!Kasem Olgeta Trutok!

WAN Wetnes blong Jeova we i stap toktok wetem Francisco i talemaot nem blong Jeova long hem. Nao Francisco i talem se: “Mi mi neva luk nem ya long Baebol blong mi.” Man ya i tru nomo from we long Baebol blong hem we oli wokem long 1969, (Baebol Almeida, long lanwis Potugal) nem blong Jeova i no gat long hem. Francisco i wan man Brasil we i joen long Katolik jyos. Hem i go long skul evri Sande mo hem i laekem tumas blong ridim Baebol long haos blong hem. Be nao, hem i wantem save trutok long nem ya Jeova.

?God​—Hem i hu?

Long wik afta, Wetnes ya i tekem wan narafala Baebol blong ‘Almeida’ we oli wokem long 1966, mo i gobak long haos blong Francisco. Tufala i lukluk ol tok we tufala Baebol ya i talem long Sam 83:18. ?Tufala i makem wanem? Long Baebol blong 1966, vas ya i olsem: “!Yu, we nem blong yu nomo i JEOVA, yu yu Hae God long graon!” Be long Baebol blong 1969, oli tekemaot nem blong “JEOVA,” mo oli putum “MASTA” long ples blong hem. Ale, Wetnes ya i talem se: “Yu luk, oli jenisim wan samting long ples ya.” Mo hem i talem se: “‘Masta’ ?i no wan nem, a?” Francisco i ansa, i se “I tru, Masta i no wan nem ya.” Be hem i wantem save moa, mo hem i askem se: “?Be from wanem olgeta oli mekem olsem?”

Toktok ya i mekem se tufala i mekem sam stadi bakegen long saed blong nem blong Jeova. Francisco i lanem from wan bigfala buk (The Catholic Encyclopedia, 1910) se Jeova hem i “prapa nem blong God long Oltesteman.” Hem i lanem tu se long “Oltesteman” we bighaf blong buk ya oli raetem long lanwis blong ol man Hibru, nem blong God i kamaot kolosap 7,000 taem. I no gat wan man blong tanem tok i gat raet blong tekemaot prapa nem blong God, ale i putum ‘Masta’ long ples blong hem. Francisco i wantem save trutok long saed blong nem blong Jeova. Hem i kasem save ya from we hem i lukluk long Baebol fastaem mo wan man i givhan long hem.

?Jisas Hem i God, No No Gat?

Olsem we yumi luk long faswan haf, ol jyos oli jenisim fulap trutok blong Baebol. Long minista wok we oli mekem taem oli pas long olgeta doa wanwan, ol Wetnes blong Jeova oli gat jans blong save long ol bilif blong ol man we oli toktok wetem olgeta. I tru, sam bilif blong ol man hem i no sem mak long olgeta ples, be sam narafala bilif oli sem mak nomo long plante ples. Sipos yumi askem se: ‘?God​—Hem i hu?,’ maet plante man bambae oli ansa se: ‘Jisas.’ Ol man ya oli wantem talem se Jisas hem i God ya we i Gat Olgeta Paoa. ?Be bilif olsem i stret, no i no stret?

Traem tingtinggud long ol poen ya. Taem Jisas i prea long Papa blong hem, hem i talem se: “Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3) Jisas i no talem se hem i “God tru,” be hem i talem se Papa blong hem we i stap long heven, hem nao i “God tru.” From samting ya nao, i stret nomo we wan dei, ol faswan disaepol blong hem oli talem long hem, i se: “Tru, yu yu Pikinini blong God.” Jisas hem wan i talem se: “Mi mi Pikinini blong God.” Taswe, trutok long saed blong Jisas i olsem: Hem i no God ya we i gat Olgeta Paoa, be hem i Pikinini blong Jeova God nomo.​—Matyu 14:33; Jon 10:36.

?Bambae Wanem i Hapen Long Wol Ya?

?Bambae wanem i hapen long ol man we oli laef long taem blong yumi mo wanem i hapen long wol ya blong yumi? John F. Kennedy, presiden blong Amerika blong bifo, i bin mekem wan tok long Bigfala Asembli blong Yunaeted Nesen, mo hem i talem se: “Yumi gat inaf paoa blong mekem se laef blong ol man we oli laef long taem blong yumi i gudwan moa bitim olgeta man we oli laef long histri, no yumi gat paoa blong mekem se olgeta man oli lus evriwan.” Ol lida blong wol tede oli agri long poen ya. Long minista wok blong olgeta, ol Wetnes blong Jeova oli harem oltaem ol man oli stap talem se long en blong wol, graon bambae i lus from we faea i kakae hem no from wan nyuklia faet. Samfala oli stanemap bilif blong olgeta long vas blong Revelesen 21:​1 we i talem se: “Nao mi luk nyufala heven wetem nyufala wol, tufala i stap. Heven mo wol we tufala i stap fastaem, tufala i lus finis, mo i no moa gat solwora i stap.”

Be taem Baebol i yusum tok ya “wol,” samtaem hem i minim ol man we i stap long wol. Jenesis 11:1 (NW) i soemaot samting ya. Long vas ya, Baebol i talem se: “Kam kasem taem ya, olgeta wol i wan lanwis nomo, mo olgeta tok we oli yusum oli sem mak nomo.” (Ridim tu 1 King 2:​1, 2; Ol Sam 96:1.) “Wol we i stap fastaem” we Revelesen 21:1 i tokbaot i no minim wol we yumi stap long hem, be i minim olgeta man we oli nogud. Olgeta bambae oli mas lus. Taem we God i finisim ol rabis man ya finis, bambae hem i putum Paradaes long wol bakegen. (Luk 23:43; 2 Tesalonaeka 1:​6-9; Revelesen 21:4) Ol tok ya we yumi jes talem oli stret gud wetem olgeta tok blong Baebol we oli talem se wol ya bambae i neva lus. Long Sam 104:​5, Baebol i talem se God i “putum wol ya i stap strong long fandesen blong hem, we bambae hem i no save muf nating, gogo i no save finis.” (Ridim Eklesiastis 1:4.) Yes, Jeova ‘i mekem wol ya blong ol man oli save stap long hem’ blong olwe.​—Aesea 45:18.

?From Wanem Yumi Mas Save Olgeta Trutok?

Hemia sam eksampel nomo blong ol gyaman bilif we oli fulap long wol tede. Be taem ol Wetnes blong Jeova oli faenem wan man we i rere blong tingtinggud, olsem Francisco, oli glad tumas blong toktok wetem hem long ol trutok blong Baebol.

Sipos yumi no kasem save long olgeta trutok, fasin ya i save mekem trabol long yumi biaen. Hemia wan eksampel: Taem we Jisas i stap long wol, plante man oli bilif se hem i jes wan pikinini blong Meri mo Josef nomo, wan man we i mekem kapenta long Nasaret nomo. From samting ya, oli no tinghae long hem tumas. Mo i tru, Jisas hem i pikinini blong Meri, we tabu speret nao i mekem se hem i bon olsem man long wol. Mo tu, i tru we Josef i lukaot long hem olsem we hem i stret pikinini blong hem, mo tu hem i rili wok olsem wan kapenta. (Mak 6:3) ?Be olsem wanem, hemia olgeta trutok long saed blong hem? !No gat! !Hem i Mesaea, mo hem i mas kam “King blong ol king”! (Revelesen 17:14; Luk 1:​32-35; Ol Wok 2:36) From we oli no kasem olgeta trutok long saed blong Jisas, plante man oli mestem bigfala jans blong frengud wetem Jisas taem hem i stap long wol.

Yumi Lukaot Olgeta Trutok

Olgeta we oli ridim Baebol oli save gud long Berea (we nem blong hem naoia Veroia), wan taon blong Masedonia bifo. Long faswan handred yia, ol man we oli stap long taon ya oli gat gudfala fasin long saed blong Baebol. ?Oli gat wanem gudfala fasin? Baebol i talem se: “Oli wantem tumas blong harem tok blong tufala, mo evri dei, oli stap ridimgud ol tok blong Baebol, blong traem save ol tok blong tufala, oli tru no oli no tru.” ?Oli kasem wanem gudfala frut from fasin blong ol? Baebol i talem se: “Nao plante man long olgeta oli bilif long Jisas. Mo plante woman Gris we oli lida blong ol woman, mo plante man Gris tu oli bilif long hem.”​—Ol Wok 17:​11, 12.

Tingting blong ol profet blong God long taem bifo i gudwan tu. Olgeta oli ‘stap lukaot rod ya we God bambae i yusum blong sevem ol man,’ oli mekem dip stadi blong kasem save long Mesaea, mo olsem wanem hem i mas kam. (1 Pita 1:10) God i blesem ol hadwok we olgeta oli mekem. Yes, i gat wan rod nomo blong kasem olgeta trutok. Yumi mas mekem dip stadi long ol samting we Baebol i tijim, mo yumi mas tingtinggud long olgeta.

Maet long tingting blong yu, yu wantem save, se: ‘?Bambae mi mas mekem wanem?’ Afta we hem i ridim sam buk we i tokbaot Baebol, wan woman we i laef long Brasil i raetem wan leta, i se: “Mitufala [hem mo hasban blong hem] i luksave se mitufala i nidim moa save blong kasem wan ansa long olgeta kwestin we mitufala i gat. . . . Plis yufala i talem long mi olsem wanem mi save gat wan Baebol mo sam narafala buk we i save givhan long mi blong save moa long Papa blong yumi long heven.” Woman ya i stap long gudfala rod: I tru se yumi mas ridim Baebol mo ol narafala buk we oli rili talemaot ol trutok blong Baebol. Sipos yu tu yu wantem save long trutok fulwan, yu save openem hat blong yu long Jeova God mo askem long hem blong hem i halpem yu. Tingbaot gudfala tok ya we i save leftemap tingting blong yumi: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem. From we fasin blong God, hem i no save tok nogud long man we i askem samting long hem, hem i stap givim presen long ol man long gladhat blong hem. Be taem yufala i prea, yufala i mas bilif tru, we tingting blong yufala i no hafhaf.”​—Jemes 1:​5, 6.

Plante milyan man oli mekem stadi long Baebol wetem ol Wetnes blong Jeova. Ale, olgeta oli traehad blong lukaot ol trutok mo oli mekem dip stadi blong faenem olgeta. Sipos yu kasem save long God mo Jisas Kraes, mo yu mekem save ya i wok long laef blong yu, bambae yu save kasem laef ya we i no save finis. (Jon 17:3) Yes, sipos yu yu lukaotgud mo yu faenem olgeta trutok, bambae yu save gat hop olsem.

[Tok Blong Pija Long Pej 7]

Bigfala trutok long saed blong Jisas, se hem i no jes wan kapenta nomo. Hem i Mesaea