Wael Animol We i Gat Seven Hed Long Revelesen Japta 13, ?Hem i Minim Wanem?

Ansa we Baebol i givim

Wael animol we i gat seven hed we Revelesen 13:1 i tokbaot, i minim politik sistem blong fulwol.

• Wael animol ya i “kamaot long solwota,” hemia ol man we oli no stap kwaet, we olgeta nao oli putumap ol gavman.—Revelesen 13:1; Aesea 17:12, 13.

“Ten hon mo seven hed”

Baebol i yusum sam namba blong pijarem sam samting. Eksampol, ten mo seven i minim samting we i fulwan. Sipos yumi wantem kasemsave stret mining blong ol “ten hon mo seven hed” blong wael animol long Revelesen japta 13, yumi mas kasemsave long wan narafala wael animol we Revelesen i tokbaot biaen. Animol ya i red, i gat seven hed mo ten hon, mo hem i “pija blong wael animol.” (Revelesen 13:1, 14, 15; 17:3) Baebol i talem se ol seven hed blong red animol ya, oli minim “seven king,” o gavman.—Revelesen 17:9, 10.

Long sem fasin, ol seven hed blong wael animol long Revelesen 13:1 i minim seven gavman: hemia ol men politik paoa we oli bin rul antap long ol nesen tru long histri, mo oli stap bos strong antap long ol man blong God, i gat Ijip, Asiria, Babilon, Media mo Pesia, Gris, Rom, mo Inglan mo Amerika. Sipos yumi talem se ol ten hon oli minim olgeta kingdom nomata se oli smol o bigwan, i stret tu blong talem se ol hat blong king we i stap long ol hon ya wanwan, oli soem se ol nesen ya wanwan oli stap rul long semtaem wetem men politik paoa we i stap rul long taem ya.

Laswan buk blong Baebol i talem se, 666 i wan namba o nem blong wael anamol ya we i kamaot long solwota we hem i gat seven hed mo ten hon. (Revelesen 13:1, 17, 18) Wael anamol ya i pija blong politik sistem blong wol, we i gat paoa long ‘olgeta laen, mo olgeta grup blong man, mo olgeta lanwis, mo olgeta kantri.’ (Revelesen 13:7) Nem ya 666 i soem se politik sistem ya i no naf nating long lukluk blong God. ?Olsem wanem yumi save samting ya?