‘MEKEM PAOA WE I PUSUM TINGTING I KAM NIUWAN’

7. ?Olsem wanem yumi save jenisim tingting mo hat blong yumi?

⁷ ?I tru se yumi save jenisim tingting mo hat blong yumi? Yes. Baebol i talem se: “Yufala i mas gohed blong mekem se paoa we i stap pusum tingting blong yufala, i kam niuwan. Mo yufala i mas werem niufala fasin we God i wokem folem samting we hem i wantem. Fasin ya i joen wetem stret fasin mo fasin ya blong holemstrong oltaem.” (Efes. 4:23, 24) Yes, yumi save jenis fulwan, be i no isi blong mekem olsem. I no naf blong blokem ol nogud tingting mo fasin. Yumi mas ‘mekem paoa we i pusum tingting blong yumi i kam niuwan.’ Hemia i min se yumi mas jenisim ol samting we yumi laekem mo wantem, ol fasin blong yumi, mo tingting we i pulum yumi blong mekem samting. Taswe, yumi mas traehad oltaem.

8-9. Talem stori blong wan brata we i soemaot se yumi mas jenis fulwan.

⁸ Traem tingbaot wan brata we bifo hem i man blong faet, be taem hem i kasem trutok, hem i lego dring mo faet, nao i baptaes. Hemia i givim wan nambawan witnes long ol man ples blong hem. Be smoltaem afta we hem i baptaes, i gat wan samting i hapen we i traem hem bigwan. Wan naet, wan man we i drong i kam long haos blong hem, mo i wantem faetem hem. Fastaem brata i blokem tingting ya blong wantem faet. Be taem man ya i tok nogud long nem blong Jehova, brata ya i no moa save holemtaet kros blong hem. Ale, hem i go afsaed mo i faetem man ya. ?From wanem hem i mekem olsem? Stadi blong Baebol i givhan long hem blong i blokem tingting blong wantem faet, be hem i no jenisim yet paoa we i pusum tingting blong hem. Hemia i min se, hem i no jenisim hat mo tingting blong hem.

⁹ Be brata ya i gohed blong traehad. (Prov. 24:16) Ol elda oli givhan long hem, mo hem i gohed gud gogo hem i naf blong kam wan elda. Be long wan naet, afsaed long Haos Kingdom nomo, hem i fesem sem trabol we hem i bin fesem plante yia bifo. Wan man we i drong i wantem faetem wan elda. ?Brata ya i mekem wanem? Hem i no kam kros, be wetem tingting daon, hem i toktok gud long man ya blong mekem kros blong hem i godaon, mo i givhan long hem blong i gobak long haos. ?From wanem brata ya i no mekem sem mak olsem fastaem? From we hem i jenisim paoa we i pusum tingting blong hem. Hem i jenis fulwan long hat mo tingting blong hem, mo i kam wan man blong mekem pis, wan man we i gat tingting daon. !Hemia i leftemap nem blong Jehova bigwan!

10. ?Yumi mas mekem wanem blong jenis fulwan?

¹⁰ I tekem taem blong mekem ol jenis ya, mo yumi mas traehad. Maet yumi mas “wok had” blong plante yia. (2 Pita 1:5) I no naf nomo blong save trutok plante yia. Yumi mas traehad blong jenisim yumi fulwan. Bambae yumi tokbaot sam stamba samting we oli save givhan long yumi.

?OLSEM WANEM BLONG JENISIM PAOA WE I PUSUM TINGTING?

11. ?Olsem wanem prea i givhan long yumi blong jenisim paoa we i pusum tingting?

¹¹ Fas samting hemia prea. Yumi mas prea olsem man we i raetem Sam ya se: “God, plis yu mekem tingting blong mi i klin olgeta. Plis yu mekem we hat blong mi i kam niuwan bakegen, mo i stap strong long yu oltaem.” (Sam 51:10) I gud yumi luksave se yumi mas jenisim paoa we i pusum tingting blong yumi, mo yumi askem long Jehova blong i givhan long yumi. ?From wanem yumi save se Jehova bambae i givhan? Hemia from promes we hem i mekem long ol stronghed man Isrel long taem blong Esikel, i se: “Bambae mi mekem laef blong yufala i niuwan, mi givim narafala tingting long yufala, . . . mo mi givim gudfala tingting long yufala blong yufala i save obei long mi.” (Esik. 11:19) Jehova i glad blong givhan long ol man Isrel blong oli jenis, mo hem i glad blong givhan long yumi tu.

12-13. (1) Folem Ol Sam 119:59, ?yumi mas tingting dip long wanem? (2) ?Wanem ol kwestin we yumi save tingbaot?

¹² Seken impoten samting, se yumi mas tingting dip. Taem yumi ridim Baebol evri dei, yumi mas tekem taem blong tingting dip long ol tingting mo filing we yumi mas jenisim. (Ridim Ol Sam 119:59, NW;b Hib. 4:12; Jem. 1:25) Yumi mas luksave enikaen tingting o filing we i kamaot long wol. Yumi no mas giaman long yumi, be yumi mas luksave ol fasin blong yumi we oli no stret, mo wok had blong sakemaot olgeta.

¹³ Yumi wanwan i save tingting dip long ol kwestin ya: ‘Long hat blong mi, ?mi stap jalus long narafala?’ (1 Pita 2:1) ‘?Mi stap flas from ples we mi kamaot long hem, o from we mi skul gud, o mi gat mane?’ (Prov. 16:5) ‘?Mi stap lukluk daon long ol narafala we oli no gat plante samting olsem mi o oli kamaot long narafala laen?’ (Jem. 2:2-4) ‘?Mi laekem ol samting long wol blong Setan?’ (1 Jon 2:15-17) ‘?Mi laekem ol muvi mo pleplei, we oli soemaot ol doti fasin blong seks mo faet?’ (Sam 97:10; 101:3; Amos 5:15) Ansa blong ol kwestin ya bambae i soemaot ol samting we yu mas jenisim. Sipos yu brekemdaon ol tingting mo filing long hat blong yu we oli “olsem ol strongfala haos,” bambae yu mekem Papa blong yumi long heven i glad.—Sam 19:14.

14. ?From wanem i impoten blong jusum ol gudfala fren?

¹⁴ Namba tri impoten samting se yumi mas jusum ol gudfala fren. Maet yumi no luksave, be ol fren oli gat bigfala paoa long yumi. (Prov. 13:20) Ol fren we yumi joen wetem olgeta long wok mo skul, oli no save givhan long yumi blong gat ol tingting we God i glad long olgeta. Be ol gudfala fren, hemia olgeta we yumi faenem long ol miting blong yumi. Long ples ya, yumi kasem gudfala tingting we i pulum yumi blong ‘lavem ol narafala, mo mekem ol gudfala wok.’—Hib. 10:24, 25, futnot.