Talemaot Gud Nyus—No Fraet Blong Givimaot Sabskripsen
1 Long saed blong Baebol, Wajtaoa i nambawan magasin long wol. ?Yu yu bilivim samting ya? ?Yu yu ting se i stret we evriwan i gat jans blong kasem sabskripsen?
2 ?Wajtaoa i givhan finis long yu wan? Ating yumi evriwan i save talemaot sam samting we yumi lanem long magasin ya we i bin givhan long yumi. Maet samfala oli talem se hem i nambawan rod blong wekemap tingting blong yumi, blong tingbaot impoten taem we yumi stap long hem naoia. No maet samfala i talem se hem i givhan long olgeta blong lanem trufala mining blong “ol saen blong taem ya blong yumi.” (Matyu 16:3) Maet sam narafala oli talem se oli harem gud long nyus long saed blong Kingdom blong God, we kolosap nao bambae hem i finisim ol man we oli mekem nogud long ol narafala man. Long 110 yia we i pas finis, Wajtaoa i bin tokbaot poen ya oltaem. Tru tumas, yumi evriwan i save talem se gudfala magasin ya long saed blong Baebol i bin givhan long yumi blong wokem bilif long sakrafaes we Jisas i mekem blong pemaot ol man, blong oli save kasem laef we i no save finis. Ol narafala tu oli nidim blong lanem ol trutok ya.
Yumi Save Se Wajtaoa i Nambawan
3 Oltaem nomo, Wajtaoa i soemaot se waes blong God i Hae moa i winim waes blong man. (Aesea 55:8, 9) Tede, yumi evriwan i nidim tumas waes ya. Hem i save givhan long yumi blong mekem laef blong yumi i moa gud mo blong wokem stret tingting long saed ol samting we yumi stap mekem. Samting ya i impoten tumas blong “stap laef.” (Proveb 9:1-6) Sipos yumi bilif strong long samting ya, bambae yumi soem se Wajtaoa i nambawan, mo hemia samting we ol narafala man oli nidim. I gud blong ridimgud evri magasin, blong faenem sam poen we oli save givhan long ol man. Sipos yu rerem gud ol poen ya fastaem, ol man bambae oli luksave se yu yu bilif strong se magasin ya i nambawan blong givhan long olgeta.
4 Maet samfala oli no traehad blong givimaot sabkripsen. Maet oli storeyan wetem ol man long saed blong stampa tok blong prij nomo, mo afta, maet oli soemaot tu magasin nomo long hem. Maet oli no storeyan nating long saed blong sabkripsen. ?From wanem? ?Yu ting se sabskripsen i sas tumas? Traem tingtinggud. Taem yumi tingbaot ol narafala magasin blong wol, praes blong sabskripsen i smol nomo. Be taem yumi tingbaot olsem wanem magasin ya i save givhan long olgeta we oli ridim, praes blong hem i nating nomo. Taswe, yumi mas traehad oltaem blong givimaot sabkripsen blong Wajtaoa long 300 VT, no long engglis mo franis, long 600 VT.
5 Wan sista i gat strong tingting blong givimaot plante sabskripsen, taswe hem i putum wan mak, blong givimaot 50 sabskripsen long 2 manis. Ale, hem i kasem 31 sabskripsen long faswan manis, mo 50 long tufala manis tugeta. Taem man i wantem sabskripsen, be hem i no gat vatu, sista ya i gobak plante taem. Samtaem hem i gobak 3 no 4 taem long wan man blong kasem wan sabskripsen. (yb 1989, pej 60, 61; Luk long 1990 Yearbook pej 47-49.) Long Japan, nating se praes blong sabskripsen blong wan yia i 14 dola long mane blong Yunaeted Stet (1,600 VT), be ol brata longwe oli kasem 71,600 sabskripsen long manis Oktomba. Oli neva kasem namba ya bifo samtaem, mo hem i 57% antap long sem manis lasyia.
Gohed Long Fasin No Fraet
6 Yumi no save fraet long minista wok blong yumi, from we paoa blong Jeova i stap sapotem yumi. (Wok 14:3) Wajtaoa hem i nambawan samting we Jeova i stap yusum tede blong mekem gud nyus i go moa long olgeta ples long wol. Sipos yumi givimaot fulap sabskripsen, mo afta, yumi gobak blong pulum ol man blong ridim ol magasin ya, hadwok blong yumi i save sevem laef blong plante man. Taswe yumi mas no fraet mo yumi mas glad blong givimaot sabskripsen long ol fren blong yumi mo long wok blong prij.