Gohed Blong Mekem Ol Tiokratik Wok Long Sevis Yia Ya
1 Ol manis we oli stap kam oli givim jans blong joen long plante defren wok. Bighaf blong yumi oli laekem blong tekem jans long taem we ples i kolkol lelebet blong mekem moa long ol tiokratik wok. From trabol long saed blong ekonomi mo maet trabol blong ol yangfala long skul, yumi mas lukaot blong no kam slak blong folem tiokratik program blong yumi.—Fil. 3:16.
2 Yumi stap wet long seket mo distrik asembli we bambae oli kamtru sam manis biaen. ?Yu mekem plan finis blong stap long taem ya, yu rere long transpot mo ples blong slip we yu nidim? ?Yu bin tingbaot blong putum insaed long plan blong yu wan man insaed long kongregesen we i nidim help? Fasin kaen olsem i save karem gudfala blesing long yu mo long hem.
3 Sipos yu gat sam fri taem, olsem long taem blong spel blong skul, ?yu yu bin tingbaot blong joen moa long minista wok? Plante oli faenem se taem blong spel long skul i wan gud taem blong joen long wok blong haftaem paenia. Plante taem samting ya i givim jans blong kasem moa blesing blong wok. Ol famle oli save kasem trufala glad taem oli spenem sam ful dei tugeta long minista wok. Nating se yu save mekem olsem wanem, ?be yu ting se yu save givim moa taem bitim we yu bin stap yusum long minista wok? Long taem we i kolkol, i mas gat moa man we oli save haremgud blong yusum olgeta rod blong talemaot gud nyus.
4 ?Olsem wanem long wok blong prij long ol narafala aelan? Maet i gat samfala long kongregesen blong yu we oli laekem blong joenem yu long wan no tu wik blong wok long ples we i gat moa nid. Sipos grup blong yu i smol, maet sam pablisa blong wan narafala kongregesen oli glad blong go wetem yu. Seket elda i save givim sam advaes long sam stret nid long sam aelan.
5 ?Yu yu stap tingbaot wok blong prij long rod no wok blong prij long sapa? Sipos yes, ?yu putum wan mak finis? ?Olsem wanem sipos yu traehad blong seremaot moa magasin blong yumi long Bislama? Sipos yu putum samting ya insaed long ol wok blong yu, bambae i save mekem yu yu haremgud mo ol narafala tu. (Rom 1:11, 12) Mo tu, ?yu save tekem olgeta jans blong prij long eni ples? No mas fogetem blong tekem Baebol mo sam buk wetem yu. Yusum sam fri taem blong yu long sapa blong joen moa long wok blong mekem disaepol.
6 Ol elda oli mas lukaotgud long ol wok blong kongregesen long tiokratik yia ya. Sipos wan long ol elda no man blong givhan i bisi blong mekem ol narafala tiokratik wok, oli mas mekem plan blong wan narawan i lukaot long ol wok blong olgeta. Sekretari i no mas slak blong mekem wok blong hem mo oli no mas givim wok ya long wan man blong givhan we i no gat tumas ekspiryens. I gud blong mekem wan trening program long ol wok olsem lukaot long magasin, lukaot long ol buk no kaon. I gud blong mekem wan program blong ol visit blong man we i lukaot sipsip blong bambae wanwan long kongregesen i save haremgud long help blong ol elda blong kongregesen. Fasin joen oltaem long wok blong prij i wan impoten haf long laef blong wan Kristin. Ol elda oli mas lidim wok blong prij mo maet samfala oli save mekem haftaem paenia wan taem long wan yia. Eksampel blong olgeta bambae i givhan bigwan long ol pablisa blong kongregesen blong wok strong moa.
7 Yes, olsem ol trufala Kristin, yumi gat plante responsabiliti. Be fasin blong ronem ol samting blong wol oli save blokem gudfala program blong yu long wok blong Kingdom. Savegud wanem ol samting long saed blong speret we yu mas putum long fasples, mo holemtaet olgeta.—Fil. 1:10.