-
?Baebol i Talem Wanem Long Saed Blong Seks?!Enjoem Laef Olwe!—Baebol Kos
-
-
LESEN 41
?Baebol i Talem Wanem Long Saed Blong Seks?
Plante man oli sem blong tokbaot seks. Be Baebol i no mekem olsem, hem i tokbaot seks long fasin we i klia mo i soem respek. Mo samting we hem i talem i givhan long yumi, from we Baebol i kam long Jehova we i Krieta blong yumi. Jehova i save samting we i gud long yumi. Taswe hem i talem samting we yumi save mekem blong hem i glad mo samting we bambae i givhan long yumi blong enjoem laef olwe.
1. ?Wanem tingting blong Jehova long saed blong seks?
Seks i wan presen we God i givim long ol man. Hem i wantem se man mo woman we tufala i mared i haremgud long seks. Presen ya i blong mekem kapol i gat ol pikinini mo tu i blong givhan long tufala blong soem lav blong tufala long fasin we i stret mo haremgud long hem. From samting ya, Baebol i talem se: “I gud yu harem gud long waef blong yu we yu mared wetem taem yu yangfala.” (Ol Proveb 5:18, 19) Jehova i ekspektem ol Kristin we oli mared blong oli mas stap tru long hasban o waef blong olgeta, olsem ya bambae oli no save mekem adaltri.—Ridim Hibru 13:4.
2. ?Eni kaen doti fasin blong seks hem i wanem?
Baebol i talem long yumi se: “olgeta we oli stap mekem enikaen doti fasin blong seks . . . bambae oli no kasem Kingdom blong God.” (1 Korin 6:9, 10) Ol man blong raetem Baebol we oli raet long lanwis Grik, oli yusum tok ya por·neiʹa blong tokbaot eni kaen doti fasin blong seks. Tok ya i minim (1) fasin blong mekem seksa bitwin ol man we oli no mared long olgeta, (2) homoseksuol, mo (3) fasin blong mekem seks wetem ol animol. Taem yumi no “mekem enikaen doti fasin blong seks, yumi mekem Jehova i glad, mo yumi mekem i gud long yumi wan.”—1 Tesalonaeka 4:3.
DIGIM MOA
Faenemaot olsem wanem blong blokem eni kaen doti fasin blong seks, mo olsem wanem samting ya bambae i givhan long yu blong stap klin.
3. Ronwe long doti fasin blong seks
Josef i traehad blong stap klin long fasin blong hem. Ridim Jenesis 39:1-12, mo tokbaot ol kwestin ya:
?Wanem i givhan long Josef blong i ronwe?—Luk vas 9.
?Yu ting se desisen blong Josef i stret? ?From wanem?
?Ol yangfala tede oli save mekem wanem blong ronwe long doti fasin blong seks, olsem Josef? Plei VIDEO.
Jehova i wantem se yumi evriwan i blokem doti fasin blong seks. Ridim 1 Korin 6:18, mo tokbaot ol kwestin ya:
?Wanem i save lidim wan man blong mekem doti fasin blong seks?
?Olsem wanem yu save ronwe long doti fasin ya?
4. Yu save blokem ol traem
?From wanem samtaem i had blong blokem ol traem long saed blong seks? Plei VIDEO, mo tokbaot kwestin ya.
Long video ya, taem brata i kasemsave se ol tingting mo ol aksen blong hem i save pulum hem blong i no stap tru long waef blong hem, ?hem i mekem wanem?
Samtaem ol trufala Kristin tu oli mas traehad blong gat tingting we i klin. ?Olsem wanem blong no tingting oltaem long ol doti fasin blong seks? Ridim Filipae 4:8, mo tokbaot ol kwestin ya:
?Yumi sud tingting oltaem long wanem samting?
?Olsem wanem fasin blong ridim Baebol mo bisi long wok blong Jehova, i save halpem yumi blong blokem ol traem?
5. Ol rul blong Jehova oli mekem i gud long yumi
Jehova i save samting we i gud long yumi. Taswe, hem i talem olsem wanem yumi save stap klin mo i talemaot ol blesing we yumi save kasem. Ridim Ol Proveb 7:7-27 o plei VIDEO, mo tokbaot ol kwestin ya.
?Yang man ya i mekem wanem blong pulum trabol i kam long hem?—Luk Ol Proveb 7:8, 9.
Folem Ol Proveb 7:23, 26, doti fasin blong seks i save givim bigfala problem. ?Wanem ol problem we yumi save blokem sipos yumi stap klin?
?Olsem wanem fasin blong stap klin i save halpem yumi blong enjoem laef olwe?
Sam man oli ting se samting we Baebol i talem long saed blong homoseksuol i no soem lav. Be Jehova i God blong lav, mo hem i wantem se evriwan i enjoem laef olwe. Blong kasem laef ya, yumi mas folem ol rul blong hem. Ridim 1 Korin 6:9-11, mo tokbaot kwestin ya:
?Yu ting se fasin blong homoseksuol nomo i no klin long fes blong God?
Blong mekem God i glad long yumi, yumi evriwan i mas jenisim fasin blong yumi. ?Yu ting se ol jenis ya bambae oli givhan long yu? Ridim Ol Sam 19:8, 11, mo tokbaot ol kwestin ya:
?Yu ting se ol rul blong Jehova oli strong tumas? ?From wanem yu ansa olsem?
Jehova i halpem plante man blong oli obei long ol rul blong hem. Hem i save halpem yu tu
SAM MAN OLI SE: “Sipos wan man mo woman i lavlavem tufala, i oraet nomo blong tufala i slip tugeta bifo mared.”
?Bambae yu talem wanem?
SAMARI
Seks i wan presen we Jehova i givim long wan hasban mo waef blong tufala i enjoem.
Tingtingbak
?Eni kaen doti fasin blong seks i minim wanem?
?Wanem i save halpem yumi blong no mekem eni kaen doti fasin blong seks?
?Wanem ol blesing we yumi save kasem taem yumi folem ol rul blong Jehova?
FAENEMAOT
Lanem from wanem God i wantem se wan man mo woman i mared bifo we tufala i laef tugeta.
“?Baebol i Talem Wanem Long Saed Blong Laef Tugeta Bifo Mared?” (Web atikol)
Lanem from wanem rul blong Baebol long saed blong homoseksuol i no pulum man blong agensem narafala.
Lanem olsem wanem loa blong God long saed blong seks i protektem yumi.
Long ekspiriens ya “They Treated Me With Dignity,” faenemaot wanem i pulum wan homoseksuol blong jenisim laef blong hem, mo mekem God i glad.
a Ol rabis fasin blong seks i minim tu, man mo woman i mekem seks, fasin blong yusum maot o as blong mekem seks, mo fasin blong pleplei wetem praevet pat blong narafala.
-
-
?Baebol i Talem Wanem Long Saed Blong Singel Mo Mared?!Enjoem Laef Olwe!—Baebol Kos
-
-
LESEN 42
?Baebol i Talem Wanem Long Saed Blong Singel Mo Mared?
Long sam kalja, ol man oli bilif se olgeta we oli no mared oli no save glad long laef. Be blong talem stret, i no evriwan we oli mared we oli stap glad, mo i no evriwan we oli singel we oli stap harem nogud. Baebol i talem se fasin blong stap singel mo mared oli olsem presen we i kam long Jehova.
1. ?Olgeta we oli singel oli kasem wanem blesing?
Baebol i talem se: “Man we i mared, hem i mekem i gud, be man we i no mared, hem i mekem i gud moa.” (Ridim 1 Korin 7:32, 33, 38.) ?Olsem wanem olgeta we oli singel oli “mekem i gud moa”? Ol Kristin we oli singel oli no nidim blong lukaot long wan hasban o waef. Taswe oli gat moa fridom. Eksampol, sam oli save mekem moa long minista wok, olsem go long narafala ples blong talemaot gud nius. Antap long hemia, oli save spenem moa taem blong kam klosap moa long Jehova.
2. ?Olgeta we oli mared folem loa oli kasem wanem blesing?
Mared i olsem fasin blong stap singel, hem i gat prapa blesing blong hem. Baebol i talem se “tu man i gud moa i bitim wan man nomo.” (Prija 4:9) Hemia i tru moa long ol Kristin we oli folem ol rul blong Baebol long mared blong olgeta. Ol kapol we oli mared folem loa blong gavman, oli mekem wan promes se bambae oltaem oli lavem, respektem mo kaen long tufala. From samting ya, plante taem oli harem se oli sef moa i bitim ol kapol we oli laef tugeta be oli no mared. Mo ol pikinini tu bambae oli harem se oli sef moa.
3. ?Wanem tingting blong Jehova long saed blong mared?
Taem Jehova i mekem faswan mared, hem i talem se: “Man bambae i aot long papa mo mama blong hem, mo bambae hem i go joen wetem waef blong hem.” (Jenesis 2:24) Jehova i wantem se hasban mo waef i lavlavem tufala mo joengud tugeta long ful laef blong tufala. Hem i letem tufala blong divos nomo, sipos wan long tufala i mekem adaltri. Long situesen olsem, Jehova i givim raet long wan we i no mekem sin blong i jus sipos hem i wantem divos o nogat.a (Matiu 19:9) Jehova i no agri we wan Kristin i gat plante waef o hasban.—1 Timoti 3:2.
DIGIM MOA
Lanem olsem wanem blong stap glad mo mekem Jehova i glad, nating se yu singel o mared.
4. Yusum gud presen ya blong stap singel
Jisas i luk fasin blong stap singel olsem wan presen. (Matiu 19:11, 12) Ridim Matiu 4:23, mo tokbaot kwestin ya:
?Olsem wanem Jisas i yusum presen ya blong stap singel blong mekem wok blong Papa blong hem mo halpem ol narafala?
Ol Kristin we oli singel oli save glad, taem oli yusum laef blong olgeta olsem we Jisas i mekem. Plei VIDEO, mo tokbaot kwestin ya.
?Ol Kristin we oli singel oli save yusum laef blong olgeta olsem wanem?
?Yu yu save?
Baebol i no talem stret yia we wan man o woman i mas gat blong i mared. Nating se i olsem, hem i enkarejem man blong i wet go kasem we i “pastru long yang taem blong hem.” Hemia taem we oli gat ol strong filing mo i had blong oli mekem ol gudfala desisen.—1 Korin 7:36.
5. Jusum gud patna blong yu
Desisen ya blong jusum patna blong yu hem i wan long ol impoten desisen long laef. Ridim Matiu 19:4-6, 9, mo tokbaot kwestin ya:
?From wanem wan Kristin i no mas hariap blong mared?
Baebol i save halpem yu blong luksave ol fasin blong wan gudfala patna. Be samting we i moa impoten, hemia blong faenem wan patna we i lavem Jehova.b Ridim 1 Korin 7:39 mo 2 Korin 6:14. Biaen, tokbaot ol kwestin ya:
?From wanem wan Kristin i mas mared nomo long wan man blong Masta?
?Jehova bambae i harem olsem wanem sipos yumi jusum blong mared long wan man we i no lavem Hem?
Sipos oli putum wan yok long tu defren animol blong oli wok wanples, bambae tufala i safa. Sem mak, Kristin we i mared long wan we i no bilif, bambae hem i gat plante problem
6. Gat tingting blong Jehova long saed blong mared
Long Isrel bifo, sam man oli tingbaot olgeta nomo nao oli divosem waef blong olgeta. Ridim Malakae 2:13, 14, 16, mo tokbaot kwestin ya:
?From wanem Jehova i no laekem nating divos we ol man oli mekem from ol risen we i no stanap long Baebol?
Adaltri mo divos i mekem patna we i nogat fol mo ol pikinini oli safa
Plei VIDEO, mo tokbaot kwestin ya.
Sipos yu mared long wan we i no bilif, ?yu save mekem wanem blong harem gud long mared blong yu?
7. Folem ol rul blong Jehova long saed blong mared
Maet wan man i nidim blong traehad blong folem ol rul blong Jehova long saed blong mared.c Jehova bambae i blesem olgeta we oli mekem olsem. Plei VIDEO.
Ridim Hibru 13:4, mo tokbaot ol kwestin ya:
?Yu ting se ol rul blong Jehova long saed blong mared oli strong tumas? ?From wanem yu talem olsem?
Plante kantri oli stap rejistarem ol mared mo divos folem loa blong olgeta, taswe Jehova i ekspektem ol Kristin blong oli mekem olsem. Ridim Taetas 3:1, mo tokbaot kwestin ya:
?Sipos yu mared, yu sua se mared blong yu i rejista folem loa?
MAET MAN I ASKEM SE: “?From wanem tufala ya we i stap tugeta i mas mared?”
?Bambae yu ansa olsem wanem?
SAMARI
Fasin blong stap singel mo mared i wan presen blong Jehova. Man we i singel o i mared, i save glad mo haremgud sipos hem i yusum laef blong hem blong mekem wil blong Jehova.
Tingtingbak
?Olsem wanem wan man o wan woman i save yusum gud taem ya we hem i singel?
?From wanem Baebol i talem se ol Kristin i mas mared nomo long wan man blong Masta?
Baebol i talem wan risen nomo blong divos, ?wanem risen ya?
FAENEMAOT
?I minim wanem blong mared nomo long “wan man blong Masta”?
Wajem tu sot video we oli save halpem yu blong mekem gudfala desisen long saed blong fren mo mared.
Luk from wanem wan brata i laekem moa samting we Jehova i givim long hem i bitim ol samting we hem i lego.
?Wanem sam samting we man i mas tingbaot bifo we hem i divos o seraot?
“Tinghae Long ‘Samting We God i Joenem’” (Wajtaoa, Disemba 2018)
b Long sam kalja, ol perens oli jusum hasban o waef blong pikinini blong olgeta. Sipos i olsem, ol perens oli no mas tingbaot mane o haenem, be oli mas tingbaot sipos man o woman ya i lavem Jehova o nogat.
c Sipos yu stap wetem wan we yutufala i no mared, desisen blong maredem hem o lego hem i blong yu nomo.
-