“Stap Klosap Long God”

“Yufala i mas stap klosap long God, nao hem bambae i kam stap klosap long yufala.”—JEMES 4:8.

1, 2. (a) ?Plante man oli stap talem wanem? (b) ?Wanem strong advaes we Jemes i givim, mo from wanem ol Kristin bifo oli nidim advaes ya?

“GOD i stap wetem yumi.” Toktok ya i stap long ol saen blong fulap kantri, mo long yunifom blong sam soldia tu. Plante kantri oli raetem tok ya “Long God yumi stanap,” long mane blong olgeta. Yes, plante man oli talem se oli stap klosap long God. ?Be yu yu agri se, blong rili stap klosap long God, yumi mas mekem moa i bitim we yumi talem toktok ya no yumi raetem toktok ya long wan samting blong ol narafala man oli lukluk?

² Baebol i soemaot se yumi save kam fren blong God. Be yumi mas traehad. Long faswan handred yia, sam long ol Kristin we tabu spirit i makemaot olgeta finis, oli nidim yet blong fren moa wetem Jeova God. Kristin elda ya Jemes i givim woning long olgeta we oli wantem folem ol fasin we tingting blong olgeta nomo i wantem, mo we oli stap kam doti long wosip blong olgeta. Taem hem i stap givim advaes long saed ya, hem i talem strong tok ya se: “Yufala i mas stap klosap long God, nao hem bambae i kam stap klosap long yufala.” (Jemes 4:1-12) ?Tok ya “stap klosap” we Jemes i talem, i minim wanem?

3, 4. (a) ?Samfala long faswan handred yia we oli ridim tok ya “kam klosap long God” long leta blong Jemes, maet oli tingbaot wanem? (b) ?From wanem yumi save sua se i gat rod blong kam klosap long God?

³ Ol man long taem bifo we oli ridim leta blong Jemes, oli savegud tok ya. Loa blong Moses i talem klia long ol pris olsem wanem oli save “kam klosap” long Jeova, no toktok long hem from ol man. (Eksodas 19:22) Maet tok blong Jemes i mekem ol man ya oli tingbaot se i wan bigfala blesing blong kam klosap long Jeova. I no wan samting nating ya, blong fren wetem Man ya we i hae moa long olgeta spirit long heven mo olgeta man long wol.

⁴ Be i gat wan narafala saed blong tok blong Jemes tu. Wan man blong stadi Baebol i talem se, “advaes ya [long Jemes 4:8] i mekem tingting blong yumi strong se yumi naf blong mekem gudfala samting ya.” Jemes i save se, stat bifo olgeta, Jeova i singaot ol man oltaem wetem lav, blong oli kam klosap long Hem. (2 Kronikel 15:2) Sakrefaes blong Jisas i openem rod moa blong ol man oli kam klosap long Jeova. (Efesas 3:11, 12) !Tede, plante milian man oli folem rod ya blong oli kam klosap long God! ?Be olsem wanem yumi save tekem nambawan janis ya? Bambae yumi tokbaot tri samting we yumi save mekem blong kam klosap long Jeova God.

Gohed Blong “Kasem Save” Long God

5, 6. ?Olsem wanem eksampol blong yangfala Samuel i soemaot mining blong tok ya “stap kasem save” long God?

⁵ Long Jon 17:3 (NW), Jisas i talem se: “Hemia laef ya we i no save finis, we man i stap kasem save long yu, we yu nomo yu trufala God, mo long hemia we yu sanem i kam, Jisas Kraes.” Plante Baebol oli tanem vas ya i defren long wanem we New World Translation i talem. Oli no talem se yumi mas “stap kasem save” long God, oli talem nomo se yumi mas “save God.” Be sam man we oli gat gud save oli talem se mining blong tok we oli yusum long olfala lanwis Grik i bigwan moa. Tok ya i minim wan wok we i stap gohed oltaem, mo we i save lidim man blong frengud wetem narafala.

⁶ Long taem blong Jisas, tingting ya blong savegud God olsem wan fren i no wan niufala tingting. Long Hibru haf blong Baebol, yumi ridim stori blong Samuel, se, taem hem i wan smol boe, ‘hem i no save Jeova yet.’ (1 Samuel 3:7) ?Hemia i min se Samuel i no gat save long saed blong God? Nogat. Papa mama blong hem wetem ol pris oli tijim hem plante long saed ya. Be, wan man blong stadi i talem se Hibru tok we oli yusum long vas ya, plante taem oli “yusum blong tokbaot besfren blong olgeta.” Taswe vas ya i min se Samuel i no save Jeova yet olsem besfren blong hem. Biaen nomo, taem Jeova i yusum Samuel blong talemaot tok blong Hem, hem i savegud Jeova. Taem hem i stap gruap, hem i gohed blong kasem save long Jeova, mo i lanem blong frengud wetem Hem.—1 Samuel 3:19, 20.

7, 8. (a) ?From wanem yumi no mas fraet blong traem kasem save long ol tijing blong Baebol we oli strong lelebet? (b) ?Wanem sam strong trutok blong Baebol we i gud blong yumi stadi long olgeta?

⁷ ?Yu yu stap kasem save long Jeova, blong yu save kam wan gudfala fren blong hem? Blong mekem olsem, yu mas ‘kam olsem we yu wantem tumas’ ol kakae long saed blong spirit we God i stap givim. (1 Pita 2:2) Yu no mas stop afta we yu kasem save long ol stamba tijing blong Baebol. Yu mas traehad blong lanem sam tijing blong Baebol we oli strong moa. (Hibrus 5:12-14) ?Yu yu fraet blong traem lanem ol tijing olsem? ?Yu yu harem se oli strong tumas blong yu kasem save long olgeta? Sipos yes, yu mas tingbaot se Jeova nao i “Bigfala Tija” blong yumi. (Aesea 30:20, NW) Hem i save olsem wanem blong mekem ol strong trutok oli kasem tingting blong ol sinman. Mo hem i save blesem yu taem yu traehad wetem fulhat blong yu blong kasem save long ol tijing we hem i stap givim long yu.—Ol Sam 25:4.

⁸ I gud blong jekem yu wan long saed blong “ol tingting blong God we man i no save faenemaot.” (1 Korin 2:10) Hemia i no minim ol save we i no pulum intres blong man mo we man i save les long hem, olsem ol kwestin we ol lida blong jos mo ol man we oli gat bigfala save long ol tijing blong jos oli stap raorao long hem. Hemia i minim ol tijing we oli save givhan long laef blong yumi, mo we oli givim save long samting we i stap long tingting mo hat blong Papa blong yumi we i lavem yumi. Tingbaot sam long ol tijing ya olsem: ransom sakrefaes blong Jisas, “waestok blong God we fastaem hem i haedem,” mo ol kontrak we Jeova i bin mekem blong givhan long ol man blong hem mo blong mekem bigfala tingting blong hem i kamtru. Taem yumi wanwan i stadi mo traehad blong faenemaot moa save long ol tijing ya mo plante narafala tijing olsem, yumi haremgud tumas mo oli givhan long yumi tu.—1 Korin 2:7.

9, 10. (a) ?From wanem flas tingting i denja, mo wanem i save givhan long yumi blong no foldaon long fasin ya? (b) ?Taem yumi stap kasem save moa long Jeova, from wanem yumi mas traehad oltaem blong holem tingting daon?

⁹ Taem save blong yu long saed blong ol strong trutok blong Baebol i kam antap moa, yu mas lukaotgud se yu no kam flas from ol save ya. (1 Korin 8:1) Flas tingting i wan denja, from we i save mekem se man i kam badfren blong God. (Ol Proveb 16:5; Jemes 4:6) Rimemba se, save blong yumi ol man i smol nomo, yumi no gat risen blong tokflas. Blong soemaot samting ya, tingting gud long fastok blong wan buk we i stap tokbaot ol niufala save blong ol sayentis. Hem i se: “Moa yumi kasem save, moa yumi luksave se save blong yumi i smol nomo. . . . Olgeta samting we yumi lanem finis i olsem nating nomo taem yumi skelem wetem wanem we yumi no lanem yet.” I gud blong save se samfala oli gat tingting daon olsem. Nao taem yumi tingbaot save we i bigwan olgeta—hemia save blong Jeova God—samting ya i mas mekem we yumi holem tingting daon moa. ?From wanem?

¹⁰ Makemgud ol tok ya blong Baebol long saed blong Jeova. “!Tingting blong yu i dip we i dip!” (Ol Sam 92:5) “Man i no save makem waes blong [Jeova].” (Ol Sam 147:5) “I no gat man we i save kasem tingting blong [Jeova].” (Aesea 40:28) “!Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak!” (Rom 11:33) I klia se, neva bambae yumi save evri samting long saed blong Jeova. (Prija 3:11) Hem i tijim yumi finis long plante nambawan samting, be hem i gat naf save blong gohed blong tijim yumi gogo i no save finis. ?Samting ya i mekem yu yu glad? ?I mekem yu yu harem se yu smol nomo? Taswe, taem yumi stap lanem ol niufala samting, oltaem yumi mas yusum save ya blong kam klosap moa long Jeova mo blong givhan long ol narafala blong kam klosap moa long Hem. Yumi neva mas yusum save ya blong leftemap yumi i kam hae moa long ol narafala.—Matiu 23:12; Luk 9:48.

Soemaot Se Yu Lavem Jeova

11, 12. (a) ?Ol save we yumi kasem long saed blong Jeova i mas mekem wanem long yumi? (b) ?Wanem samting i soemaot sipos wan man i lavem God tru?

¹¹ Aposol Pol i joenem save wetem lav. Hem i raetem se: “Mi mi stap prea we oltaem bambae yufala i save kam we yufala i stap lavlavem yufala moa. Mo mi prea we long fasin ya, oltaem bambae yufala i save kam waes moa, mo yufala i save luksave.” (Filipae 1:9) Bitim we tingting blong yumi i go antap tumas from ol niufala save, i moagud we evri sas trutok we yumi lanem long saed blong Papa blong yumi long heven, Jeova, mo ol stamba tingting blong hem, oli mas pulum yumi blong lavem hem moa.

¹² Plante man we oli stap talem se oli lavem God, oli stap giaman nomo. Maet i tru se sam samtaem oli gat wan filing blong lav long hat blong olgeta. Hemia i gud, mo ol filing ya oli stret nomo taem oli laenap wetem stret save. Be maet man olsem i no rili lavem God tru. ?From wanem yumi talem olsem? Traem luk olsem wanem Baebol i eksplenem lav we yumi mas gat long God, i se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Taswe, wan man i stap soemaot se hem i rili lavem Jeova taem hem i obei long ol tok blong hem.

13. ?Olsem wanem fraet long Jeova bambae i givhan long yumi blong soemaot lav long Hem?

¹³ Sipos yumi fraetgud long Jeova, samting ya bambae i givhan long yumi blong obei long hem. Fraet ya i minim bigfala ona mo respek long Jeova mo fasin ya i kam antap taem yumi stap kasem save long hem, yumi lanem plante samting long saed blong tabu fasin blong hem, haenem, paoa, stret fasin blong jajem man, waes, mo lav blong hem. Blong kam klosap long Jeova, yumi mas fraetgud long hem. Yes, Ol Sam 25:14 i talem se: “Yu [Jeova] yu fren blong olgeta we oli stap obei long yu [“fraetgud long yu,” NW].” Taswe, sipos yumi gat gudfala fraet ya, we yumi no wantem mekem Papa blong yumi long heven i harem nogud, bambae yumi save kam klosap long hem. Fasin fraetgud long God bambae i givhan long yumi blong folem waes advaes we i stap long Ol Proveb 3:6 se: “Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” ?Wanem mining blong tok ya?

14, 15. (a) ?Wanem sam disisen we yumi mas mekem evri dei long laef blong yumi? (b) ?Olsem wanem yumi save tekem ol disisen we oli soemaot se yumi fraetgud long God?

¹⁴ Evri dei, yu yu mas mekem plante disisen, sam oli bigwan, sam oli smol. Hemia sam long olgeta: ?Bambae yu tokbaot wanem wetem ol man we oli wok wetem yu, ol fren blong yu long skul, mo ol man we oli stap raonabaot long yu? (Luk 6:45) ?Bambae yu traehad long ol wok blong yu, no bambae yu traem faenem rod blong mekem smol wok nomo? (Kolosi 3:23) ?Bambae yu kam klosap moa long olgeta we oli no lavem Jeova no we oli laekem hem smol nomo, no bambae yu traehad blong fren wetem ol man we oli strong long ol Kristin fasin? (Ol Proveb 13:20) ?Bambae yu mekem wanem blong givhan long wok blong Kingdom blong God, nating se i wan smol samting nomo we yu mekem? (Matiu 6:33) Sipos yu letem ol tingting blong Baebol olsem olgeta we oli stap long paragraf ya oli lidim yu long ol disisen we yu mekem evri dei, bambae yu soemaot se yu rili stap tingbaot Jeova “long olgeta samting we yu stap mekem.”

¹⁵ Yes, long evri disisen we yumi mekem, tingting we yumi mas folem, hemia: ?Jeova i wantem se mi mi mekem wanem? ?Bambae hem i glad moa sipos mi mekem wanem? (Ol Proveb 27:11) Sipos yumi tingbaot ol samting ya, yumi stap soemaot se yumi gat fasin fraetgud long God. Mo fasin ya i nambawan rod blong soemaot se yumi lavem hem. Mo tu, fasin blong fraetgud long God bambae i pulum yumi blong stap klin, long saed blong wosip, fasin, mo bodi blong yumi. Long semfala vas we Jemes i talem se ol Kristin oli mas “kam klosap long God,” hem i talem tu se: “Yufala i man nogud, yufala i mas wasem han blong yufala. Yufala we i gat tu fes yufala i mas mekem tingting blong yufala i klin.”—Jemes 4:8.

16. ?Nating se yumi givim evri samting i go long Jeova, yumi neva save kasem wanem mak, be fasin ya bambae i soemaot wanem?

¹⁶ I tru, blong soemaot lav long Jeova, i no naf blong blokem ol rabis fasin nomo. Yumi mas mekem moa. Lav bambae i pulum yumi blong mekem ol samting we oli gud tu. Tingbaot: ?Yumi mekem wanem blong soemaot tangkiu from ol gudgudfala presen we Jeova i stap givim? Jemes i raetem se: “Evri samting we oli gud mo evri presen we oli nambawan we yumi kasem, oli kamaot long heven nomo. God i mekem olgeta laet blong skae, mo hem i stap givim ol gudgudfala samting ya long yumi.” (Jemes 1:17) Tru ya, taem yumi givim olting blong yumi i go long Jeova, yumi no mekem hem i kam rijman. Wol ya wetem evri samting we i stap long hem oli blong Jeova finis. (Ol Sam 50:12) Yumi givim taem mo paoa blong yumi long Jeova, be hem i no rili nidim ol samting ya. Hem i gat ol narafala rod we hem i save folem blong mekem ol samting oli kamtru olsem hem i wantem. !Mo sipos yumi no wantem talemaot gud nius blong Kingdom blong God, be hem i save mekem ol ston oli toktok long ples blong yumi! ?Ale, from wanem yumi givim olting, taem, mo paoa blong yumi i go long Jeova? Bigfala risen, hemia from we, long rod ya yumi soemaot se yumi lavem hem wetem olgeta hat, laef, tingting mo paoa blong yumi.—Mak 12:29, 30.

17. ?Wanem i save pulum yumi blong gat gladhat blong givim presen long Jeova?

¹⁷ Taem yumi givim samting long Jeova, yumi mas givim wetem gladhat, “from we God i lavem man we i save givim samting long gladhat blong hem.” (2 Korin 9:7) Rul we i stap long Dutronome 16:17 i save givhan long yumi blong gat gladhat blong givim presen. Hem i se: “Fasin blong man blong givim presen bambae i folem fasin we Hae God i stap blesem hem.” Taem yumi tingbaot ol gudgudfala samting we Jeova i givim long yumi finis, yumi harem se yumi wantem givim plante presen i gobak long hem. Ol presen olsem oli mekem hat blong hem i glad, i sem mak long wan smol presen we pikinini i givim long papa mama blong hem we i save mekem tufala i haremgud tumas. Sipos yumi folem rod ya blong soemaot lav long Jeova, bambae yumi kam klosap long Hem.

Prea i Mekem Se Yumi Fren Wetem Hem

18. ?From wanem i gud blong tingbaot olsem wanem blong mekem ol prea blong yumi oli kamgud moa?

¹⁸ Taem yumi wanwan i prea long Papa blong yumi long heven, hemia i nambawan janis we yumi gat blong talemaot ol samting we oli stap dip insaed long hat blong yumi. (Filipae 4:6) Prea i wan impoten rod blong kam klosap long God. Taswe, i gud blong tekem smoltaem blong tingbaot fasin blong yumi blong prea. I no nid we yumi yusum ol bigbigfala tok mo mekem ol prea blong yumi oli folem wan spesel plan. Be ol tok we yumi talem i mas kamaot long hat blong yumi. ?Olsem wanem yumi save mekem ol prea blong yumi oli kamgud moa?

19, 20. ?From wanem i gud blong tingting dip bifo we yumi prea, mo wanem sam samting we i stret blong tingting dip long olgeta?

¹⁹ Maet yumi traem tingting dip bifo we yumi prea. Sipos yumi mekem olsem, yumi save mekem ol prea blong yumi oli kam moa klia mo oli gat mining. Olsem nao, bambae yumi no talem bakegen mo bakegen ol semfala tok we yumi stap talem evri taem mo we oli isi blong tingbaot. (Ol Proveb 15:28, 29) Maet i gud blong tingting dip long ol samting we Jisas i tokbaot long prea we hem i givim olsem eksampol, mo traem tingbaot olsem wanem oli joen wetem laef blong yumi. (Matiu 6:9-13) Olsem nao, yumi save askem long yumi wan se: ?Blong mekem samting we Jeova i wantem i kamaot long wol ya, wanem smol wok we mi mi save mekem? ?Maet mi save talem long Jeova se mi wantem we hem i yusum mi, mo askem hem blong givhan long mi blong mekem ol wok we hem i putum long han blong mi? ?Tingting blong mi i hevi from ol wari long saed blong ol samting we mi mi nidim long laef? ?Mi mi wantem se God i fogivim wanem sin blong mi, mo mi mi mas fogivim hu? ?Taem wan samting i traem mi, mi mi luksave se mi nidim tumas we Jeova i lukaotgud long mi?

²⁰ Mo tu, maet yumi tingbaot samfala we yumi save olgeta, we oli rili nidim help blong Jeova. (2 Korin 1:11) Be, yumi no mas fogetem tu blong talem tangkiu long Jeova. Sipos yumi tektaem blong tingting gud, yumi save faenem plante risen blong talem tangkiu long Jeova mo presem hem evri dei from ol gudgudfala samting we hem i givim long yumi. (Dutronome 8:10; Luk 10:21) Taem yumi mekem olsem, i gat wan moa gudfala frut i save kamaot. Bambae yumi gat wan gudfala tingting long saed blong laef, mo bambae yumi gat tangkiu from.

21. ?Hu ol man long Baebol we yumi save stadi long olgeta blong givhan long yumi taem yumi prea long Jeova?

²¹ Stadi tu i save mekem ol prea blong yumi oli kamgud moa. Baebol i tokbaot ol nambawan prea we ol gudfala man mo woman blong bilif oli bin mekem. Maet yumi fesem wan traem we i stap mekem yumi wari, mo maet yumi fraet tu se yumi mo famle blong yumi i stap long denja. Ale, yumi save ridim prea blong Jekob, taem hem i mas mitim brata blong hem Esao we i stap kros long hem longtaem finis. (Jenesis 32:9-12) No maet yumi stadi long prea blong King Asa taem ami blong wan milian soldia blong Itiopia oli kam mekem faet long ol man blong God. (2 Kronikel 14:11, 12) Sipos wan trabol i kamaot we i save sakem doti long nem blong Jeova, i gud blong tingbaot prea we Elaeja i mekem long bigfala hil ya Kamel, long fored blong ol man we oli wosip long god ya Bal. Mo tu, yumi save tingbaot prea blong Nehemaea long saed blong taon ya Jerusalem we ol ami oli bin spolem. (1 King 18:36, 37; Nehemaea 1:4-11) Taem yumi ridim mo tingting dip long ol prea olsem, bilif blong yumi i save kam strong, mo oli save givhan long yumi blong faenem beswan rod blong talemaot long Jeova ol wari we oli mekem tingting blong yumi i hevi.

22. ?Wanem stamba vas blong yia 2003, mo wanem samting we yumi wanwan i mas jekemap bakegen mo bakegen long yia ya?

²² I klia se i no gat wan ona we i hae moa, no wan wok we i gud moa, i winim we yumi “kam klosap long God” olsem Jemes i talem. (Jemes 4:8) Yumi save mekem olsem, sipos yumi gohed blong kasem moa save long God, traehad blong soemaot moa lav long hem oltaem, mo traem tokbaot ol samting long prea we oli mekem se yumi fren moa wetem hem. Long yia 2003, bambae yumi tingting plante long Jemes 4:8 we hem i stamba vas blong yia. Mo tu, bambae yumi gohed oltaem blong luklukgud long laef blong yumi wanwan, blong jekem sipos yumi rili stap kam klosap long Jeova. ?Be olsem wanem long lashaf blong vas ya? ?Olsem wanem Jeova bambae ‘i kam stap klosap long yumi,’ mo wanem ol blesing we bambae oli kamaot from? Nekis stadi bambae i tokbaot ol kwestin ya.

“Hem Bambae i Kam Stap Klosap Long Yufala”

“God . . . i no stap longwe long yumi nating.”—OL WOK 17:27.

1, 2. (a) ?Taem yumi stap lukluk ol sta long skae, maet yumi askem wanem kwestin long saed blong Bigman we i Wokem yumi? (b) ?Baebol i talem wanem blong soem se ol man oli impoten long ae blong Jeova?

?SAMTAEM yu bin lukluk i go antap long skae long wan naet we i kliagud? ?Yu yu sapraes long ol sta we yu stap luk olgeta? Oli plante we plante, mo skae i bigwan we i bigwan, mekem se yumi harem we yumi smol nomo. Long medel blong ol bigfala hip sta ya, wol blong yumi i olsem wan smosmol samting we i nating nomo. ?Olsem wanem? ?Hemia i min se Bigman we i Wokem yumi, mo i “hae King blong olgeta ples long wol,” hem i hae tumas blong tingbaot ol man, mo hem i longwe tumas blong yumi faenem hem mo blong yumi save hem?—Ol Sam 83:18.

² Baebol i talem se ol man oli impoten long ae blong Jeova. Taswe, Tok blong God i pulum yumi blong lukaot hem, blong yumi save faenem hem, i se: “God ya i no stap longwe long yumi nating.” (Ol Wok 17:27; 1 Kronikel 28:9) Yes, sipos yumi mekem ol samting we yumi mas mekem blong kam klosap long God, bambae hem i blesem traehad blong yumi. ?Olsem wanem bambae i blesem? Stamba vas blong yia 2003 i givim ansa we i mekem yumi haremgud, i se: ‘Hem bambae i kam stap klosap long yu.’ (Jemes 4:8) Naoia, bambae yumi tokbaot sam nambawan blesing we Jeova i stap givim long olgeta we oli kam klosap long hem.

Presen We Jeova i Givim Long Yumi Wanwan

3. ?Jeova i stap givim wanem presen long ol man we oli kam klosap long hem?

³ Faswan samting, hemia wan sas presen we Jeova i givim long ol man blong hem nomo. Nating se wan man i gat haenem, mane, mo edukesen, be ol samting ya oli no save givim presen ya long hem. Hemia wan presen blong yumi wanwan, wan presen we Jeova i stap givim nomo long olgeta we oli kam klosap long hem. ?Wanem presen ya? Tok blong God i ansa long kwestin ya, i se: “Yu mas askem strong long Hae God, . . . blong yu save haremsave mining blong ol strong samting. Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem. Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud long hem.’ Nao bambae yu save fasin blong hem moa, blong yu savegud hem [no “yu faenem save blong God,” NW]. Hae God nomo i save mekem man i waes.” (Ol Proveb 2:3-6) !Tingbaot! !Yumi we yumi sinman nomo, be yumi save faenem “save blong God”! Presen ya—save we i stap long Tok blong God—i olsem “silva, no wan narafala samting olsem, we man i bin berem.” ?From wanem i olsem silva?

4, 5. ?From wanem “save blong God” i olsem “silva, no wan narafala samting olsem, we man i bin berem”? Talem wan eksampol.

⁴ Save blong God i wan samting we i sas tumas. Wan nambawan blesing we yumi kasem from save ya, hemia janis blong gat laef we i no save finis. (Jon 17:3) Be save ya i givhan long laef blong yumi naoia tu. Olsem nao, taem yumi stadigud long Tok blong God, yumi faenem ansa long ol impoten kwestin olsem: ?Wanem nem blong God? (Ol Sam 83:18, NW) ?Ol dedman oli stap wea? (Prija 9:5, 10) ?Wanem stamba tingting blong God we bambae hem i mekem i kamtru long wol ya mo long ol man? (Aesea 45:18) Mo tu, yumi save se beswan fasin blong laef hemia blong folem ol waes advaes blong Baebol. (Aesea 30:20, 21; 48:17, 18) Taswe, yumi gat gudfala save ya blong lidim yumi mo givhan long yumi blong winim ol trabol mo wari blong laef, nao yumi save folem wan fasin blong laef we i givim trufala glad mo i rili mekem yumi haremgud. Antap moa, taem yumi stadi long Tok blong God, yumi kasem save long ol nambawan fasin blong Jeova mo yumi kam klosap long hem. ?Yu ting se i gat wan samting we i moa sas i winim fasin fren wetem Jeova we i stanap long stret “save blong God”?

⁵ I gat wan narafala risen tu, from wanem save blong God i olsem “silva, no wan narafala samting olsem, we man i bin berem.” I gat sam kaen sas ston, we i no gat plante blong olgeta long wol ya. Save blong God i sem mak. I gat sikis bilian man long wol. Be i gat sikis milian man blong Jeova nomo, no wan long evri 1,000 man, we oli faenem “save blong God” finis. Blong soemaot se man we i save trutok blong Baebol i gat wan nambawan blesing we plante narafala man oli no gat, bambae yumi tekem wan kwestin nomo long saed blong Baebol: ?Wanem i hapen long man taem hem i ded? Yumi save wanem we Baebol i talem, se sol i save ded, mo man we i ded i no moa gat tingting, i no moa save wan samting. (Esikel 18:4) Be, bighaf blong ol jos oli tijim giaman bilif ya se, i gat wan samting insaed long man, olsem spirit, we i gohed blong laef taem man i ded. Hemia wan stamba tijing blong ol skul blong Krisendom.a Mo plante narafala skul tu oli folem tijing ya, olsem skul Buda, Hindu, Islam, Jain, skul blong ol man Jiu, Sinto, Sik, mo Tao. !Traem tingbaot—wan tijing nomo we yumi tokbaot, be giaman tijing ya i trikim plante bilian man!

6, 7. (a) ?Hu nomo i save faenem “save blong God”? (b) ?Wanem i soemaot se Jeova i blesem yumi wetem save we i haed long fes blong plante man ‘we oli waes mo oli skulgud’?

⁶ ?From wanem plante moa man oli no faenem “save blong God”? From we man i nidim we God i givhan long hem, blong hem i naf blong kasem mining blong Tok blong God. Yumi no mas fogetem se save ya i wan presen. Jeova i stap givim presen ya long ol man nomo we oli glad blong lukaot save ya long Tok blong hem, mo we oli gat tingting daon mo oli no stap giaman. Bighaf blong olgeta ya, maet ‘long fes blong ol man, oli no waes.’ (1 Korin 1:26) Plante long olgeta, ol man blong wol oli luk olgeta olsem we ‘oli no gat nem, mo oli no skul gud.’ (Ol Wok 4:13) Be, samting ya i no impoten. Jeova i stap givim ‘save blong Hem’ long yumi olsem wan blesing, from we hem i luk sam gudfala fasin long hat blong yumi.

⁷ Tingbaot blong smoltaem, ol man blong hae save long ol skul blong Krisendom. Olgeta ya oli bin raetem plante buk blong eksplenem Baebol. Ol buk ya oli tokbaot histri blong Baebol, mining blong plante tok long Hibru mo Grik lanwis, mo sam samting moa. ?Be ol man ya we oli gat bigfala save mo oli skulgud, oli rili faenem “save blong God”? Blong ansa long kwestin ya, traem skelem hemia: ?Ol man ya oli klia long mining blong stamba tok blong Baebol—hemia se, Kingdom blong Jeova long heven bambae i mekem se rul blong Hem i win? ?Olgeta ya oli save se Jeova i no wan haf blong Triniti? Nogat. Be yumi, yumi gat stret save long ol samting ya. ?From wanem? From we Jeova i givim blesing long yumi, i mekem yumi naf blong kasem mining blong ol trutok blong Baebol we oli haed long fes blong plante man ‘we oli waes mo oli skulgud.’ (Matiu 11:25) !Tru ya, Jeova i rili stap blesem olgeta we oli kam klosap long hem!

‘Jeova i Stap Lukaotgud Long Olgeta We Oli Lavem Hem’

8, 9. (a) ?Deved i tokbaot wanem narafala blesing we Jeova i givim long olgeta we oli kam klosap long hem? (b) ?From wanem ol trufala Kristin oli nidim we God i lukaotgud long olgeta?

⁸ Olgeta we oli kam klosap long Jeova oli kasem wan narafala blesing tu—God i stap lukaotgud long olgeta. Deved, we i raetem sam haf long Ol Sam, hem i kasem plante trabol long laef blong hem. Be hem i raetem se: “[Jeova] i stap klosap long olgeta we oli stap krae i go long hem, we hemia olgeta ya we oli wantem tru blong hem i givhan long olgeta. Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta. Oltaem hem i stap lukaot gud long olgeta, we oli lavem hem.” (Ol Sam 145:18-20) Yes, Jeova i stap klosap long olgeta we oli lavem hem, taswe taem oli singaot hem blong halpem olgeta, hem i save ansa kwiktaem.

⁹ ?From wanem yumi nidim we Jeova i lukaotgud long yumi? Wan risen se, naoia, ‘laef long wol ya i strong tumas.’ Antap long samting ya, Setan we i bigfala Enemi blong Jeova, i stap agensem ol trufala Kristin i bitim ol narafala man. (2 Timoti 3:1) Enemi ya we i waes blong trikim ol man, i wantem “kakae” yumi. (1 Pita 5:8) Setan i stap mekem trabol long yumi, givim wari long yumi, mo traem yumi. Mo tu, hem i stap wajem yumi, blong faenem ol tingting mo slak fasin blong yumi we hem i save yusum blong mekem yumi foldaon. Hem i gat wan tingting nomo: Hem i wantem mekem bilif blong yumi i kam slak, mo spolem yumi long saed blong spirit. (Revelesen 12:12, 17) ?Taem yu tingbaot bigfala faet we yumi gat agensem enemi ya we i gat paoa, yu yu haremgud blong save se ‘Jeova i stap lukaotgud long olgeta we oli lavem hem’? 

10. (a) ?Olsem wanem Jeova i stap lukaotgud long ol man blong hem? (b) ?Wanem fasin blong lukaotgud long yumi we i impoten moa, mo from wanem?

¹⁰ ?Olsem wanem Jeova i stap lukaotgud long ol man blong hem? Promes blong hem blong lukaotgud long yumi i no min se bambae yumi no gat trabol long wol ya. Mo i no minim tu se hem i mas mekem merikel blong sevem yumi. Nogat. Be i tru se, Jeova i stap sevem ol man blong hem olsem wan grup. !Hem i no save letem Setan i kilim i ded olgeta trufala man blong hem long wol ya! (2 Pita 2:9) Antap moa, Jeova i stap lukaotgud long yumi long saed blong spirit. Hem i givim olgeta samting we yumi nidim blong stanap strong taem yumi kasem traem, mo blong holemtaet fasin fren blong yumi wetem hem. Fasin ya blong lukaotgud long yumi long saed blong spirit i moa impoten i bitim olgeta narafala fasin blong lukaot long yumi. ?From wanem? From we sipos yumi frengud wetem Jeova, i no gat wan samting nating we i save spolem yumi, mo ded tu i no save spolem yumi blong olwe.—Matiu 10:28.

11. ?Wanem sam samting we Jeova i givim long ol man blong hem blong lukaotgud long olgeta long saed blong spirit?

¹¹ Jeova i givim fulap samting long olgeta we oli kam klosap long hem, blong lukaotgud long olgeta long saed blong spirit. Long Tok blong hem, Baebol, hem i givim waes long yumi we i naf blong mekem yumi stanap strong, taem ol defdefren traem oli kasem yumi. (Jemes 1:2-5) Taem yumi folem ol advaes blong Baebol long laef blong yumi, samting ya i lukaotgud long yumi. Mo tu, Jeova i stap “givim Tabu Spirit long ol man we oli askem long hem.” (Luk 11:13) I no gat wan paoa we i strong moa long heven mo wol, i bitim tabu spirit. Taswe, spirit ya i save mekem yumi naf blong stanap strong agensem enikaen samting we i kam blong traem yumi no pulum yumi. Mo tu, Jeova i yusum Kraes blong putumap “ol man we oli olsem presen.” (Efesas 4:8, NW) Ol man ya we oli bigman long saed blong spirit oli traehad blong soemaot bigfala sore olsem Jeova i stap soemaot, taem oli givhan long ol Kristin brata mo sista blong olgeta.—Jemes 5:14, 15.

12, 13. (a) ?Jeova i mekem wanem blong givim kakae long saed blong spirit long yumi long stret taem blong hem? (b) ?Wanem tingting blong yu long ol samting we Jeova i stap givim blong halpem yumi long saed blong spirit?

¹² I gat wan narafala samting bakegen we Jeova i stap givim blong lukaotgud long yumi: hemia kakae long saed blong spirit long stret taem blong hem. (Matiu 24:45) Blong givim ol stret samting we yumi nidim, mo long stret taem, Jeova i stap yusum ol buk, olsem Wajtaoa mo Wekap!, wetem ol miting mo asembli. ?Yu save tingbaot wan miting no asembli we yu bin harem sam tok we i tajem hat blong yu, i mekem tingting blong yu i strong, no i mekem yu yu haremgud bakegen? ?Yu bin ridim wan stori long ol magasin we i mekem yu yu harem se oli raetem stori ya speseli blong yu?

¹³ Wan tul we Setan i stap yusum blong winim plante man, hemia ol samting we i mekem tingting i foldaon. Hem i save yusum tul ya long yumi tu. Hem i save se sipos man i harem nogud long tingting blong hem blong longtaem, hem i save lusum paoa, nao i isi blong winim hem. (Ol Proveb 24:10) From we Setan i stap traehad blong yusum ol nogud filing olsem, yumi nidim samting blong givhan long yumi. I gat sam stori long ol Wajtaoa mo Wekap! we oli save givhan long yumi blong winim tingting we i foldaon. Wan Kristin sista i tokbaot wan stori olsem, i se: “Mi stap ridim stori ya bakegen mo bakegen, klosap evri dei. Mo wota i stap ron long ae blong mi evri taem. Mi putum buk ya i stap klosap long bed blong mi, nao taem mi harem nogud, mi ridim bakegen. Ol stori olsem oli mekem mi mi harem se Jeova i stap putum han blong hem i goraon long mi blong lukaotgud long mi.”b ?Yu yu glad se Jeova i stap givim kakae long saed blong spirit long yumi long stret taem we yumi nidim? Yumi no mas fogetem se, ol samting we hem i givim blong halpem yumi long saed blong spirit, oli soemaot se hem i stap klosap long yumi, mo hem i stap lukaotgud long yumi.

Toktok Long Man Ya We i “Stap Ansa Long Ol Prea”

14, 15. (a) ?Wanem blesing we Jeova i stap givim long ol wanwan man we oli kam klosap long hem? (b) ?From wanem i wan nambawan presen blong toktok long Jeova enitaem long prea?

¹⁴ ?Yu yu makem se taem ol man oli kasem haenem mo paoa, plante long olgeta oli no moa wantem joen mo toktok wetem ol man we i stap aninit long olgeta? ?Olsem wanem long Jeova God? ?Yu ting se hem i stap longwe tumas long ol man, we i no wantem lesin long ol tok we oli talem long hem? !Nogat! Presen ya blong prea i wan narafala blesing we Jeova i stap givim long olgeta we oli kam klosap long hem. Yumi save toktok enitaem long Man ya we i “stap ansa long ol prea.” Hemia wan nambawan presen. (Ol Sam 65:2) ?From wanem yumi talem olsem?

¹⁵ Tingbaot maneja blong wan bigfala bisnes. Hem i gat plante wok blong mekem. Ale, hem i jusumaot ol wok we hem wan bambae i mekem, mo hem i givim ol narafala wok i go long ol narafala man blong mekem. Long sem fasin, Hae King blong heven mo wol i save jusumaot wanem wok we hem wan bambae i mekem, mo wanem wok we bambae i givim long ol narafala man blong lukaot long hem. Tingbaot olgeta wok we Jeova i givim long Pikinini blong Hem Jisas, we i lavem hem tumas. Hem i givim wok long Pikinini blong hem se bambae i “mekem bigfala kot blong jajem ol man.” (Jon 5:27) Hem i mekem se ol enjel “oli stap ona long [Jisas].” (1 Pita 3:22) Jeova i givim tabu spirit long Jisas blong givhan long hem blong lidim ol disaepol blong hem long wol ya. (Jon 15:26; 16:7) Taswe, Jisas i save talem se: “God i givim olgeta paoa long mi, long olgeta samting long heven mo long wol.” (Matiu 28:18) Be, long saed blong ol prea blong yumi, Jeova i jusum se hem wan bambae i lesin long olgeta. From samting ya, Baebol i talem long yumi blong prea i go long Jeova nomo, long nem blong Jisas.—Ol Sam 69:13; Jon 14:6, 13.

16. ?From wanem yumi save bilif strong se Jeova i stap lesin long ol prea blong yumi?

¹⁶ ?Jeova i rili stap lesin long ol prea blong yumi? Sipos hem i no kea mo i no wantem lesin, bambae i no save talem long yumi blong “prea oltaem” mo blong sakem ol wari mo trabol blong yumi long hem. (Rom 12:12; Ol Sam 55:22; 1 Pita 5:7) Ol gudfala man blong God we Baebol i tokbaot, oli bilif fulwan se Jeova i stap lesin long ol prea blong olgeta. (1 Jon 5:14) Taswe, Deved i raetem Sam ya we i talem se: “Bambae [Jeova] i harem voes blong mi.” (Ol Sam 55:17) Yumi tu, yumi gat plante risen blong trastem Jeova se hem i stap klosap long yumi, mo hem i rere blong lesin long evri tingting mo trabol blong yumi.

Jeova i Stap Mekem i Gud Long Ol Man Blong Hem

17, 18. (a) ?Wanem filing blong Jeova long saed blong wok we ol gudfala man blong hem oli mekem blong ona long Hem? (b) Yusum Ol Proveb 19:17 blong eksplenem se Jeova i stap lukluk ol wok we yumi mekem blong soem sore long narafala.

¹⁷ Jeova i Haefala King blong heven mo wol. Bigfala paoa mo haenem blong hem i no save jenis, nomata wanem samting ol man oli mekem no oli no wantem mekem. Be nating se i olsem, Jeova i glad taem yumi mekem samting we hem i wantem. Hem i tinghae long wok we ol man oli mekem blong ona long hem, mo hem i lavem olgeta from. (Ol Sam 147:11) Hemia nao wan narafala blesing we yumi kasem taem yumi kam klosap long Jeova: Hem i stap mekem i gud long ol man blong hem.—Hibrus 11:6.

¹⁸ Baebol i soemaot klia se Jeova i stap tinghae long wok we ol man blong hem oli mekem. Olsem nao, wan vas i talem se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Ol Proveb 19:17) Plante haf blong Loa blong Moses oli soemaot olsem wanem Jeova i gat sore long ol puaman mo i stap tingbaot olgeta. (Levitikas 14:21; 19:15) ?Wanem filing blong Jeova taem yumi folem fasin blong hem blong sore long ol puaman? Taem yumi givim samting long puaman, we yumi no gat tingting blong kasem pei from, Jeova i luk presen ya olsem wan samting we yumi letem Hem i yusum fastaem. Jeova i mekem promes long yumi se bambae hem i mekem i gud long yumi mo givim blesing long yumi, olsem jenis blong samting ya. (Ol Proveb 10:22; Matiu 6:3, 4; Luk 14:12-14) Yes, taem yumi soem sore long wan Kristin brata no sista blong yumi we hem i gat nid, fasin blong yumi i save tajem hat blong Jeova. !Yumi glad tumas blong save se Papa blong yumi long heven i stap lukluk ol wok we yumi mekem blong soemaot sore long narafala!—Matiu 5:7.

19. (a) ?From wanem yumi save sua se Jeova i stap tinghae long wok we yumi mekem blong prij mo blong pulum ol man oli kam disaepol blong Kraes? (b) ?Olsem wanem Jeova i stap givim pei from wok we yumi mekem blong sapotem Kingdom blong hem?

¹⁹ Jeova i tinghae long ol wok we yumi mekem blong leftemap Kingdom blong hem. Taem yumi kam klosap long Jeova, yumi harem se yumi wantem yusum taem, paoa, mo olting blong yumi blong joen fulwan long wok blong talemaot Kingdom mo pulum ol man oli kam disaepol blong Kraes. (Matiu 28:19, 20) Be, sam samtaem, maet yumi harem se wok blong yumi i no stap karem frut. From we hat blong yumi i no stretgud olgeta, maet yumi save ting se Jeova i no moa glad long ol hadwok blong yumi. (1 Jon 3:19, 20) Be Jeova i no olsem. Hem i tinghae long olgeta presen we yumi givim wetem hat we i fulap long lav, nomata se presen ya i smol olsem wanem. (Mak 12:41-44) Baebol i mekem promes ya long yumi se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.” (Hibrus 6:10) Tru ya, Jeova i stap tingbaot mo givim pei from olgeta wok we yumi mekem blong sapotem Kingdom blong hem, nating se wok ya i smol nomo. Hem i stap givim ol bigfala blesing naoia long saed blong spirit, mo antap long samting ya, yumi save putum tingting blong yumi i stap strong long ol nambawan blesing blong niufala wol we i stap kam. !Long taem ya, Jeova bambae i openem han blong hem mo givim olgeta gudfala samting we ol man we oli stap klosap long hem oli wantem!—Ol Sam 145:16; 2 Pita 3:13.

20. ?Long yia 2003, yumi save mekem wanem blong no fogetem stamba vas blong yia, mo wanem bambae i kamaot from?

²⁰ Long yia 2003, yumi mas jekemap yumi oltaem blong luk sipos yumi stap traehad blong kam klosap moa long Papa blong yumi long heven. Sipos yumi stap mekem olsem, yumi save sua se bambae hem i mekem i gud long yumi olsem we hem i promes blong mekem. Yes, “God . . . i no save giaman.” (Taetas 1:2) Sipos yu kam klosap long hem, hem bambae i kam stap klosap long yu. (Jemes 4:8) ?Mo wanem samting bambae i kamaot from? !Bambae yumi kasem ol bigfala blesing naoia, mo janis blong kam klosap moa long Jeova long fiuja, gogo i no save finis!

[Ol Futnot]