25. (a) ?Wanem mining blong ol samting we i stap insaed long “kap we oli wokem long gol, we i fulap long ol samting nogud”? (b) ?Olsem wanem woman blong rod ya i fuldrong?

²⁵ Lukluk samting we woman blong rod ya i holem long han blong hem. Ating Jon i sapraes tumas taem hem i luk samting ya—wan kap we oli wokem long gol, “we i fulap long ol samting nogud, we oli doti tumas.” Kap ya we i gat “frut blong ol fasin nogud blong hem” i stap long hem, woman ya i fosem ol nesen blong dring long hem. (Revelesen 14:8; 17:2) Afsaed hem i luk olsem hem i sas, be insaed hem i fulap long ol fasin nogud, we oli doti tumas. (Ridim Matyu 23:25, 26.) Hem i fulap long ol rabis fasin no gyaman toktok we woman ya blong rod i yusum blong pulum ol nesen oli kam aninit long paoa blong hem. Samting we i moa nogud, Jon i luk se woman ya blong rod hem i fuldrong, from we hem i dring blad blong ol man blong God. Biaen, vison ya i talem se “oli faenem we blad blong ol profet mo blad blong ol man blong God i stap long hem . . . blad blong olgeta man we ol man oli kilim olgeta, be i stap long ples ya Babilon.” (Revelesen 18:24) !Fol blong hem long fes blong God i bigwan we i bigwan!

26. ?Wanem i soemaot se Bigfala Babilon i gat fol long fes blong God from blad blong ol man?

²⁶ Long ol handred yia we oli pas finis, olgeta gyaman skul long wol oli mekem fulap fulap blad i ron. Eksampel, long Japan bifo, ol tempel long taon ya Kyoto, oli mekem olgeta olsem ol ples blong haed long taem blong faet. Ol pris blong skul ya we oli soldia tu, oli singaot long “tabu nem blong Buda,” nao oli faetem olgeta bakegen gogo blad blong olgeta i ron olsem wan reva long ol rod. Long laswan handred yia, ol lida blong Krisendom oli maj wetem ol ami blong ol kantri blong olgeta wanwan. Ol ami ya oli kilim olgeta bakegen, gogo bitim wan handred milyan man oli ded. Long Oktoba 1987, presiden blong Amerika bifo, Nixon, i talem se: “Long laswan handred yia, i gat moa blad i ron i bitim olgeta yia bifo. I gat moa man we oli ded long ol faet long laswan handred yia i bitim ol faet bifo.” God i jajem ol skul blong wol from we oli joen long ol faet ya. Jeova i no laekem nating “han we i kafsaedem blad blong gudfala man.” (Proveb 6:16, 17) Bifo finis, Jon i harem wan voes i kraeaot long olta i se: “Hae God, yu yu gat olgeta paoa. Yu tabu, mo yu tru. Plis yu no moa wet, yu jajem ol man long wol, yu givim panis long olgeta, from we oli kilim mifala i ded.” (Revelesen 6:10) Bigfala Babilon, we hem i mama blong olgeta woman blong rod mo blong ol fasin nogud, bambae hem i kasem panis blong hem fulwan, taem i mas talemaot ol samting we hem i mekem long fes blong God.

1. (a) ?Taem Jon i luk rabis woman blong rod i sidaon long wael anamol we i nogud, hem i tingting wanem? ?From wanem? (b) ?Grup we i olsem Jon tede, oli mekem wanem taem oli luk we ol profet tok blong vison ya i stap kamtru naoia?

?TAEM Jon i luk woman blong rod ya i sidaon long anamol we i nogud, hem i tingting wanem? Hem wan i ansa se: “Nao taem mi luk woman ya, mi sapraes tumas.” (Revelesen 17:6b) Samting we hem i luk i bitim ol samting we man nomo i save tingbaot. !Long fored blong hem, long drae ples, wan rabis woman blong rod i stap sidaon long wan wael anamol we i red we i red, i nogud olgeta! (Revelesen 17:3) Grup olsem Jon tede, olgeta tu oli sapraes tumas long ol samting we oli stap kamtru naoia stret long profet tok long vison ya. Sipos ol man blong wol oli save luksave mining blong hem, bambae oli talem se, ‘!Mifala i no save bilivim!’ Mo sipos ol rula blong wol oli save luksave mining blong hem, bambae oli talem se, ‘!I bitim tingting blong mifala!’ Be long laswan handred yia, vison ya i no moa wan vison nomo, hem i rili tru. Ol man blong God oli mekem plante samting finis blong joen long vison ya, mo samting ya i mekem tingting blong olgeta i strong moa se ol narafala haf blong hem bambae oli kamtru fulwan.