Maet yu save tingting dip long ol tok blong aposol Pol long 2 Korin 7:1 se: “Olgeta promes ya oli blong yumi. From samting ya, yumi mas mekem yumi klin. Yumi mas putumaot olgeta samting long bodi blong yumi mo long tingting blong yumi, we oli stap mekem yumi doti long fes blong God. Yumi mas traehad blong mekem fasin blong yumi i klin, i tabu, yumi blong God olgeta, from we yumi stap onagud long hem.” Traem kasem mining blong ol tok ya. Askem kwestin ya se, ‘?Wanem ya “olgeta promes ya” we Pol i stap tokbaot?’ Ol vas bifo long hemia oli talem se: “Hae God i talem se, ‘From samting ya, yufala i mas gowe long olgeta, yufala i mas stap yufala nomo, olgeta oli mas stap olgeta nomo. Yufala i no save go joen long ol samting ya we oli no klin, nao bambae mi mi glad blong tekem yufala. Mi bambae mi Papa blong yufala, mo yufala bambae i pikinini blong mi, ol boe mo gel blong mi.’ Hemia tok blong mi ya, we mi mi Hae God, mi gat olgeta paoa.”​—2 Korin 6:​17, 18.

!Naoia oda blong Pol se ‘yumi mas kam klin’ i gat moa paoa! Wan samting we i save pusum yumi bigwan blong kam klin, hemia promes blong God se bambae hem i ‘tekem yumi,’ minim se, bambae hem i lukaot mo keagud long yumi. Maet yu save askem se: ‘?Bambae mi mi glad blong gat wan strongfala fasin fren wetem God​—olsem wan pikinini boe no gel i gat wetem papa blong hem?’ ?Yu yu haremgud blong save se God ya we i gat lav mo waes i rere blong ‘tekem yu’ yu kam from we hem i laekem yu tumas? Sipos save ya i no gat paoa long yu, traem lukluk fasin blong wan gudfala papa taem hem i soemaot lav mo filing long ol pikinini blong hem. !Nao traem tingbaot sipos yu yu gat semfala fasin joengud ya wetem Jeova! Moa yu tingting dip long samting ya, moa bambae yu yu wantem blong frengud wetem hem.

Be makemgud samting ya: Blong kam kolosap long God, yumi mas no “go joen long ol samting ya we oli no klin.” Tingbaot se: ‘?Fasin blong smok, hem i wan long ol samting ya we “oli no klin,” we God i no laekem nating? ?Sipos mi folem fasin ya, bambae mi ‘kam doti,’ mo mi spolem helt blong mi? From we Jeova i wan God we i klin, i “tabu,” ?hem i save agri long mi sipos mi mekem mi wan i kam doti olsemia?’ (1 Pita 1:​15, 16) Makem tu se Pol i givim woning agensem fasin blong kam ‘doti long tingting blong yumi,’ hemia long ol samting we yumi stap tingbaot. Askem long yu wan se: ‘?Mi mi stap tingbaot doti fasin ya oltaem? ?Mi mi rere blong mekem eni samting jes blong haremgud long samting ya we mi mi wantem, nating se i save spolem helt blong mi, famle blong mi, mo gudnem we mi gat long fored blong God? ?Mi bin letem doti fasin ya blong smok i spolem laef blong mi gogo kasem wanem mak?’ !Nating se ol kwestin ya oli save mekem yu yu harem nogud, be maet oli givim strong tingting ya we yu yu nidim blong lego doti fasin ya!

Bifo we famle Lin i lanem trutok, oli planem 1,300 tri blong betel nat long graon blong olgeta. Bambae i tekem faef yia bifo we oli kasem mane from ol tri ya, be taem olgeta tri ya oli karem frut, famle Lin i save kasem 7,700,000 vatu evri yia from. Kolosap long taem blong karem kakae blong ol tri ya, tufala i mas mekem wan impoten disisen. Tufala i bin lanem long Baebol stadi blong tufala se ol Kristin oli mas putumaot ‘olgeta samting long bodi blong olgeta mo long tingting blong olgeta, we oli stap mekem olgeta oli doti long fes blong God.’ Hemia se, tufala i no mas mekem ol doti fasin no pulum ol narafala blong mekem ol doti fasin olsem smok tabak, tekem drag, mo kakae betel nat. (2 Korin 7:1) ?Bambae tufala i mekem wanem?

Tingting blong Masta Lin i stikim hem, mekem se hem i stopem stadi blong hem. Long semtaem, Misis Lin i salem betel nat blong ol olfala tri, nao i winim bitim 300,000 vatu from. Hemia i soemaot se oli save winim bigfala mane from ol narafala tri blong olgeta. Be, tingting blong Masta Lin i stikim hem yet.

Hem i traehad blong winim tingting ya, gogo wan dei hem i askem ol Wetnes long ples ya blong katemaot ol tri blong betel nat. Ol Wetnes oli eksplenem se disisen ya i blong hem. Hem i mas ‘karem prapa basket blong hem,’ mo katemaot ol tri ya hem wan. (Galesia 6:​4, 5) Oli pulum hem blong tingbaot promes long 1 Korin 10:13, we i talem se: “Ol samting ya we oli stap traem yufala, oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting bambae i traem yufala, we i strong tumas long yufala. Be stret long taem ya we samting olsem i traem yufala, God bambae i mekem rod blong yufala, blong yufala i winim samting ya.” Mo tu, ol Wetnes oli mekem hem i tingtinggud, oli talem se: “Sipos mifala i katemdaon ol tri blong yu, maet biaen yu yu sore from, mo yu talem se i fol blong mifala we yu lusum ol tri blong yu.” Wan moning, i no longtaem biaen, noes blong wan jenso i wekemap Misis Lin. !Hasban blong hem wetem ol pikinini blong tufala oli stap katemaot ol tri blong betel nat!

Masta Lin i faenemaot se Jeova i stap holem promes blong Hem. Hem i faenem wan wok we tingting blong hem i no jajem hem from, nao hem i stret blong kam wan man blong presem Jeova. Hem i tekem baptaes long wan seket asembli blong ol Wetnes blong Jeova long Epril 1996.