?Yumi Nidim Baebol?

OXANA, wan yangfala woman blong Rasia, i glad tumas taem hem i luk wan Baebol long wan man blong salem buk long rod long Mosko. Wan man we i joen wetem woman Rasia ya, John, we i kam long wan kantri we i fri blong yusum Baebol, i gat strong filing long intres blong Oxana. Hem i talem se, “Mi​—mi no bilif long God​—mi wantem pem Baebol ya blong givim long woman ya.” Fastaem Oxana i no wantem be biaen hem i akseptem presen we John i givim.

Plante man, olsem Oxana, oli wantem tumas blong gat wan Baebol. Samting ya i tru moa long olgeta kantri we long plante yia finis oli bin putum tabu long Baebol. Eksampel, olgeta we oli prentem magasin ya, oli stap wokhad blong givimaot Baebol long olgeta we oli nidim long ol ples we Rasia i lukaot long olgeta fastaem, i sem mak long ol narafala ples long wol. Plante man long ol ples ya, hemia i fastaem long olgeta we oli save gat jans blong mekem prapa stadi long Baebol​—mo strong mesej blong Baebol i pulum plante man.

Ol Man Blong Tok Agens Mo No Bilif

I defren long samting we yumi tokbaot antap, makemgud long Not Yurop, oli no ridim Baebol be oli livim i stap doti nomo long ples blong putum ol buk. Samfala oli talem se, “!Wan histri we i ded!” Oli gohed se, “Oli raetem from wan narafala taem. Hem i no moa joen wetem laef blong ol man naoia.” Ol haeman blong jyos tu oli bin mekem ol bigfala toktok we oli daonem Baebol. The Star, wan nyuspepa blong Saot Afrika, i givim ripot blong Bisop Desmond Tutu blong Anglican jyos i se: “I gat sam haf blong Baebol we oli no moa impoten tumas.” Ol toktok olsem oli bin pulum plante man blong gat smol bilif nomo long Baebol.

I Mas Gat Samting Blong Lidim Yumi

Olgeta we oli stap tok agens mo olgeta we oli bilif oli mas agri se, bitim bifo, naoia wol i nidim wan samting we i save wokgud blong finisim ol trabol. Alvin Toffler i raetem long buk blong hem Future Shock se, “Sipos man i no kwik blong save olsem wanem blong lukaot long ol samting we oli stap jenis kwik long laef blong hem wan mo long bigfala sosaeti blong man, yumi stap lus insaed long wan bigfala . . . trabol.” Woning ya i bin kamaot bitim 20 yia finis. Trabol we Toffler i bin tokbaot i stap hapen stret naoia.

Taem handred yia ya i stap go blong kolosap long en blong hem, ol bigbigfala save mo ol waes blong man oli no naf blong mekem wol ya i stapgud. Wan hop blong wan nyufala wol we oli tokbaot i no longtaem i pas i bin kam olsem gyaman tingting, mo laef blong plante man i bin foldaon long wan hadtaem we evri dei oli stap traehad blong kamaot long hem.

Ol ripot oli soemaot se mak we i stap long medel blong ol rij mo ol pua man long saed blong mane i kam olsem wan bigfala hol. I no longtaem wan stadi i soemaot se 82.7% long ol sas samting blong wol oli stap long han blong 20% nomo long namba blong olgeta man. ?Yu yu save se long fulap long olgeta kantri i gat faet, kakae i sot, ol sik, ol grup blong man oli faet long rod, mo ol ples we oli olbaot nomo from i no gat gavman? Hadtaem blong traem winim ol rabis fasin blong laef ya i mekem se plante man oli harem nogud tumas long filing blong olgeta. Frut we i kamaot se, wan faswan ples blong joen long sosaeti, famle, i kam nogud.

Be plante man, olsem Toffler, oli talem se hemia i wan wok blong ol man blong “traehad fulwan blong lukaot wan nyufala rod blong stap strong mo stap sef,” pruf we i kamaot i soem se ol man nomo oli no naf blong mekem ol samting blong winim ol trabol blong olgeta.

Rod Ya Nomo

Tabu Baebol, we oli bin stat blong raetem samwe long 3,500 yia bifo, i no bin jenis long ol handred yia we i pas. Ol rul blong hem oli no jenis. Eksampel, ol tok blong Jeremaea 10:​23 i tru moa long taem blong yumi bitim bifo: “Man i no naf blong jusumaot wanem rod we hem i mas wokbaot long hem.” Sipos ol man oli no naf blong lidim rod blong olgeta, ?hu i save mekem? Baebol i soemaot wan trufala Stampa nomo blong lidim olgeta man se: “Mi, Jeova, mi God blong yu, Wan we i stap tijim yu blong harem gud, Wan we i stap mekem se yu yu save wokbaot long rod we yu mas wokbaot long hem.”​—Aesea 48:​17.

Long olgeta pej blong Baebol, Jeova God i tijim yumi blong givhan long yumi. Baebol i fulap long ol advaes we i soemaot rod we yumi mas wokbaot long hem. Fasin blong stretem blong hem i stap wok tede i sem mak olsem long taem we oli raetem Baebol. Haf we i kam biaen bambae i soemaot olsem wanem Baebol i stap wok long taem blong yumi. Long ol defren kaen bisnes, olsem long saed blong helt mo mane, famle laef, mo fasin blong wanwan man, bambae yu yu luksave se Baebol i olsem ston we i stap strong long wol tede we i olsem sanbij we i stap muvmuf.

[Tok Blong Pija Long Pej 4]

Baebol i wan angka blong stap kwaet long wol tede we i gat plante trabol