16, 17. (a) ?Olsem wanem Pol i kasem strong tingting blong mekem wok blong prij? (b)?Wanem ol samting we yumi mas mekem sipos yumi faenem se i gat sam haf blong Kristin wok blong prij we i mekem yumi fraet?

¹⁶ Pol i raet i go long ol Kristin blong Tesalonaeka i se: “Yufala i save we taem mifala i stap yet long Filipae, ol man oli mekem i nogud long mifala, mo oli tok nogud tumas long mifala tu. Be God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.” (1 Tesalonaeka 2:2) ?Olsem wanem “ol man oli mekem i nogud” long Pol wetem ol fren blong hem taem oli stap long Filipae? Sam man blong mekem dip stadi oli talem se Grik tok we Pol i yusum long ples ya i minim wan fasin blong daonem narafala, mekem hem i sem mo mekem i raf long hem. Ol haeman blong Filipae oli bin kilim olgeta ya wetem ol hud, oli sakem olgeta long kalabus, mo lokem han mo leg blong olgeta long wan hud we i olsem bigfala hankaf. (Ol Wok 16:​16-​24) ?Ol trabol ya oli mekem wanem long Pol? ?Ol man Tesalonaeka, we oli stap long nekis taon we Pol i visitim long misinari trep blong hem, oli luk se Pol i fraet nao i no moa wantem mekem wok blong God? No gat, hem i ‘mekem tingting blong hem i strong.’ Hem i winim fasin fraet mo i gohed blong prij wetem strong tingting.

¹⁷ ?Strong tingting blong Pol i kam long wea? ?Hem wan i kasem tingting ya? No gat. Hem i talem se tingting blong hem i kam strong from we ‘God i mekem tingting blong hem i strong.’ Wan buk we i givhan long ol man we oli tanem Baebol, i soemaot se i gat narafala rod blong talem tok ya, olsem se “God i tekemaot fraet long hat blong mifala.” Taswe, sipos i gat wan haf blong minista wok blong yu we yu no gat strong tingting blong mekem, no sipos i gat sam samting long saed blong wok ya we i mekem yu yu fraet lelebet, yu mas askem Jeova blong i givhan long yu. Askem hem blong tekemaot fasin fraet long hat blong yu. Askem hem blong halpem yu blong mekem tingting blong yu i strong blong wok. Mo tu, mekem sam samting we bambae oli save givhan long yu. Eksampel, mekem plan blong prij wetem wan we yu save se hem i gat gudhan long haf ya blong wok blong prij we yu yu faenem i had. Ating yu faenem i had blong prij long ol ofis, tekem jans blong prij long ol man long rod, no prij long telefon. Maet brata no sista ya i glad blong lidim yu long wok ya fastaem. Sipos i olsem, wajem gud olsem wanem hem i mekem wok ya mo lan long hem. Be biaen, yu mas mekem tingting blong yu i strong blong traem rod ya tu.

18. ?Wanem ol blesing we yumi save kasem sipos yumi mekem tingting blong yumi i strong blong prij?

¹⁸ Sipos yu mekem tingting blong yu i strong, tingbaot wanem frut bambae yu save kasem. Taem yu gohed oltaem mo yu no letem tingting blong yu i foldaon, bambae yu sua blong kasem ol gudfala ekspiryens from fasin ya blong serem trutok wetem narafala. Hemia ol ekspiryens we bambae yu no save kasem sipos yu no bin traehad fastaem. (Lukluk pej 25.) Bambae yu harem gud from we yu save se yu stap mekem Jeova i glad taem yu traehad blong mekem samting ya we i hadwok long yu. Bambae yu kasem ol blesing blong hem mo help blong hem blong winim fasin fraet blong yu. Bilif blong yu bambae i kam strong moa. Tru tumas, yu no save mekem bilif blong ol narafala i strong moa sipos yu no stap mekem bilif blong yu tu i kam strong.​—Jud 20, 21.

Oli Mekem Tingting Blong Olgeta i Strong

SAMTAEM i no isi blong mekem tingting i strong taem yumi prij. Aposol Pol tu, hem i talem se wan taem hem i mas mekem olsem “wetem bigfala fasin traehad.” (1 Tesalonaeka 2:2, NW) ‘Bigfala fasin traehad’ blong prij, ?i karem frut, no nogat? I no gat wan promes se bambae yumi kasem ol nambawan ekspiryens, be plante taem ol man blong God oli glad from we oli mekem tingting blong olgeta i strong. Tingbaot sam long ol eksampel ya.

Wan gel, we nem blong hem Tara, i gat eit yia nomo, mo hem i stap lesingud taem tija blong hem i tokbaot Seken Bigfala Faet Blong Wol. Tija ya i talem se ol man Jiu we oli bin stap long ol rabis kalabus, oli mas werem klos we i gat wan yala Sta Blong Deved long hem, blong makemaot olgeta long ol narafala presina. Tara i stap tingting nao sipos hem i gat raet blong talem sam toktok. Hem i tingtingbak long taem ya i se: “Mi no satem ae blong mi, be mi stap prea.” Ale, biaen Tara i leftemap han blong hem mo i talemaot se ol Witnes blong Jeova tu oli bin stap insaed long ol rabis kalabus ya, mo olgeta tu oli mas werem wan spesel klos. Klos blong olgeta i gat wan smol pis kaliko oli somap long hem we kala blong hem i pipol mo i gat trikona blong hem. Tija ya i intres long toktok blong Tara, mo hem i talem tangkiu long hem. Toktok blong Tara i openem rod blong hem i storeyan wetem tija bakegen long saed ya, mo biaen tija i soemaot wan kaset video long ful klas, nem blong kaset ya: Jehovah’s Witnesses Stand Firm Against Nazi Assault.

Long Guinea, Wes Afrika, i gat wan yangfala pablisa we i no baptaes yet, nem blong hem Irène. Hem i wantem mekem moa long minista wok blong hem. Ale, misinari we i stadi Baebol wetem hem, i leftemap tingting blong hem blong traem serem ol Wajtaoa mo Wekap! wetem ol narafala studen long skul. Irène i fraet lelebet, from we fastaem ol narafala studen oli no bin wantem. Be from we misinari ya i leftemap tingting blong hem, Irène i tekem disisen blong go luk wan long ol studen ya we i bin soem fasin agens moa i winim ol narawan. Irène i sapraes, from we gel ya i glad blong storeyan, mo i glad tu blong ridim sam magasin. Biaen, sam narafala studen tu oli tekem ol magasin. Irène i bin seremaot moa magasin long manis ya, i winim ful namba blong ol magasin we hem i bin seremaot long ol faef manis we oli pas.

Long Trinidad, wan elda i fraet lelebet blong go luk wan hedmasta blong soem olsem wanem Wekap! magasin i save givhan long saed blong edukesen. Nating se i olsem, hem i mekem tingting blong hem i strong. Elda ya i talem se: “Mi stap prea taem mi go insaed long yad blong skul ya. !Mi no save bilivim taem hedmasta i soem kaengud fasin long mi!” Hem i tekem Wekap! magasin we i tokbaot kwestin ya “?Wanem Hop Blong Ol Yangfala Tede?”, mo hem i agri blong yusum magasin ya blong tijim klas. Kam kasem naoia, hem i bin tekem 40 magasin we oli tokbaot ol defren samting.

Taem Vaughn i yangfala yet, oltaem hem i harem se i hadwok long hem blong prij. Hem i talem se: “Mi stap seksek, mi swet, mo mi stap tok spid​—mi no save slou.” Nating se i olsem, hem i kam wan fultaem paenia. Be hem i faenem i hadwok yet blong toktok long ol man long wok blong prij. Wan taem, afta we hem i spenem fuldei blong traem lukaotem wan wok blong winim mane, tingting blong hem i foldaon, nao hem i wantem prij long sam man we oli stap long tren wetem hem. Hem i se, long rod ya bambae “mi mekem wan gudfala samting i kamaot long dei ya we mi harem nogud.” Be hem i fraet lelebet long wan man klosap long hem, we i olsem se hem i wan impoten bisnesman. Ale, Vaughn i mekem tingting blong hem i strong blong toktok wetem wan narafala olfala man we i sidaon long narasaed blong hem. Tufala i storeyan longtaem. Nao bisnesman ya i talem se: “Yu yu yangfala nomo be yu gat plante gudfala kwestin.” Mo hem i askem se: “?Yu yu wan man blong stadi long teoloji?” Vaughn i ansa se: “No, mi wan Witnes blong Jeova.” Ale, bisnesman ya i smael mo i talem se: “A yes, mi kasemsave nao se yu olsem.”

Olgeta Witnes ya​—mo plante narawan we yumi no save kaontem​—oli glad we oli bin mekem tingting blong olgeta i strong blong prij. ?Bambae yu yu mekem olsem?