• Traehad Blong Win Long Faet Ya
    Revelesen—Nambawan En

    • 3. (a) ?Olsem wanem Jisas i leftemap tingting blong olgeta Kristin long Smana? (b) ?Nating we ol Kristin long Smana oli puaman, be from wanem Jisas i talem se oli “rijman”?

      3 “Mi mi save finis ol trabol blong [yu]. Mi save we [yu yu] puaman, be i tru, [yu yu] rijman ya. Mo mi save ol rabis tok blong olgeta ya we oli stap tok nogud long [yu]. Oli stap talem se oli man Isrel, be oli stap gyaman. Haos blong prea blong olgeta i haos blong prea blong Setan stret.” (Revelesen 2:9) Jisas i no talem wan poen nating agens long ol brata blong hem long Smana. Hem i leftemap tingting blong olgeta nomo long kaengud fasin. Olgeta oli kasem plante trabol finis from bilif blong olgeta. Oli no gat plante samting long saed blong bodi, oli puaman nomo, ating from we oli stap holemtaet bilif blong olgeta. (Hibrus 10:34) Ol samting long saed blong speret oli bigfala samting long laef blong olgeta. Olgeta oli stap hivimap ol gudgudfala samting long heven, olsem Jisas i bin talem. (Matyu 6:19, 20) Taswe Bigfala Man blong Lukaot long Sipsip i talem long olgeta se, tru, olgeta oli “rijman.”—Skelem wetem Jemes 2:5.

      4. ?Hu i mekem bigfala trabol agens long ol Kristin long Smana? ?Mo Jisas i tingting olsem wanem long ol man we oli agensem olgeta?

      4 Wan samting we Jisas i makem: Ol Kristin long Smana oli bin stanap strong long trabol we ol man Isrel oli bin mekem long olgeta. Bifo long taem ya, plante man blong skul blong ol man Isrel oli agensem strong ol man we oli stap tijim Kristin bilif. (Ol Wok 13:44, 45; 14:19) Naoia, sam yia nomo biaen we ol enemi oli spolem taon ya Jerusalem, ol man Isrel ya long Smana oli stap soemaot sem fasin bakegen, we Setan nomo i stampa blong hem. !Yumi luksave from wanem Jisas i talem se haos blong prea blong olgeta i “haos blong prea blong Setan stret”!a

  • Traehad Blong Win Long Faet Ya
    Revelesen—Nambawan En

    • a Samwe long 60 yia biaen long ded blong Jon, wan man, nem blong hem Polycarp, hem i ded long Smana, taem i gat 86 yia blong hem. Oli bonem bodi blong hem gogo hem i ded from we oli no save fosem hem blong lego bilif blong hem long Jisas. Samwe long taem ya, oli raetem wan buk we nem blong hem Oli Kilim Polycarp i Ded (Hae Martyrdom of Polycarp). Buk ya i talem se taem oli stap karem faeawud blong mekem faea blong bonem hem, “ol man Isrel oli wok strong blong givhan long olgeta we oli stap karem faeawud. Oltaem ol man Isrel oli mekem olsem.” Oli mekem olsemia, nating we ol man oli kilim man ya i ded long “wan bigfala Sabat dei.”