Antap long ol trabol blong ol narafala, Jisas i kasem ol prapa trabol blong hem. (Hibrus 5:​7, 8) Be from we hem i save lukluk long fasin we i stretgud olgeta long saed blong speret, hem i lukluk i go bitim ol trabol ya. Hem i lukluk long pei we bambae hem i kasem from fasin blong holemstrong long God, taem bambae hem i kasem gudfala laef ya long heven we i no save finis samtaem. Long taem ya we hem i stap olsem Mesaea King, bambae hem i gat jans blong karemaot ol trabol we oli mekem laef blong ol man i kam nogud, mo bambae hem i mekem evri samting i stretgud olgeta, olsem Jeova i wantem fastaem. Hem i stap lukluk i go nomo long ol blesing ya long fyuja we hem i no save luk wetem prapa ae blong hem. Samting ya i givhan long hem blong stap glad long wok blong God, nating se hem i luk plante trabol evri dei. Biaen, Pol i raetem se: ‘Hem i luksave we bambae i save haremgud, nao from samting ya, hem i no moa tingbaot se pos ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i king.’​—Hibrus 12:2.

Taem Pol i stap tokbaot samting we i mekem Jisas i naf blong stanap strong oltaem, hem i soemaot rod long yumi tu, i se: “Yumi mas mekem tingting blong yumi i strong, blong yumi resis long rod ya we i stap long fes blong yumi. Mo oltaem yumi mas stap luk long Jisas we fasin ya blong bilif blong yumi i stap kamaot long hem nomo.” (Hibrus 12:​1, 2) Yes, blong gohed long Kristin resis ya wetem glad, yumi mas lukluk i go bitim ol samting we oli stap stret fored long yumi naoia. ?Be olsem wanem yumi ‘stap luk oltaem’ long Jisas, mo olsem wanem fasin ya bambae i givhan long yumi?

Wan eksampel: Long 1914, Jisas i kam King long Kingdom blong God, mo naoia i stap rul long heven. Yumi no save luk olgeta samting ya wetem prapa ae blong yumi. Be, sipos yumi ‘stap luk oltaem’ long Jisas, ae blong yumi long saed blong speret bambae i givhan long yumi blong luksave se naoia hem i rere blong finisim ol rabis fasin blong wol ya, mo satem Setan mo ol rabis enjel blong hem long kalabus, we oli no moa save mekem wok blong olgeta. Taem yumi lukluk i go moa yet, ae blong yumi long saed blong speret i soem nambawan nyufala wol we “bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 19:​11-16; 20:​1-3; 21:4.

Taswe, bitim we ol trabol blong smoltaem we yumi kasem evri dei, oli kam hevi tumas long yumi, i gud we yumi lukluk i go nomo long ol samting we oli blong olwe. Wetem ae blong bilif, lukluk i go bitim ol sik mo fasin griri long doti wol ya. Lukluk i go long paradaes we i fulap long ol man we oli gat strong bodi, oli glad, mo oli tingbaot narafala. Lukluk i go bitim ol mak we oli spolem yumi long bodi mo long saed blong speret tu, mo lukluk taem we yumi fri long olgeta blong olwe from sas sakrifaes blong Kraes. Lukluk i go bitim ol dedbodi we oli stap from ol faet, fasin blong kilim man, mo raf fasin. Lukluk olgeta we oli laef bakegen we oli stap kasem tijing blong stap laef long pis mo folem ol stret fasin blong Jeova.

Antap long hemia, blong ‘luk Jisas oltaem,’ yumi mas putum ae blong yumi long saed blong speret i stap long ol samting we Kingdom, we yumi no save luk hem, i mekem finis long ol man blong God long wol: fasin joengud, pis, lav, filing olsem ol stret brata nomo, mo plante rij samting long saed blong speret. Wan Kristin woman long Jemani i lukluk video kaset ya United by Divine Teaching, nao hem i raetem se: “Video kaset ya i givhan long mi moa blong tingbaot se fulap Kristin brata mo sista raon long wol oli stap holemstrong long wok blong Jeova, stret long menet ya​—nating se plante man oli agensem olgeta. !Fasin blong yumi blong joengud olsem wan brata nomo, i sas tumas long wol ya we i fulap long raf fasin mo fasin blong no laekem narafala man!”

?Yu tu yu “luk” se Jeova, Jisas, ol gudfala enjel, mo plante milyan narafala Kristin, oli stap stanap kolosap long yu? Sipos yes, bambae yu no tingting tumas long ‘ol wari blong laef long wol ya’ we i save mekem tingting blong yu i foldaon, mo mekem se yu “no karem frut” long Kristin wok blong yu. (Matyu 13:22) Taswe, blong ‘luk Jisas oltaem,’ putum ae blong yu long saed blong speret i stap long Kingdom blong God we i stanap finis mo ol blesing blong hem naoia mo long fyuja.