Hemia we i Wokem olgeta samting, Jeova, hem i stampa blong trufala save. Man we i fraet gud long God hem i save lukluk olgeta samting long klia tingting mo blong kasem ol stret ansa long ol samting ya.​—Proveb 1:7.

⁶ Nao Pita i talem se: ‘Yufala i mas traehad blong mekem fasin blong yufala i kam gud moa. Yufala i gat fasin blong bilif, ale yufala i mas joenem long stret fasin. Yufala i gat stret fasin, ale yufala i mas joenem long save. Yufala i gat save, ale yufala i mas joenem long fasin blong bos long tingting. Ale yufala i mas joenem fasin blong stanap strong longtaem long fasin blong bos long tingting. Ale yufala i mas joenem fasin fasgud long God long fasin blong stanap strong longtaem. Ale yufala i mas joenem fasin blong laekem tumas ol brata blong yufala long fasin fasgud long God. Yufala i gat fasin blong laekem tumas ol brata blong yufala, ale yufala i mas joenem long fasin blong laekem tumas ol man. Sipos yufala i gat ol fasin ya oli strong long laef blong yufala, be bambae yufala i no save stap nating. Bambae yufala i save karem frut long laef blong yufala, olsem we yufala i save moa Jisas Kraes, Masta blong yumi.’ (2 Pita 1:​5-8)b Long nekis japta, yumi ridim se fasin ya blong kasem save i givhan long ol man blong oli ronwe long ol doti fasin blong wol ya. (2 Pita 2:20) Olsem nao Pita i makem i klia se olgeta ya we oli kam Kristin oli nidim save, sem mak olsem olgeta ya we oli stap mekem wok blong Jeova finis. ?Yu yu wan long tufala grup ya?

Kasem Save, Talem Bakegen, Yusum

7. ?Olsem wanem plante man oli kasem stret save long stampa trutok blong Baebol?

⁷ Maet yu yu gat wan Baebol stadi wetem ol Wetnes blong Jeova from we yu luksave klia trutok long mesej blong olgeta. Wan taem long wan wik, long wan haoa no samting olsem, yu stadi long wan poen long Baebol, yu yusum ol buk blong givhan long yu olsem buk ya Yu Save Laef Foreva Long Paradaes Long Wol. !Nambawan! Plante man we oli gat stadi olsem wetem ol Wetnes blong Jeova oli kasem stret save. ?Be, wanem samting yu save mekem blong kam antap moa long save we yu wan yu stap lanem? Hemia sam advaes:c

8. ?Taem studen i mekem rere long wan stadi, hem i save mekem wanem blong hem i kasem save moa?

⁸ Fastaem, taem yu mekem rere stadi blong yu, lukluk gud long stadi ya we bambae yu kavremap. Hemia i min se yu lukluk stampa tok blong japta, ol smosmol stampa tok, mo eni pija we oli yusum blong eksplenem stadi ya. Nao, taem yu ridim wan haf no wan pej blong magasin no buk ya, traem faenem ol impoten tingting mo ol vas we oli sapotem, makem laen aninit no makem long kala. Blong luk sipos yu kasem save ol trutok we yu kavremap, traem blong ansa long ol kwestin ya long ol defren haf. Taem yu mekem olsem, traem ansa long prapa toktok blong yu. Biaen, mekem tingting bak long stadi ya, traem blong rimemba ol bigfala poen mo ol toktok we oli sapotem ol bigfala poen ya.

9. ?Olsem wanem fasin blong folem ol advaes long saed blong stadi bambae i givhan long man blong kasem save moa?

⁹ Yu save ting se bambae yu kam antap moa long save sipos yu folem ol advaes ya. ?From wanem? Wan risen se, bambae yu stadi long haf ya wetem wan strong tingting blong kasem save, i olsem we yu stap mekem rere graon blong yu planem sid. Taem yu kasem ful tingting blong haf ya mo biaen yu lukaotem ol bigfala poen mo ol tingting we oli sapotem, bambae yu luk olsem wanem ol poen oli laenap wetem stampa tok no ol bigfala tingting insaed long hem. Laswan tingting bak bambae i givhan long yu blong stap tingbaot samting we yu bin stadi long hem. ?Wanem bambae i givhan long yu biaen, taem yu stap mekem Baebol stadi blong yu?

10. (a) ?From wanem fasin blong talem bakegen nomo ol trufala samting no ol nyufala save i no save givhan bigwan? (b) ?Wanem samting yu save mekem taem yu mekem “smol spel blong tingting bak”? (c) ?Olsem wanem ol pikinini boe blong ol man Isrel oli kasem blesing from fasin blong talem bakegen?

¹⁰ Ol man we oli savegud long saed blong edukesen oli save se, fasin blong talem bakegen ol toktok from i gat risen, mo long wan stret taem blong hem i impoten tumas. Hemia i no wan fasin blong talem bakegen toktok nomo, we maet yu stap mekem long skul taem yu stap lanem sam nem, ol impoten samting, no tingting long memori blong yu. ?Be, yu yu faenem se i no longtaem biaen yu fogetem samting we yu stap talem oltaem bakegen, we kwiktaem hem i no moa stap long memori blong yu? ?From wanem? Fasin blong jes talem bakegen wan nyufala wod no samting we i tru i save mekem man i les, mo biaen oli no save stap longtaem long tingting. ?Wanem i save jenisim samting ya? Fasin blong yu blong rili wantem kasem save i save givhan. Narafala impoten samting se i mas gat risen blong talem bakegen toktok. Sam menet afta we yu lanem wan poen, bifo we poen ya i aot long memori blong yu, traem tingting gud bakegen long hem. Oli kolem samting ya “fasin blong stap spel smol blong tingting bak.” Taem yu mekem poen ya i kambak long memori blong yu bifo we poen i lus, yu mekem se tingting ya i save stap longtaem moa long memori blong yu. Long Isrel, ol papa oli mas tijim ol loa blong God long ol pikinini boe blong olgeta. (Dutronome 6:​6, 7) “Tijim” i minim tij wetem fasin blong talem bakegen. Ating, fastaem plante long ol papa ya oli talem ol loa ya long ol pikinini boe blong olgeta; biaen oli talem bakegen; mo samtaem biaen oli askem kwestin long ol pikinini boe blong olgeta long ol samting ya we oli bin lanem.

11. ?Wanem samting yu save mekem long taem blong Baebol stadi blong mekem se yu kam antap moa long fasin blong kasem save?

¹¹ Sipos wan Wetnes i stap mekem wan Baebol stadi wetem yu, hem i save givhan long yu blong kasem save taem hem i spel smol blong mekem tingting bak long ol poen we yu kavremap taem yu stap mekem stadi. Fasin ya i no blong pikinini. Hemia i wan teknik we i mekem fasin blong kasem save i kamgud moa, taswe i gud we yu glad blong joen long taem ya blong tingting bak. Nao, long en blong stadi ya, joen blong ansa long laswan tingting bak we ansa blong yu i kamaot long memori nomo. Maet long prapa toktok blong yu, eksplenem ol poen ya olsem we bambae yu mekem taem yu tijim narafala man. (1 Pita 3:15) Samting ya bambae i givhan blong mekem wanem yu lanem i stap oltaem long memori blong yu.​—Lukluk Ol Sam 119:​1, 2, 125; 2 Pita 3:1.

12. ?Wan studen i save mekem wanem blong kam gud moa long memori blong hem?

¹² Narafala step blong givhan long yu se, bifo we tu dei i pas, bambae yu talem wanem yu lanem long wan narafala man, maet long wan skulfren blong yu, wan wokfren blong yu, no wan fren we i stap laef kolosap long yu. Yu save talem stampa poen mo biaen talem se yu jes wantem nomo blong luk sipos yu save rimemba ol impoten tingting no vas blong Baebol we oli sapotem poen ya. Samting ya i save wekemap intres blong narafala. Nating sipos i no wekemap intres, be fasin blong talem bakegen nyufala save afta long wan no tu dei bambae i mekem save ya i stap gud long memori blong yu. Nao bambae yu rili kasem save, yu mekem samting ya we 2 Pita 3:18 i talem.

Mekem Tingting i Wok Blong Kasem Save

13, 14. ?From wanem yumi wantem go moa bitim fasin ya blong kasem mo tingbaot ol save?

¹³ Fasin blong kasem save i no jes save long ol samting we oli tru no fasin blong talem bakegen ol poen we yu kasem. Ol man blong skul long taem blong Jisas oli stap mekem olsem wetem ol prea we oli stap talem bakegen oltaem. (Matyu 6:​5-7) ?Be olsem wanem save ya i gat paoa long olgeta? ?Olsem wanem, oli stap wokem ol stret fasin long laef blong olgeta? No gat. (Matyu 7:​15-17; Luk 3:​7, 8) Wan long ol trabol se save ya i no go insaed long hat blong olgeta, blong mekem se oli save gat ol gudfala fasin.

¹⁴ Pita i talem se, samting ya i mas defren long ol Kristin long taem ya bifo mo tede tu. Hem i talem long yumi blong joenem save ya wetem bilif blong yumi we bambae i givhan long yumi blong yumi no stap nating no yumi save karem frut long laef blong yumi. (2 Pita 1:​5, 8) Blong samting ya i kamaot olsem long yumi, yumi mas wantem blong gru moa long saed blong save mo yumi wantem se save ya i mas kasem gud yumi, i tajem hat blong yumi. Samting ya maet i no stap hapen oltaem.

15. ?Wanem trabol i kamaot long sam man Isrel we oli Kristin?

¹⁵ Long taem blong Pol ol man Isrel we oli Kristin oli gat wan trabol long saed ya. From we oli man Jyu, oli gat sam save finis long Baebol. Oli save long Jeova mo ol rul blong hem. Biaen oli kasem moa save long saed blong Mesaea, oli soem we oli gat bilif, mo oli bin baptaes olsem ol Kristin. (Ol Wok 2:​22, 37-41; 8:​26-36) Yumi save se long ol manis mo ol yia we oli pas, oli mas go long ol Kristin miting, long ples ya oli save joen blong ridim Baebol mo givim sam toktok. Nating se i olsem, sam long olgeta oli no gru long saed blong save. Pol i raetem se: “Longtaem finis nao, yufala i harem ol tok we God i talem, i naf nao blong yufala i tij long hem. Be yufala i no save, nao i mas gat sam man yet blong tijim yufala long stampa blong ol tok ya. I olsem we yufala i gobak bakegen, we yufala i no save kakae strong kakae, yufala i stap dring melek nomo.” (Hibrus 5:12) ?Olsem wanem samting ya i save kamaot? ?Hem i save hapen tu long yumi?

16. ?Wanem ya pemafros, mo olsem wanem hem i spolem ol tri?

¹⁶ Olsem wan eksampel, tingbaot pemafros, hemia graon we i strong oltaem from kolkol olsem long Artik mo long ol narafala ples we i kolkol bitim mak. Ol ston, graon mo wora aninit long graon oli kam wan strongfala aes, samtaem i strong olsem kasem 900 mita aninit long graon. Long hot taem, graon antap nomo i kam sofsof (oli kolem, gudfala graon). Be, pis graon ya antap, oltaem hem i stap olsem sofmad from we wora i no save kamaot tru long pemafros we i stap aninit. Ol tri we oli gru long smol pis graon ya antap, plante taem oli smol nomo no oli no moa save gru; rus blong olgeta oli no save go insaed long pemafros ya. Maet yu tingting se, ‘?Be olsem wanem pemafros i joen wetem fasin blong gru moa long saed blong save long trutok blong Baebol?’

17, 18. ?Olsem wanem blong yusum pijatok blong pemafros mo gudfala graon antap long hem blong soem samting we i kamaot long sam man Isrel we oli Kristin?

¹⁷ Pemafros i soemaot gud man we i stap be tingting blong hem i no wok, blong i kasem, tingbaot, mo yusum stret save. (Lukluk Matyu 13:​5, 20, 21.) Ating man ya i naf long bren blong hem blong kasem save ol defren samting, olsem trutok blong Baebol. Hem i bin stadi “long stampa blong ol tok ya [blong God]” mo maet hem i kasem mak blong baptaes, olsem ol man Isrel ya we oli Kristin. Be, maet hem i no ‘go stret long ol tok we i blong mekem hem i kam bigman long Kraes,’ blong hem i “livim ol tok ya blong stampa blong bisnes blong Kraes i stap fastaem.”​—Hibrus 5:12; 6:1.

¹⁸ Traem tingbaot ol Kristin ya long ol miting long taem ya bifo. Oli stap long ol miting mo oli wekap gud, ?be oli stap yusum tingting blong olgeta blong kasem save? ?Oli stap mekem i wok mo traehad blong gru moa long save? Ating no. Long olgeta ya we oli no bigman long speret, eni samting we oli mekem long ol miting, i stap kamaot olsem long smol pis graon we i sofsof, be aninit i gat wan strongfala graon olsem aes we i kolkol. Ol rus blong trutok we oli strong no oli had blong kasem, oli no save go insaed long tingting ya we i strong olsem pemafros.​—Lukluk Aesea 40:24.

19. ?Olsem wanem tede wan Kristin we i gat ekspiryens i save kam olsem ol man Isrel we oli Kristin?

¹⁹ Samting ya i save hapen tu long wan Kristin tede. Nating se hem i stap long ol miting maet hem i no yusum ol taem ya blong hem i gru moa long saed blong save. ?Olsem wanem sipos hem i ansa long ol miting? Long ol nyuwan no ol pikinini, maet oli rili traehad blong ridim wan vas long Baebol no ansa wetem ol toktok we oli stap long haf, hemia i soemaot wan gudfala wok we oli naf blong mekem. Be Pol i soem se long saed blong ol narafala man, from we oli stap longtaem finis olsem Kristin man, olgeta ya oli mas go moa bitim faswan fasin ya blong ansa sipos oli wantem gru moa long saed blong save.​—Hibrus 5:14.

20. ?Yumi mas askem wanem kwestin long yumi wanwan?

²⁰ Sipos wan Kristin we i gat ekspiryens i neva go moa bitim fasin ya blong ridim nomo wan vas long Baebol no ridim nomo wan ansa we i stap long haf, hemia i olsem se ol ansa blong hem oli kamaot antap nomo long “gudfala graon” we i no stap dip long tingting blong hem. Ol miting oli pas be dip paoa blong tingting blong hem i stap strong yet, olsem pijatok blong yumi long saed blong pemafros. Yumi mas askem yumi wanwan se: ‘?Mi mi olsemia? ?Mi mi letem tingting olsem pemafros i stap insaed long mi? ?Olsem wanem mi mi stap wekap fulwan long tingting mo intres fulwan blong kasem save?’ Nating se yumi no glad tumas wetem ol trufala ansa blong yumi, yumi save stat naoia blong mekem ol samting we yumi mas mekem blong gru long saed blong save.

21. ?Wanem samting we yumi bin tokbaot finis we yu save folem taem yu mekem rere ol miting no taem yu go long ol miting?

²¹ Yumi wanwan i save folem advaes we i stap long paragraf 8. Nomata sipos yumi stap joen longtaem long kongregesen no no gat, yumi save gat strong tingting blong go stret long ol tok we i blong mekem yumi kam bigman long speret mo kasem moa save. Long sam man samting ya i minim fasin traehad moa blong mekem rere miting, maet statem bakegen fasin we oli stap mekem sam yia bifo be sloslou fasin ya i godaon. Taem yu stap mekem rere, traem faenem ol impoten poen mo blong kasem save long ol vas we yu no save gud we oli yusum blong sapotem ol poen ya. Lukaotem ol nyufala poen long haf ya we yu stadi long hem. Sem mak, long miting, traem folem ol advaes we oli stap long paragraf 10 mo 11. Traehad blong wekap long tingting, olsem we yu holemtaet tingting blong yu i hot i stap. Samting ya bambae i agensem eni tingting long “pemafros” blong i no kam insaed; tingting ya blong traehad bambae i mekem tingting we i “strong olsem aes” we maet yu gat bifo, i kam sofsof.​—Proveb 8:​12, 32-34.

Save, Wan Help Blong Karem Frut

22. ?Wanem blesing bambae yumi kasem sipos yumi traehad blong kam antap moa long saed blong save blong yumi?

²² ?Bambae yumi wanwan i kasem blesing olsem wanem, sipos yumi traehad long bisnes ya blong gru long saed blong gladhat mo save long Masta mo Sevya blong yumi, Jisas Kraes? Sipos yumi traehad blong mekem tingting blong yumi i stap wekap, i rere blong tekem save i kam insaed, ol sid ya blong ol trutok long Baebol we oli nyuwan mo oli strong blong kasem save long olgeta, bambae oli mekem rus blong olgeta i go dip daon moa long yumi, mo save blong yumi bambae i kam antap moa mo stap longtaem. Bambae hem i sem mak long tok we Jisas i talem long wan narafala parabol long saed blong hat. (Luk 8:​5-12) Ol sid we oli foldaon long gudfala graon oli save mekem ol strongfala rus blong sapotem ol tri ya we oli mekem nyuwan mo karem frut.​—Matyu 13:​8, 23.

23. ?Wanem frut i save kamaot taem yumi tingting gud long 2 Pita 3:18? (Kolosi 1:​9-12)

²³ Parabol blong Jisas i defren long sam fasin, be ol gudfala frut oli sem mak long samting we Pita i promes long hem, i se: ‘Yufala i mas traehad blong mekem fasin blong yufala i kam gud moa. Yufala i gat fasin blong bilif, ale yufala i mas joenem long stret fasin. Yufala i gat stret fasin, ale yufala i mas joenem long save. . . . Sipos yufala i gat ol fasin ya oli strong long laef blong yufala, be bambae yufala i no save stap nating. Bambae yufala i save karem frut long laef blong yufala, olsem we yufala i save moa Jisas Kraes, Masta blong yumi.’ (2 Pita 1:​5-8) Yes, sipos yumi gru long saed blong save, samting ya bambae i givhan long yumi blong karem frut. Bambae yumi faenem se fasin blong kasem moa save bambae i mekem yumi haremgud moa. (Proveb 2:​2-5) Wanem yu lanem bambae i stap oltaem long tingting blong yu mo i save givhan long yu taem yu tijim ol narafala blong oli kam disaepol. Long rod ya nao, bambae yu kasem moa frut mo bambae yu givim glori long God mo Pikinini blong hem. Pita i finisim seken leta blong hem, i se: “Oltaem yufala i mas gru long tufala samting ya, we Jisas Kraes, Masta mo Sevya blong yumi, i stap givhan moa long yufala long gladhat blong hem, mo we yufala i save hem moa. Yumi mas leftemap nem blong hem i stap go antap oltaem, i stat naoia, gogo i no save finis.”​—2 Pita 3:18.

Yufala i Mas Gat Fasin Blong Bos Long Tingting i Strong Long Laef Blong Yufala

“Yufala i gat fasin blong bilif . . . ale yufala i mas joenem long fasin blong bos long tingting.”​—2 PITA 1:​5, 6, NW.

1. ?Long wanem rod we i defren maet wan Kristin i givim wan wetnes?

JISAS i talem se: “From we yufala i man blong mi, bambae [ol man] oli save pulum yufala i go stanap long fes blong ol haeman blong gavman mo long fes blong ol king. Be hemia i blong yufala i wetnes blong mi long fes blong olgeta ya, mo long fes blong ol hiten man.” (Matyu 10:18) Sipos oli singaotem yu blong stanap fored long wan haeman blong gavman, wan jaj, no wan presiden, ?bambae yu tokbaot wanem? Maet fastaem yu talem from wanem yu stanap fored long hem, talemaot ol toktok we ol man oli talem agensem yu. Speret blong God bambae i givhan long yu blong mekem olsem. (Luk 12:​11, 12) ?Be yu ting se bambae yu tokbaot fasin blong bos long tingting? ?Yu ting se hemia i wan impoten haf blong Kristin mesej blong yumi?

2, 3. (a) ?Olsem wanem Pol i save toktok fored long Filiks mo Drusila? (b) ?From wanem i stret blong Pol i tokbaot fasin blong bos long tingting long taem ya?

² Tingbaot wan trufala eksampel. Ol soldia oli holem wan long ol Wetnes blong Jeova mo tekem hem i go long kot. Taem oli givim jans long hem