong stap daon aninit long man blong hem we i hed, folem plan we Jeova i putumap. Yes, “man, hem i hed blong woman blong hem,” olsem we “Kraes, hem i hed blong man” mo “God, hem i hed blong Kraes.”—1 Kor. 11:3.

Tinghae Long Presen We God i Givim

21, 22. (a) ?Wanem sam risen we ol Kristin man mo woman oli gat blong talem tangkiu long God from presen ya blong mared we hem i givim long olgeta? (b) ?From wanem yumi mas respektem plan we Jeova i putumap long saed blong olgeta we oli hed blong yumi? (Lukluk bokis long pej 21.)

²¹ !Ol Kristin man mo woman we oli mared oli gat plante risen blong talem tangkiu long God! Oli save spenem evri dei blong laef blong olgeta tugeta, long wan hapi mared. Oli save glad bigwan long gudfala presen ya blong mared we God i givim long olgeta. Mared i mekem se man mo woman i gat janis blong joenem laef blong tufala, mo fren gud wetem Jeova long evri haf blong laef blong tufala. (Rut 1:9; Maeka 6:8) Jeova, we hem i Stamba blong fasin blong mared, hem i save gud wanem we ol man mo woman oli mas mekem blong gat wan hapi mared. Yufala i mas mekem evri samting long fasin we Jeova i glad long hem. Nao ‘hem bambae i stap mekem yufala i glad, mo fasin ya bambae i stap mekem yufala i strong,’ nating se yumi stap long wan wol we i fulap long trabol.—Neh. 8:10.

²² Kristin man we i lavem woman blong hem mo i mekem i gud long hem olsem we i mekem long hem wan, bambae i tingbaot woman blong hem, mo bambae i hed long woman blong hem long fasin we i kaen. Bambae i isi blong hem i lavem woman blong hem we i obei long God, from we woman ya i givhan gud long hem mo i gat bigfala respek long hem. Samting we i impoten moa, hemia se gudfala mared blong tufala bambae i givim ona long God blong yumi, Jeova, we i stret nomo blong yumi presem hem.