“Ol Loa Blong Hem Oli No Strong Tumas Blong Folem”

4-6. (a) ?Wanem stret mining blong Grik wod we oli tanem i kam “strong tumas”? (b) ?From wanem yumi save talem se ol loa blong God oli no strong tumas long yumi?

⁴ “Folem ol loa blong hem.” Hemia nao samting we God i wantem yumi blong mekem. ?Hem i askem samting we i hadwok tumas long yumi? No gat. Aposol Jon i talem wan samting we i mekem yumi haremgud tumas, long saed blong ol loa blong God, no samting we hem i wantem yumi blong mekem. Hem i raetem se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.”​—1 Jon 5:3.

⁵ Grik wod we oli tanem i kam “strong tumas,” stret mining blong hem se “hevi.” Hem i save minim wan samting we i hadwok blong folem no i strong blong mekem. Long Matyu 23:4, oli yusum wod ya blong tokbaot “ol hevi samting,” ol rul mo kastom blong man, we ol tija blong Loa mo ol Farisi oli putum long ol man. ?Yu yu kasem mining blong samting we olfala aposol Jon i stap tokbaot? Ol loa blong God oli no hevi tumas, mo i no strong tumas long yumi blong folem olgeta. (Skelem wetem Dutronome 30:11.) Defren nao, taem yumi laekem God tumas, yumi glad blong mekem samting we hem i wantem yumi blong mekem. Hemia wan nambawan jans blong soem se yumi laekem Jeova tumas.

12. Eksplenem from wanem i no strong tumas long yumi blong kasem save long God mo ol stampa tingting blong hem.

¹² ?Olsem wanem? ?I strong tumas long yumi blong kasem save ya long saed blong God mo ol stampa tingting blong hem? !No gat! ?Yu save rimemba filing blong yu long fastaem we yu kasem save se nem blong God hem i Jeova, Kingdom blong hem bambae i mekem wol ya i kam Paradaes bakegen, hem i givim pikinini blong hem we hem i laekem tumas blong i pemaot yumi long sin, mo ol narafala nambawan trutok olsem? Ating i olsem se yu tekemaot wan kaliko we i bin blokem ae blong yu, from we hemia fastaem blong yu blong kasem save klia long ol samting ya. Fasin blong kasem save long God i no wan samting we i strong tumas long yumi. !Hem i wan samting we i mekem yumi haremgud tumas!​—Ol Sam 1:​1-3; 119:97.

16. Eksplenem from wanem i no strong tumas blong mekem laef blong yumi i laenap wetem ol rul blong God long saed blong stret fasin mo blong bilif long trutok blong hem.

¹⁶ ?Yu ting se i strong tumas blong mekem laef blong yumi i laenap wetem ol rul blong God long saed blong stret fasin, mo blong bilif long trutok blong hem? No gat. Hem i no strong tumas taem yumi tingbaot ol gudfala frut we oli kamaot: Ol gudfala mared we hasban mo waef tufala i laeklaekem mo trastem tufala, bitim ol mared we hasban mo waef i seraot from we tufala i no stap tru long tufala. Ol famle we ol pikinini oli harem se papa mama i laekem mo i wantem olgeta, i bitim ol famle we ol pikinini oli harem se papa mama oli no gat lav long olgeta, oli no lukaotgud long olgeta, mo oli no wantem olgeta. Wan tingting we i no trabol mo gudfala helt, bitim we yumi harem se yumi gat fol, mo bitim we bodi i kam slak from AIDS no wan narafala sik we man i save kasem taem hem i slip olbaot. !Tru ya, ol samting we Jeova i wantem yumi blong mekem, oli no blokem yumi long wan samting we yumi nidim blong haremgud long laef!​—Dutronome 10:12, 13.

19. Eksplenem olsem wanem yumi save kasem blesing taem yumi soem respek long laef mo blad.

¹⁹ ?Yu ting se i wan samting we i strong tumas long yumi, blong respektem laef mo blad olsem wan tabu samting? !No gat! Tingbaot samting ya. ?Taem yumi no kasem kansa blong waet leva from fasin blong smok tabak, samting ya i strong tumas long yumi? ?Taem tingting mo bodi blong yumi i no kam slef blong ol drag we oli save spolem bodi blong yumi, samting ya i strong tumas long yumi? ?Taem yumi no kasem AIDS, hepataetas, no wan narafala sik from blad transfyusen, samting ya i strong tumas long yumi? I klia se, taem yumi stap longwe long ol fasin ya we oli save mekem yumi harem nogud, samting ya i givhan bigwan long yumi.​—Aesea 48:17.

20. ?Olsem wanem wan famle i kasem blesing taem oli gat sem tingting olsem God long saed blong laef?

²⁰ Tingbaot store ya. Sam yia bifo, long wan naet, wan Wetnes woman we i gat bel blong tri manis haf i stat lusum tumas blad, nao oli tekem hem i go kwiktaem long hospital. Taem wan dokta i jekemap hem finis, woman ya i harem storeyan blong dokta ya wetem nes se, bambae oli mas endem laef blong pikinini we i stap insaed long bel blong hem. Be from we Wetnes ya i save tingting blong Jeova long saed blong laef blong pikinini we i no bon yet, hem i no wantem se oli kilim pikinini ya i ded. Hem i talem long dokta, se: “!Sipos hem i laef, livim hem i stap!” Wanwan taem bakegen, hem i lusum blad. Sam manis biaen, hem i bonem wan smol boe we bodi blong hem i gud nomo, bifo long stret taem we hem i mas bon. Naoia, boe ya i gat 17 yia. Wetnes ya i eksplenem se: “Mi talem olgeta samting ya long boe blong mitufala, mo hem i talem se hem i glad we oli no bin sakem hem long tin doti. Hem i save se hem i laef from wan samting nomo, hemia se mitufala i stap ona long Jeova.” !Tru ya, tingting we i olsem tingting blong God long saed blong laef, i no wan samting we i strong tumas long famle ya!

23, 24. ?Olsem wanem yumi save eksplenem se i no strong tumas blong mekem wok blong Jeova tugeta wetem ol man blong hem we oli wok folem wan plan?

²³ ?Yu ting se i strong tumas long yumi blong mekem wok blong Jeova tugeta wetem ol man blong hem we oli wok folem wan plan? !No gat! Defren nao, i wan bigfala blesing taem famle blong ol Kristin brata mo sista raonabaot long wol oli soem lav mo sapot long yumi. (1 Pita 2:​17) Traem tingbaot sipos yu stap long wan sip mo sip ya i draon, nao yu stap traehad blong swim long solwora. Yu swim gogo yu harem se yu no moa gat paoa blong gohed. Nao wan man i kam long wan laefbot, mo i pusum han blong hem i kam long solwora blong sevem yu. !Yu luksave nao se, i gat sam narafala man we oli laef i stap yet! Insaed long laefbot, yu mo ol narafala, yufala evriwan i serem wok ya blong pul i go soa. Long rod blong yufala, yufala i pikimap sam narafala man we oli laef i stap yet.