‘Taem Yu Smol Pikinini Yet, Kam Kasem Naoia, Yu Yu Savegud’

FOLEM ol nyufala save blong sayens, taem yumi toktok long ol smol pikinini, samting ya i gat bigfala paoa long bren blong olgeta, i tijim olgeta blong tingting, skelem ol samting, mo winim ol problem. Samting ya i tru moa long faswan yia blong laef blong bebi. Nyuspepa ya, International Herald Tribune, i talem se sam man blong stadi, oli bilif naoia se “namba blong ol wod we wan bebi i harem evri dei, hemia i save soemaot bitim ol narafala samting, sipos pikinini ya bambae i gat gudhed long fyuja, sipos bambae hem i kasem ol gudfala mak long skul, mo sipos bambae hem i joengud wetem ol narafala man.”

Be, ol wod ya oli mas kamaot long maot blong wan man. I luk olsem we televisen mo radyo, oli no save mekem semfala wok ya.

Wan sayentis we i stadi long ol neva long bodi blong man, long Yunivesiti blong Wasington long Siatel, Yunaeted Stet, i talem se: “Naoia, mifala i save se ol nev long bodi oli stat blong joen tugeta kwiktaem afta we bebi i bon, mo se bren blong bebi i stap wet nomo blong ol samting oli kamaot long laef blong hem, blong givhan long hem blong joenem ol nev ya. Mifala i no luksave bifo se wok ya i stat taem bebi i smol nomo. Eksampel, sam pikinini we oli gat sikis manis nomo, oli lanem finis ol saon blong prapa lanwis blong olgeta.”

Ol nyufala save ya i defren long tingting blong plante man we oli talem se, bebi bambae i gat gudhed mo save sipos hem i kasem plante lav nomo. Ol nyufala save ya i soem tu se papa mama i mekem wan wok we i impoten tumas, blong halpem bebi blong grugud.

Samting ya i mekem yumi tingbaot leta we tabu speret i pusum aposol Pol blong raetem long Timote, i se: ‘Taem yu smol pikinini yet, kam kasem naoia, yu yu savegud ol tok blong Baebol. Tok ya i save mekem yu yu waes, i save lidim yu long rod ya we God i stap yusum blong sevem man.’ Mama mo bubu woman blong Timote we tufala i gat strong bilif, tufala i tijim Timote long ol tok blong Baebol. Ating samting ya nao i mekem wan impoten wok blong halpem Timote blong kam wan nambawan man blong wok blong God.​—2 Timote 1:5; 3:15.

[Futnot]