“Pis Blong God i Bigfala Moa i Winim Olgeta Tingting”
LONG histri, ol man blong God oli pastru long wan taem we oli harem nogud longtaem tumas. Samting ya i tru tumas tede, from we yumi laef long “taem ya we bambae i raf bitim mak, i strong tumas long ol man.”! (2 Timote 3:1) Aposol Pol i advaesem Ol Kristin blong putum ol trabol blong olgeta long Jeova tru long prea. ?Wanem bambae i kamaot? “Nao pis blong God, we i bigfala moa, i winim olgeta tingting blong yumi, bambae i lukaotgud long hat mo tingting blong yufala, tru long Jisas Kraes.”—Filipae 4:7, NW.
?Wanem ya “pis blong God”? I wan fasin kwaet we i kamaot taem yumi kam kolosap moa long Man ya we i Wokem Olgeta Samting. Fasin fren ya i givim tras long yumi, nomata wanem trabol blong yumi, Jeova “bambae i no lego ol man blong hem; hem bambae i no gowe long ol man blong hem.”—Ol Sam 94:14, Today’s English Version.
Samting ya i no min se yumi no save harem nogud. Man blong raetem Ol Sam i se, “Man we i stret i save harem nogud long plante trabol.” (Ol Sam 34:9) Be pis blong God i save mekem man i harem gud. ?Olsem wanem?
Aposol Pol i raetem se pis blong God i “bigwan moa i winim olgeta tingting.”—no, Concordant Version i talem se i “bigwan moa long evri fasin blong tingting.” Trabol i save mekem yumi harem nogud bigwan long saed blong tingting. (Eklesiastis 7:7) Be, pis blong God i save mekem yumi harem gud, speseli taem yumi nidim “paoa ya we i bigfala tumas.”—2 Korin 4:7; 2 Timote 1:7.
Antap moa, pis blong God i wan proteksen. Olsem we Pol i raet i go long ol man Filipae, pis ya i save “gad long hat mo paoa blong tingting blong yu.” Grik tok we oli tanem i kam “gad” i wan tok blong ol ami we i olsem pija blong wan soldia we i stap gad long dei mo long naet. Long sem fasin, pis blong God i save wok olsem gad long hat mo paoa blong tingting blong yumi long 24 haoa.—1 Korin 10:13; skelem wetem Efesas 4:26.
Taem yumi tingbaot ol nogud traem we yumi kasem tede, ?i no pis blong God we yumi mas tangkyu from?—Ol Sam 18:2; skelem wetem Eksodas 40:38.