MAN WE SPIRIT BLONG GOD I LIDIM

3. ?Baebol i talem wanem long saed blong man we i gat tingting blong man nomo mo man we spirit blong God i lidim?

³ Aposol Pol i eksplenem se “man we spirit blong God i lidim,” i defren long “man we i gat tingting blong man nomo.” (Ridim 1 Korin 2:14-16.) Man we i gat tingting blong man, “i no akseptem ol samting we oli kamaot long spirit blong God, from we hem i luk ol samting ya se oli krangke nomo. Mo bambae hem i neva save olgeta.” Be man we spirit blong God i lidim hem, “i lukluk gud long evri samting” mo i gat “tingting blong Kraes.” Hemia i min se hem i traehad oltaem blong tingting olsem Kraes. Pol i talem se yumi mas man we spirit blong God i lidim. ?Olsem wanem man we spirit blong God i lidim, i defren long man we i gat tingting blong man nomo?

6. ?Man we spirit blong God i lidim hem, i olsem wanem?

⁶ ?Be wan man we spirit blong God i lidim, i olsem wanem? Hem i tingbaot oltaem blong fren gud wetem Jehova, mo i traehad blong folem fasin blong hem. (Efesas 5:1) Hem i kasem save tingting blong Jehova, mo i traehad blong tingting olsem hem. Hem i bilif strong se God i stap. Hem i defren long man we i gat tingting blong man, from we hem i folem ol rul blong God oltaem. (Ol Sam 119:33; 143:10) Hem i no mekem “ol wok we oli kamaot long tingting blong man nomo,” be i traehad blong mekem ‘ol gudfala fasin we oli kamaot long tabu spirit.’ (Galesia 5:22, 23) Wan bisnes man i tingbaot bisnes oltaem. Long sem fasin, wan man we spirit blong God i lidim, hem i tingbaot wosip blong God oltaem.

7. ?Baebol i talem wanem long saed blong man we spirit blong God i lidim?

⁷ Jisas i talem se man we spirit blong God i lidim hem, i glad. Matiu 5:3 i talem se: “Olgeta we oli haremsave se oli nidim God long laef blong olgeta, oli glad from we Kingdom blong heven i blong olgeta.” Rom 8:6 i soemaot se blong kasem laef, yumi mas gat tingting blong Jehova, i se: “Sipos tingting blong man i stap oltaem long samting we bodi nomo i wantem, bambae hem i ded. Be sipos tingting blong man i stap oltaem long samting we spirit i wantem, bambae hem i laef mo i gat pis.” Taswe, sipos yumi letem spirit blong God i lidim yumi, bambae yumi gat pis wetem God, pis long tingting, mo yumi gat hop blong kasem laef olwe.