• Lanem Samting Long Yangfala Brata Blong Jisas
    Wajtaoa (Stadi)—2022 | Jenuware

    • GAT TINGTING DAON OLSEM JEMES

      Taem Jisas i laef bakegen, hem i kamtru long Jemes we i stap mekem wok blong kapenta.

      Jemes i gat tingting daon taem Jisas i kamtru long hem, mo stat long taem ya hem i kam wan gudfala disaepol blong Kraes (Haf 5-7)

      5. ?Jemes i mekem wanem taem Jisas i laef bakegen mo i kamtru long hem?

      5 ?Wetaem Jemes i kam wan disaepol blong Jisas? Afta we Jisas i laef bakegen, “hem i kamtru long Jemes, mo biaen bakegen long olgeta aposol.” (1 Kor. 15:7) Afta we Jisas i mitim Jemes, hem i kam wan disaepol blong hem. Mo Jemes i stap tu wetem ol narafala aposol long Jerusalem long wan rum antap, taem oli stap wet blong kasem tabu spirit. (Wok 1:13, 14) Biaen, Jemes i kasem nambawan blesing ya blong stap olsem wan memba blong hed kampani. (Wok 15:6, 13-22; Gal. 2:9) Mo samtaem bifo long yia 62 K.T., tabu spirit i pulum hem blong raetem wan leta i go long ol tabu Kristin. Leta ya i stret yet long yumi tede, nomata se yumi blong laef long heven o long wol. (Jem. 1:1) Folem tok blong Josephus we i man blong raetem histri, Jemes i ded folem oda blong Hae Pris Ananaeas we i boe blong Anas. Jemes i holemstrong long Jehova kasem we hem i ded.