-
?God i Agri Long Olgeta Lafet?!Enjoem Laef Olwe!—Baebol Kos
-
-
Ridim Efesas 5:10, mo tokbaot ol kwestin ya:
?Sipos yumi wantem joen long wan lafet, yumi mas faenemaot wanem fastaem?
?Wanem ol impoten holide long ples blong yu?
?Yu ting se Jehova i glad long ol holide ya?
Eksampol, ?yu ting se God i agri long lafet blong betde? Baebol i neva tokbaot ol man blong Jehova se oli mekem lafet blong betde, be hem i tokbaot tu lafet blong betde blong ol man we oli no wosipim Hem. Ridim Jenesis 40:20-22 mo Matiu 14:6-10. Biaen, tokbaot ol kwestin ya:
?Wanem samting i hapen long tufala lafet blong betde ya?
Folem ol samting we oli hapen long ol stori ya, ?yu ting se Jehova i harem olsem wanem long saed blong betde?
Maet yu stap tingting yet se, ‘?Jehova i rili kea sipos mi joen long lafet blong betde o wan narafala lafet we i no stanap long Baebol?’ Ridim Eksodas 32:1-8. Biaen plei VIDEO mo tokbaot ol kwestin ya.
?From wanem yumi mas sua long samting we Jehova i agri long hem?
?Olsem wanem blong sua long samting ya?
?Olsem wanem blong save sipos God i agri long wan lafet?
?Lafet ya i stanap long Baebol? Blong faenemaot, jekem histri blong hem.
?Lafet ya i givim ona long wan man, oganaesesen, o kantri? Yumi givim ona long Jehova nomo mo yumi trastem se hem bambae i winim ol problem blong wol.
?Ol kastom mo ol fasin we i kamaot long lafet ya, oli agensem ol rul blong Baebol? Fasin blong yumi i mas stap klin oltaem.
-
-
Jusum Ol Entatenmen We Jehova i Glad Long Hem!Enjoem Laef Olwe!—Baebol Kos
-
-
LESEN 53
Jusum Ol Entatenmen We Jehova i Glad Long Hem
Jehova i wan “hapi God.” (1 Timoti 1:11) Hem i wantem se yumi hapi mo enjoem laef. Hem i glad taem yumi tekem taem blong spel. Long lesen ya, bambae yumi luk olsem wanem yumi save yusum ol fri taem blong yumi blong spel mo haremgud, mo stil mekem Jehova i glad.
1. ?Yumi mas tingbaot wanem taem yumi stap jusum ol entatenmen?
?Yu yu laekem blong mekem wanem taem yu rilaks? Sam man oli laekem spenem fri taem blong olgeta long haos mo ridim wan buk, lesin long miusik, wajem wan muvi o go long intenet. Sam oli laekem blong mekem sam samting wetem ol fren, olsem wokbaot long bus, swimswim, o plei sam spot. Nomata wanem samting we yumi jusum, yumi mas sua se “Masta i glad” long hem. (Efesas 5:10) I impoten blong save samting ya from we plante popiula entatenmen oli soemaot ol samting we Jehova i no laekem, olsem raf fasin, rabis fasin blong seks, o wok blong ol rabis spirit. (Ridim Ol Sam 11:5.) ?Wanem bambae i halpem yumi blong jusum gud ol entatenmen?
Sipos yumi jusum ol fren we oli lavem Jehova, bambae oli halpem yumi mo mekem yumi jusum gud ol entatenmen blong yumi. Olsem we yumi bin lanem long wan lesen finis se “man we i stap wokbaot wetem man we i waes, bambae hem i kam waes.” Be sipos yumi joen oltaem wetem ol man we oli no lavem ol rul blong God, bambae yumi “kasem trabol nomo.”—Ol Proveb 13:20.
2. ?From wanem i impoten blong kontrolem taem we yumi spenem long entatenmen?
Nating sipos samting we yumi jusum i stret, be yumi mas lukaot gud blong no spenem tumas taem long hem. Sipos no bambae yumi nogat taem blong mekem ol samting we oli moa impoten. Baebol i talem se yumi mas “yusum gud taem blong [yumi].”—Ridim Efesas 5:15, 16.
DIGIM MOA
Lanem olsem wanem blong jusum gud ol entatenmen blong yu.
3. No jusum ol entatenmen we oli nogud
?From wanem yumi mas jusum gud ol pleplei? Plei VIDEO, mo tokbaot ol kwestin ya.
?Olsem wanem ol spot blong ol man Rom i sem mak long sam pleplei we ol man oli stap mekem tede?
Long video ya, ?Danny i lanem wanem long saed blong ol entatenmen?
Ridim Rom 12:9, mo tokbaot kwestin ya:
?Olsem wanem vas ya i givhan blong jusum gud ol entatenmen?
?Wanem sam samting we Jehova i no laekem? Ridim Ol Proveb 6:16, 17 mo Galesia 5:19-21 mo askem sem kwestin we i stap, afta we yu ridim wanwan vas:
?Wanem ol fasin we vas ya i tokbaot we i stap long ol entatenmen blong tede?
Rod blong jusum gud ol entatenmen
Askem yu wan se:
?Wanem? ?I gat ol samting we Jehova i no laekem long entatenmen ya?
?Wetaem? ?Entatenmen ya i blokem mi blong mekem ol impoten samting?
?Hu? ?Entatenmen ya i pulum mi blong mi joen oltaem long ol man we oli no lavem Jehova?
I moa sef blong stap longwe long ol denja. From samting ya, yumi mas stap longwe long ol entatenmen we yumi ting se bambae oli spolem yumi
4. Yusum gud taem blong yu
Plei VIDEO, mo tokbaot kwestin ya.
Folem video ya, brata ya i no wajem wan nogud samting ?be fasin blong hem blong yusum fri taem, i afektem hem olsem wanem?
Ridim Filipae 1:10, mo tokbaot kwestin ya:
?Olsem wanem vas ya i givhan blong yusum gud taem blong yumi?
5. Jusum ol entatenmen we oli gud
I tru se Jehova i no laekem ol entatenmen we oli nogud, be i gat sam entatenmen we oli gud. Ridim Prija 8:15 mo Filipae 4:8, mo tokbaot kwestin ya:
?Wanem gudfala entatenmen we yu laekem mekem long fri taem blong yu?
Yu save haremgud long ol gudfala entatenmen mo ol samting we yu mekem blong spel
SAM MAN OLI SE: “I oraet nomo blong jusum ol entatenmen we i soem raf fasin, seks, o wok blong rabis spirit, bae oli no afektem mi.”
?Bambae yu talem wanem?
SAMARI
Jehova i wantem se yumi jusum mo enjoem ol entatenmen we oli gud.
Tingtingbak
?Ol Kristin oli mas blokem wanem kaen entatenmen?
?From wanem yumi mas lukaot long taem we yumi spenem long ol entatenmen?
?From wanem i gud blong jusum ol entatenmen we Jehova i laekem?
FAENEMAOT
Faenemaot se hu i gat raet blong jusum ol entatenmen blong yumi.
“?Ol Witnes Blong Jehova Oli Putum Tabu Long Sam Muvi, Mo Miusik, Mo Buk?” (Web atikol)
Makem olsem wanem yu save jusum gud ol pleplei mo ol samting we yu laekem blong mekem taem yu spel.
“?Pleplei We Yu Yu Jusum i Mekem i Gud Long Yu?” (Wajtaoa, 1 Oktoba 2011)
Long stori ya “I Even Overcame My Prejudice,” luk olsem wanem wan man i jenisim ol entatenmen blong hem.
Luk olsem wanem wan mama i mekem waes desisen blong no wajem stori we i soem wok blong ol rabis spirit.
Blokem Ol Pleplei We Oli Soem Wok Blong Ol Rabis Spirit (2:02)
-