Program Blong Nekiswan Seket Asembli
1 Stampa tok blong nekiswan seket asembli we bambae i stat long Septemba long sam ples, hemia: “Kasem Moa Glad From Fasin Blong Givim.” (Wok 20:35) Glad i minim “tingting we i kwaet, mo fasin blong haremgud.” Plante man tede oli traem enikaen rod blong faenem glad. Mo taem oli faenem, plante taem hem i blong smoltaem nomo. Hemia i no trufala glad. Be, Jeova i tijim yumi olsem wanem blong haremgud blong olwe. (Aes. 48:17; 1 Jon 2:17) Program blong nekiswan seket asembli bambae i soemaotgud, olsem wanem yumi save kasem moa glad taem yumi givim ol samting long saed blong speret long ol narafala.
2 Bambae yumi luk sam rod blong soem fasin blong givim long wok blong prij. Seket mo distrik elda bambae oli givim ol tok olsem: “Yusum Ol Sas Samting Blong Frengud Wetem God mo Kraes,” “Respektem Rod We God i Stanemap—‘Ol Man We Oli Olsem Presen,’” mo “Kasem Trufala Glad Long Plante Defren Rod.” Olgeta we oli wantem tekem baptaes long asembli ya, oli mas toktok wetem presiden elda. Hem i save mekem plan blong ol elda oli tokbaot ol kwestin blong baptaes wetem olgeta. Taem olgeta we oli tekem baptaes oli frengud wetem Jeova mo mekem wok blong Hem wetem laef we i klingud, bambae oli kasem bigfala glad.
3 Taem yumi luksave se Jeova i bos long yumi, samting ya tu i givim trufala glad mo seftaem long yumi. Olgeta man oli mas save samting ya. Taswe, nem blong pablik tok long seket asembli, hemia: “Joen Wetem Ol Hapi Man Blong God.” Meksua se yu singaot olgeta we oli soem intres long trutok blong kam lesin long tok ya. Oli no bin faenem trufala seftaem mo glad we i stap longtaem, aninit long rul blong ol man blong wol ya we Setan i bos blong hem. (Ekles. 8:9) !Be bambae oli faenem bigfala glad taem oli joen wetem ol hapi man blong Jeova!—Sam 144:15b.
4 Nating se wol ya i stap kam moa nogud, olgeta we oli stap kasem moa glad from we oli givim plante samting long saed blong speret, God ya we i hapi i no save mekem olgeta oli harem nogud. (1 Tim. 1:11) Program blong nekiswan seket asembli bambae i soemaot samting ya. !Yu no mas mestem!