Halpem Ol Narafala Blong Kasem Save Long Man We i Hae Moa
1 Plante we oli ridim buk ya Man We i Hae Moa Long Olgeta Man oli talemaot tangkyu blong olgeta long paoa we buk ya i gat long laef blong olgeta. Wan long olgeta i raetem olsem se: “Taem mi kasem en blong buk, mi harem olsem se Jisas i bin askem mi blong joen wetem hem, blong laef kolosap long hem, blong joen long trabol blong hem, long ol filing blong hem, olgeta haf blong minista wok blong hem. . . Taem yu ridim buk ya i olsem se yu stap luk wan sinema long laef blong Jisas.”
2 Buk ya Man We i Hae Moa i halpem yumi blong savegud i no Jisas nomo be Jeova tu. (Jon 14:9) Wan yangfala we i gat 12 yia i talem olsem long saed long buk ya se: “Hem i mekem mi haremgud tumas mekem se mi prea long Jeova mo mi krae from glad taem mi ridim buk ya. Dip insaed long mi, mi haremgud blong save se Jeova mo Jisas oli stap lukaot long yumi.” Long Jon 17:3, Jisas i talem se, yumi save kasem laef we i no save finis taem yumi kasem save long Jeova mo pikinini blong hem. Stadi long buk ya we i tokbaot Jisas i givhan moa long yumi blong savegud ol fasin blong Jeova from Jisas i “olsem wan stret pija blong God, we i stap soemaot prapa fasin blong hem.”—Hib. 1:3.
3 Oli prentem bitim 19 milyan kopi blong buk ya Man We i Hae Moa long moa long 70 lanwis. Samting ya i soemaot olsem wanem ol man oli laekem buk ya. Plante oli ridim buk ya fulwan jes afta we oli kasem. Wan man we i intres i ridim buk ya fulwan long tu wik nomo afta we hem i kasem. Wan pasta we i bin kasem buk ya i talem se: “Mi no moa save lego buk ya. Waef blong mi mo mi mitufala i stap ridim sam haf blong hem evri naet bifo mitufala i go slip.”
4 Holem jans blong prij: Wan brata i soem buk ya Man We i Hae Moa long ol man long ples we hem i wok long hem. Tok i go raon se hem i gat buk ya, mo ol tok oli go raon blong talemaot wanem i stap insaed long buk ya. Ol man we oli wok wetem hem oli mekem wan lis blong olgeta we oli wantem wan kopi blong buk ya. !Hem i seremaot 461 buk! Faef long ol man we oli kasem buk ya naoia oli stap stadi. Wan sista we i stap go long wan trep long wan plen i seremaot buk ya Man We i Hae Moa long wan pris we i stap go blong joen long wan taem we oli wantem putumap wan nyufala kadinal. Pris ya i bin stap 40 yia long Vatikan. Evriwan long yumi i mas tekem olgeta jans blong soem ol narafala man blong karem buk ya.
5 Ol Yangfala oli laekem: Ol yang wan oli intres bigwan long buk ya. Wan yangfala we i gat naen yia i raetem se: “Buk we mi laekem moa hemia Man We i Hae Moa from we mi kasem plante samting long buk ya.” Taem yumi faenem ol yangfala long wok blong prij, yumi mas tekem taem sipos ol papa mama blong olgeta oli agri, blong soem buk ya long ol yangfala ya mo tokbaot sam long ol bigfala poen we oli stap long hem mo ol pija blong hem. Maet yumi gat jans blong livim sam buk long ol yangfala ya. Taem oli gat jans blong save Jisas, ol yangfala tede oli save fren wetem hem. Jisas i wan man we ol man oli laekem blong kam long hem.—Mat. 19:14, 15.
6 Buk ya Man We i Hae Moa i save jenisim laef blong ol man taem oli ridim. Traem pulum ol man oli save buk ya wetem ol toktok insaed. Yusum haf we i stap long laswan pej blong fastok blong buk ya, aninit long stampa tok ya “Stadi Long Laef Blong Hem i Save Givhan Long Yumi.” Haf ya bambae i halpem ol man blong luk moa long wanem oli save kasem taem oli ridim buk ya. Plante long teritori blong yufala maet oli save talem olsem wan man i bin talem afta we hem i ridim buk ya se: “Hem i wan nambawan buk. !Neva mi bin ridim wan buk olsem! Hem i jenisim laef blong mi.”