• Revelesen i Tokbaot Samting We Bambae i Hapen Long Ol Enemi Blong God
    Wajtaoa (Stadi)—2022 | Mei

    • SAMTING WE I SOEMAOT KLIA OL ENEMI BLONG GOD

      Wael animol ya we i gat seven hed we Revelesen i tokbaot, i kamaot long solwota. Hem i gat ten hon mo ten smol hat blong king long ol hed ya, mo hem i luk olsem wan leped. Leg blong hem i olsem blong wan bea, mo maot blong hem i olsem blong wan laeon.

      WAEL ANIMOL WE I GAT SEVEN HED

      Hem i “kamaot long solwota” mo hem i gat seven hed, ten hon, mo ten smol hat blong king. (Rev. 13:1-4) Hem i pijarem olgeta politik paoa we oli bin rul kam kasem naoia. Ol seven hed ya oli pijarem seven wol paoa we oli bin rul mo mekem i nogud long ol man blong God. (Haf 6-8)

      6. ?Wael animol we i gat seven hed we Revelesen 13:1-4 i tokbaot, i minim wanem?

      6 ?Wael animol we i gat seven hed i minim wanem? (Ridim Revelesen 13:1-4.) Yumi makem se wael animol ya i luk olsem wan leped, be leg blong hem i olsem blong bea, mo maot blong hem i olsem blong laeon, mo hem i gat ten hon. Ol samting ya i stap tu long ol fo animol we Daniel japta 7 i tokbaot. Be Revelesen i tokbaot wan animol nomo, we i gat evri samting ya long hem. Wael animol ya i no representem wan gavman nomo o wan wol paoa. Jon i talem se wael animol ya i stap rul antap “long ol man blong olgeta traeb, mo blong olgeta grup blong man, mo blong olgeta lanwis, mo blong olgeta kantri.” So hemia i min se hem i strong moa i bitim eni narafala gavman. (Rev. 13:7) Taswe, wael animol ya i representem evri politik paoa we oli bin stat rul bifo kam kasem tede.b—Pri. 8:9