Nating se ol disaepol we oli gat strong bilif oli kasem ol trabol olsem, oli stanap strong. Wetem strong bilif long God, oli save talem olsem Pol i bin talem: “Neva tingting blong mifala i kam nogud long ol trabol we i kasem mifala. Maet bodi blong mifala i stap kam nogud moa oltaem, be nating. Evri dei, God i stap mekem tingting blong mifala i nyuwan bakegen.” ?Be, wanem samting i mekem tingting blong olgeta i nyuwan bakegen evri dei? Pol i gohed se: “Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya blong God long heven, we i no save finis samtaem. Nao mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk. From we ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.”​—2 Korin 4:​16-18.

!Luk Ol Trabol Naoia Olsem We i Blong Smoltaem Nomo!

Evri dei, yumi mas luk ol samting we yumi no laekem blong luk. Taem yumi lukluk long glas, yumi luk klia ol mak mo ol poen long prapa bodi blong yumi, we oli soemaot se yumi no stretgud olgeta. Taem yumi yusum Tok blong God olsem wan glas blong lukluk, yumi luk ol mastik mo ol trabol long saed blong speret long yumi mo long ol narafala man. (Jemes 1:​22-25) Mo taem yumi luk long nyuspepa mo televisin evri dei, ol store blong kruked fasin, raf fasin, mo ol bigfala trabol we oli stap kasem ol man, oli stikim hat blong yumi mo mekem yumi harem nogud.

Setan i wantem se tingting blong yumi i foldaon from ol samting we yumi luk, no yumi tingting tumas long olgeta ya mekem se bilif blong yumi i kam slak. ?Olsem wanem yumi save blokem samting ya? Yumi mas folem eksampel blong Jisas Kraes, olsem aposol Pita i talem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Jisas i givim eksampel we i stretgud, long olgeta fasin blong Kristin laef.

Taem Pita i tokbaot Jisas olsem eksampel blong yumi, hem i talem se Jisas i harem nogud long bodi blong hem. Yes, Jisas i safa bigwan taem hem i stap long wol ya. Olsem “nambawan man blong wok” blong Jeova taem God i wokem man, hem i save stret ol samting we God i wantem long saed blong ol man. (Proveb 8:​30, 31) Be taem hem i stap long wol, hem i luk wetem prapa ae blong hem, ol samting we i kamaot long ol man from sin mo from we oli no obei long God. Evri dei hem i luk mo i fesem ol sin mo ol slak fasin blong ol man. Samting ya i mas traem hem bigwan.​—Matyu 9:36; Mak 6:34.

Antap long ol trabol blong ol narafala, Jisas i kasem ol prapa trabol blong hem. (Hibrus 5:​7, 8) Be from we hem i save lukluk long fasin we i stretgud olgeta long saed blong speret, hem i lukluk i go bitim ol trabol ya. Hem i lukluk long pei we bambae hem i kasem from fasin blong holemstrong long God, taem bambae hem i kasem gudfala laef ya long heven we i no save finis samtaem. Long taem ya we hem i stap olsem Mesaea King, bambae hem i gat jans blong karemaot ol trabol we oli mekem laef blong ol man i kam nogud, mo bambae hem i mekem evri samting i stretgud olgeta, olsem Jeova i wantem fastaem. Hem i stap lukluk i go nomo long ol blesing ya long fyuja we hem i no save luk wetem prapa ae blong hem. Samting ya i givhan long hem blong stap glad long wok blong God, nating se hem i luk plante trabol evri dei. Biaen, Pol i raetem se: ‘Hem i luksave we bambae i save haremgud, nao from samting ya, hem i no moa tingbaot se pos ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i king.’​—Hibrus 12:2.

Jisas i no letem ol hadtaem mo traem oli mekem tingting blong hem i foldaon, oli pulum hem i go long narafala rod, no oli mekem bilif blong hem i slak. Yumi ol disaepol blong hem, yumi mas folemgud nambawan eksampel ya blong hem.​—Matyu 16:24.