“Nao mi luk nyufala heven wetem nyufala wol, tufala i stap. Heven mo wol we tufala i stap fastaem, tufala i lus finis, mo i no moa gat solwora i stap. Nao mi luk bigfala taon ya we i tabu, we hemia nyufala Jerusalem ya. Hem i kamaot long God, i aot long heven i kam, nao hem i flas gud, i olsem woman we bambae i mared, we oli flasem hem gud blong i go long man blong hem. Nao mi harem wan tok we i kamaot long bigfala jea blong God, we i singaot bigfala, i talem se ‘!Yu luk! Naoia God i mekem ples blong hem wetem ol man [Haos tapolen blong God i stap wetem ol man, NW]. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.’ Nao man ya we i stap sidaon long bigfala jea blong hem, hem i talem se ‘!Yu luk! Mi mi stap mekem olgeta nyufala samting.’ Nao hem i talem long mi bakegen, i se ‘Yu raetem tok ya, from we tok blong mi i tru, mo ol man oli save bilif long hem.’”​—Revelesen 21:​1-5.

Promes ya i no kam long wan man, hem i kam long God hem wan. Hem nao i talem se ol blesing ya bambae oli kamtru. Hem i talem se: “!Yu luk! Mi mi stap mekem olgeta nyufala samting.” Yes, mo Jeova God i talem long aposol Jon, i se: “Yu raetem tok ya, from we tok blong mi i tru, mo ol man oli save bilif long hem.”