?Glas i Soemaot Wanem Samting?
TRAEM lukluk i go long wan glas. ?Yu luk wanem samting? Samtaem, taem yu lukluk long glas, yu luksave wan samting we i rong long bodi no fes blong yu, nao yu glad blong stretem samting ya bifo we sam narafala man oli luk.
Baebol hem i olsem wan glas. Hem i save halpem yumi blong luksave klia se yumi rili olsem wanem. Samting ya i save mekem se yumi no ting se yumi impoten bitim mak—no yumi no impoten nating—long ae blong God. (Matyu 10:29-31; Rom 12:3) Antap long hemia, Baebol i save soemaot long yumi sam rong long ol toktok, wok, no fasin blong yumi, we yumi nidim blong stretem. Taem samting ya i hapen, ?bambae yu fogetem ol samting we glas ya i soemaot long yu?
Jemes, wan man blong raetem Baebol, i talem se: “Man we i stap lesin long tok ya be i no stap mekem ol samting we tok ya i talem, hem i olsem man we i stap lukluk fes blong hem long glas. Hem i stap lukluk fes blong hem, be taem hem i gowe, wantaem nomo hem i no moa save tingbaot we fes blong hem i olsem wanem.”—Jemes 1:23, 24.
Long defren fasin, Jemes i tokbaot wan narafala man, we i ‘stap luklukgud long loa ya we i stret olgeta mo i save mekem man i fri, ale i stap tingbaot hem oltaem, hem i no save fogetem ol samting blong loa ya.’ (Jemes 1:25) Grik wod we oli tanem i kam “luklukgud” i minim blong kam kolosap long saed, no blong bendaon long fored blong lukluk. Theological Dictionary of the New Testament i talem se: “Tok ya i no minim fasin blong lukluk kwik nomo.” Wod ya i givim tingting se wan man i stap traehad blong faenem wan samting we i haed. Wan man blong eksplenem mining blong Baebol, R. V. G. Tasker, i talem se: “I gat wan impoten samting we man ya we i stap luklukgud i wantem luksave, nating se i hadwok long hem blong luksave mo kasem mining kwiktaem nomo.”
?Bambae yu yu luklukgud long yu wan tru long Tok blong God we i olsem wan glas? Mo biaen, ?bambae yu yu stretem yu wan olsem i gat nid? Jemes i gohed se: ‘Mo taem man ya i stap mekem olsem, we i no fogetem ol samting blong loa ya, be i mekem ol samting we loa ya i talem, God i stap mekem hem i harem gud long olgeta laef blong hem.’—Jemes 1:25.