Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • ijwbq haf 184
  • ?Baebol i Talem Wanem Long Saed Blong Mared?

I no gat video yet long haf ya.

Sori, i gat problem taem i stap lodem video ya.

  • ?Baebol i Talem Wanem Long Saed Blong Mared?
  • Ansa We Baebol i Givim
  • Ol Sabtaetol
  • Sem Samting
  • Ansa we Baebol i givim
  • ?Wanem ol rul blong God long saed blong mared?
  • ?Olsem wanem long fasin blong seraot mo divos?
  • ?Yumi mas rejistarem mared wetem gavman, blong God i glad long hem?
  • ?Baebol i tokbaot wanem wok blong ol hasban mo waef?
  • ?God i talem se ol mared man mo woman tede oli mas gat pikinini?
  • ?Olsem wanem Baebol i save givhan long mared blong mi?
  • ?Olsem Wanem Blong Gat Wan Gudfala Mared?
    Wajtaoa Stadi—2016
  • Rod Blong Mekem Se Mared i Stap Gud
    Wekap!—2012
  • Mekem Mared i Stanap Strong Mo i Hapi
    Wajtaoa i Talemaot Kingdom Blong Jehova—2015
  • Mekem Mared Blong Yu i Stanap Strong Blong Olwe
    Wajtaoa i Talemaot Kingdom Blong Jehova—1994
Luk Moa Samting
Ansa We Baebol i Givim
ijwbq haf 184
Wan kapol i harem gud blong dring ti tugeta long moning.

?Baebol i Talem Wanem Long Saed Blong Mared?

Ansa we Baebol i givim

Taem God i wokem fas man mo woman, hem i mekem se tufala i mared. Hem i stanemap mared olsem wan spesel samting blong mekem man mo woman i fasgud tugeta, olsem wan strong fandesen blong famle.—Jenesis 1:27, 28; 2:18.

God i wantem we ol mared man mo woman oli hapi. (Ol Proveb 5:18) Hem i putum sam loa long saed blong mared long Baebol, wetem sam gudfala advaes blong givhan long mared.

Long atikol ya

  • ?Wanem ol rul blong God long saed blong mared?

  • ?Olsem wanem long fasin blong seraot mo divos?

  • ?Yumi mas rejistarem mared wetem gavman, blong God i glad long hem?

  • ?Baebol i tokbaot wanem wok blong ol hasban mo waef?

  • ?God i talem se ol mared man mo woman tede oli mas gat pikinini?

  • ?Olsem wanem Baebol i save givhan long mared blong mi?

  • Sam vas blong Baebol long mared

?Wanem ol rul blong God long saed blong mared?

God i stanemap mared blong joenem wan man wetem wan woman. (Jenesis 2:24) God i no agri long fasin blong mared long plante man o woman wantaem, fasin blong homoseksuol, o man mo woman we i stap tugeta be i no mared. (1 Korin 6:9; 1 Tesalonaeka 4:3) Jisas i tijim ol man blong hem blong folem tingting we God i gat fastaem long mared.—Mak 10:6-8.

Long tingting blong God, mared i blong olwe. Taem wan man mo woman i mared, tufala i promes blong stap tugeta mo stap tru long tufala, blong ful laef blong tufala. God i wantem se tufala i holem promes ya.—Mak 10:9.

?Olsem wanem long fasin blong seraot mo divos?

Maet i gat sam taem we hasban mo waef i mas seraot blong smoltaem, olsem sipos wan long famle i kasem trabol, nao wan long tufala i mas travel i go blong givhan long hem. Be Baebol i no wantem se ol problem insaed long mared oli mekem tufala i seraot. Baebol i pulum tufala we i gat problem long mared, blong wok tugeta blong stretem.—1 Korin 7:10.

Baebol i talem se tufala i save divos from wan samting nomo, hemia adaltri. (Matiu 19:9) Taswe, sipos tufala i mekem desisen blong seraot o divos from wan narafala risen, folem Baebol tufala i no fri blong mared bakegen long narafala, o frenem narafala wetem tingting blong mared.—Matiu 5:32; 1 Korin 7:11.

?Yumi mas rejistarem mared wetem gavman, blong God i glad long hem?

God i wantem se ol Kristin oli obei long loa blong gavman long saed blong mared. (Taetas 3:1) Taem tufala i rejistarem mared blong tufala folem loa, tufala i soemaot respek long gavman, mo long loa blong God se mared i wan promes blong olwe.a

?Baebol i tokbaot wanem wok blong ol hasban mo waef?

  • Ol wok we tufala i serem. Hasban mo waef tufala i mas lavlavem mo respektem tufala. (Efesas 5:33) Wetem lav, tufala i mas givim samting we narawan i nidim long saed blong seks, mo tufala i no mas mekem wan samting blong spolem mared blong tufala. (1 Korin 7:3; Hibru 13:4) Sipos tufala i gat sam pikinini, tufala i serem wok ya blong tijim mo lukaot gud long olgeta.—Ol Proveb 6:20.

    Mama i givhan long smol gel blong hem blong mekem homwok, mo Papa i rerem kakae blong kukum.

    Baebol i no tokbaot ol smosmol wok we wanwan long tufala i mas mekem long haos o blong winim mane. Tufala i save mekem ol desisen ya tugeta, folem samting we i gud long famle.

  • Wok blong hasban. Baebol i talem se “hasban i hed blong waef blong hem.” (Efesas 5:23) Hem i hed long fasin ya we hem i lidim famle, mo i mekem ol desisen we oli gud long waef mo pikinini blong hem.

    Hasban mo waef i ridim Baebol tugeta long haos, mo tufala i dring wan kolwota.

    Hem i mas traehad blong lukaot gud long famle long saed blong bodi, filing, mo wosip. (1 Timoti 5:8) Hem i soemaot se hem i tinghae long ol gudfala fasin mo save blong waef blong hem, taem hem i lesin long tingting blong hem, mo i tingbaot filing blong hem long ol desisen we hem i mekem. (Ol Proveb 31:11, 28) Baebol i talem se hasban i mas mekem ol wok blong hem wetem lav.—Kolosi 3:19.

  • Wok blong waef. Baebol i talem se “waef i mas gat bigfala respek long hasban blong hem.” (Efesas 5:33) God i glad long waef we i respektem posisen we God i givim long hasban blong hem.

    Hasban mo waef i tokbaot mane we tufala i spenem.

    Wok blong waef i blong givhan long hasban blong hem, halpem hem blong mekem ol gudfala desisen, mo sapotem hem olsem hed blong famle. (Jenesis 2:18) Baebol i presem waef we i mekem gud ol impoten wok blong hem insaed long mared.—Ol Proveb 31:10.

?God i talem se ol mared man mo woman tede oli mas gat pikinini?

Nogat. Long taem bifo, God i talem long sam man blong hem se oli mas gat pikinini. (Jenesis 1:28; 9:1) Be oda ya i no blong ol Kristin. Jisas i neva talem long ol man blong hem se oli mas gat pikinini. Mo i no gat wan long ol disaepol blong Jisas tu, we i talem se ol mared man mo woman oli mas gat pikinini. Ol kapol oli save mekem desisen ya.

?Olsem wanem Baebol i save givhan long mared blong mi?

I gat ol gudfala advaes long Baebol we i save halpem ol kapol blong statem gud mared blong olgeta. Mo advaes ya i save givhan tu blong oli blokem o winim ol hadtaem.

Ol advaes blong Baebol i save halpem man mo woman we i mared blong . . .

  • soemaot trufala lav.—1 Korin 13:4-7; Kolosi 3:14.

  • stretem ol tingting we oli defdefren.—1 Korin 10:24.

  • lesin gud.—Jemes 1:19.

  • soemaot respek.—Rom 12:10.

  • fofogivim tufala.—1 Pita 4:8.

  • stap tru.—Mak 10:9.

  • gat longfala tingting.—Efesas 4:2, 3.

  • wok olsem wan tim.—Prija 4:9.

  • mekem tingting i strong moa blong stap tugeta olwe.—Sing Blong Solomon 8:7.

a Long saed blong tingting blong Baebol long ol kastom mared, yu luk Wajtaoa blong 1 Novemba 2006, pej 11, haf 12.

Sam vas blong Baebol long mared

Ol Proveb 18:22: “Man we i faenem wan gudfala waef, hem i faenem wan gudfala samting.”

Mining: Baebol i tokbaot mared olsem wan gudfala samting.

Malakae 2:15: “Yufala i no mas mekem i no stret long waef blong yufala we yufala i maredem taem yufala i yang.”

Mining: God i wantem se hasban mo waef i stap tru long tufala mo tufala i soemaot respek long tufala, nating se tufala i mared plante yia finis.

Mak 10:9: “Samting we God i joenem, man i no mas seraotem.”

Mining: God i wantem se tufala i fren gud tugeta blong olwe.

Hibru 13:4: “Evri man i mas tinghae long mared.”

Mining: Ol hasban mo waef oli mas tingbaot mared blong olgeta olsem wan sas samting, mo wok had blong lukaot gud long hem.

1 Korin 7:28: “Olgeta we oli mared, bambae oli kasem trabol long bodi blong olgeta.”

Mining: I no gat wan mared we i stret gud olgeta, taswe ol kapol oli mas wok tugeta blong winim ol hadtaem.

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem