‘Yu No Mas Karem Yok Wetem Wan We i No Sem Mak Olsem Yu’

TRUFALA buluk we i stap long pija ya, tufala i gat bigfala paoa. From samting ya, i isi nomo blong tufala i pulum ol hevi samting. Be ?olsem wanem sipos wan dongki i tekem ples blong wan long tufala buluk ya? Wan dongki i smol moa long buluk, mo i no strong olsem buluk. Taswe, ating bambae hem i no wantem, mo maet hem i kikim ol wud we i stap joenem hem long narafala anamol we i no sem mak olsem hem. Ale, God i gat gudfala risen blong givim loa ya long Isrel, se: “Yu no mas joenem wan buluk mo wan dongki, blong tufala i pulum aean blong brekem graon.”​—Dutronome 22:10.

Aposol Pol i raetem sem samting long saed blong ol man. Hem i talem se: “Yu no mas karem yok wetem wan we i no gat bilif, from we hem i no sem mak olsem yu.” (2 Korin 6:​14, NW) I moa impoten blong tingbaot advaes ya taem yumi jusum wan hasban no waef. Mared i wan fasin joen we i mas stap blong olwe, taswe Jisas Kraes i talem se: “From we God i joenem tufala olsem, man i mas no brekemaot tufala bakegen.” (Matyu 19:6) Fulap trabol long filing i kamaot taem hasban mo waef tufala i no gat sem skul, tufala i no folem sem rul, mo tufala i no gat sem plan long saed blong fyuja. From samting ya, i stret nomo blong folem advaes blong Baebol blong mared nomo long ‘hemia we i man blong Masta.’ (1 Korin 7:39) Sipos yu mared wetem wan man we skul blong hem i defren, bambae i mas gat trabol i kamaot. Ating trabol ya i bigfala moa bitim we man i joenem buluk mo dongki blong tufala i karem wan yok.

Taem tufala i gat defren skul, hemia i wan nomo long olgeta trabol we i save mekem se wan man mo woman tufala i no joengud blong karem sem yok. Man mo woman we tufala i tingting blong mared​—nating se tufala i gat sem skul nomo​—i gud we tufala i askem se, ‘?Mitufala i gat sem plan long saed blong fyuja? ?Bambae mitufala i stap laef weples? ?Weswan long mitufala bambae i holem ol mane blong pem ol samting? ?Bambae mitufala evriwan i wok? ?Bambae mitufala i gat pikinini? ?Kaen fasin mo fasin blong tingbaot narafala, bambae oli stap olsem bigfala samting long mared blong mitufala?’

Fasin we tufala i soem taem tufala i stap tokbaot ol kwestin ya, samtaem i save soemaot sipos bambae tufala i joengud blong karem sem yok, no no gat. I tru se, i no gat tu man long wol we oli gat sem tingting long evri samting. Be, sipos man mo woman we tufala i stap fren, tufala i save fesem mo stretem ol trabol blong tufala, mo sipos tufala i save toktokgud tugeta long evri samting, ating bambae tufala i save karemgud yok blong tufala.