Efesas 3:20—“[God] i Save Mekem Plante Moa Samting Antap Long Wanem We Yumi Askem o Tingbaot”

“From paoa we i stap wok insaed long yumi, God i save mekem plante moa samting i bitim olgeta samting we yumi askem no yumi tingbaot. Taswe . . . i gud yumi givim glori long hem.”—Efesas 3:20, 21, Baebol Long Niu Wol Translesen.

“Yumi givim glori long hem we i save mekem plante moa samting antap long wanem we yumi askem o tingbaot, folem paoa we i stap wok insaed long yumi.”—Efesas 3:20, 21, King James Version.

Mining blong Efesas 3:20

Aposol Pol i soemaot strong bilif we hem i gat, se God i save ansarem prea blong olgeta we oli wosipim hem, mo givim samting we oli ekspektem long ol rod we oli neva tingbaot. Maet ansa we hem i givim i moa long samting we oli ekspektem o tingbaot blong kasem.

“From paoa we i stap wok insaed long yumi, God i save mekem.” Jehova Goda i save givim paoa we yumi nidim, blong mekem samting we hem i wantem.—Filipae 4:13.

Long vas 20, aposol Pol i tokbaot samting we i spesel long saed blong Jehova, taem Hem i halpem olgeta we oli wosipim Hem. Wan buk i eksplenem tok ya “God i save mekem,” i se: “Tok ya i no minim nomo se i posibol blong God i mekem samting, be i stap makem paoa we hem i gat blong mekem.” Maet wan fren blong yumi i wantem halpem yumi, be hem i no gat paoa blong mekem olsem. Jehova i defren. Oltaem hem i gat paoa blong mekem eni samting we hem i mas mekem blong lukaot gud long olgeta we oli wosipim hem, mo blong ansarem prea blong olgeta. God nomo i gat olgeta paoa mo haenem.—Aesea 40:26.

“God i save mekem plante moa samting i bitim olgeta samting we yumi askem no yumi tingbaot.” Jehova i no stap givim plante samting nomo long olgeta we oli wosipim hem, be hem i givim “plante moa samting” antap bakegen. Hem i save halpem olgeta i bitim wanem we oli ting se i naf o i plante.

Tok ya “i bitim olgeta samting we yumi askem no yumi tingbaot,” i tijim yumi long wan narafala samting. Taem aposol Pol i raetem “bitim olgeta samting we yumi askem no yumi tingbaot,” hem i wantem we ol Kristin oli kasem save se God i save halpem olgeta long ol rod we oli neva ekspektem o tingbaot. Long Baebol ya New International Version, fas haf blong vas 20 i olsem: “Nao long hem we i naf blong mekem moa i bitim samting we yumi askem o tingbaot, mo i save givim samting we i bigwan tumas blong makem saes blong hem.” Samtaem, ol Kristin oli harem se ol problem blong olgeta oli bigwan tumas o laef blong olgeta i fasfas tumas we oli no save stretem. Maet oli no save wanem blong prea from. Be fasin blong Jehova blong kasem save mo halpem olgeta, i no gat mak blong hem. Long stret taem, bambae hem i stretem problem blong olgeta. Mo hem i save mekem samting ya long rod we oli neva tingbaot. (Job 42:2; Jeremaea 32:17) Go kasem taem ya, hem i givim paoa long olgeta blong stanap strong. !Antap long hemia, hem i mekem olgeta oli glad!—Jemes 1:2, 3.

Ol vas raonabaot long Efesas 3:20

Buk blong Efesas, hemia leta we aposol Pol i raetem long ol Kristin we oli stap long taon blong Efesas long Esia Maena, we tede i wan haf blong Teki. Long leta ya, Pol i raetemdaon ol tingting we oli stap long wan prea we hem i mekem from olgeta. (Efesas 3:14-21) Hem i prea se olgeta bambae oli traehad blong folem Jisas long tingting mo aksen blong olgeta, olsem nao, bambae oli kasem save long lav we Jisas i gat. I gud we olgeta Kristin oli traehad blong mekem olsem. Blong finisim prea ya, Pol i presem God mo i talem ol tok we i stap long Efesas 3:20, 21.

Wajem sot video ya blong luk wanem samting we buk blong Efesas i tokbaot.