“Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”—2 TIMOTI 3:16, 17.

!OL TOK ya blong aposol Pol oli gat bigfala paoa! !Hem i talem ol tok ya blong soemaot gudfala wok we Baebol i save mekem! I tru se, Pol i stap tokbaot haf blong Baebol we hem i gat long taem blong hem, hemia we samtaem ol man oli kolem se Oltesteman. Nating se i olsem, tok blong Pol i stret long olgeta 66 buk blong Baebol, i minim olgeta ya tu we ol man blong Jisas oli raetem long faswan handred yia.

?Olsem wanem long yu? ?Yu yu tinghae long Baebol olsem Pol? ?Yu ting se God i rili putum ol tok blong hem long tingting blong sam man, blong oli raetem long Baebol? Ol faswan Kristin oli bilif strong se hemia i tru. Mo nating se plante handred yia i pas, ol trufala Kristin oli gohed yet blong bilif strong long samting ya. Tingbaot man Inglan ya, John Wycliffe, we i laef long ol yia 15 handred. Long tingting blong man ya, Baebol i wan buk we i “neva mestem taem i soemaot rod we i stret.” Wan buk (The New Bible Dictionary) i tokbaot ol tok blong Pol long vas antap, mo i talem se from we God “i putum ol tok blong Baebol long tingting blong ol man, yumi save trastem se ol tok ya oli tru.”

?APOSOL POL i minim wanem taem hem i talem se olgeta tok blong Baebol oli “kamaot long God”? (2 Timoti 3:16) Pol i minim se God i yusum tabu spirit blong hem blong lidim ol man we oli raetem Baebol, blong oli raetem ol samting ya nomo we Hem i wantem olgeta blong raetem.