I Nidim Evriwan Long Yumi Blong Finisim Wok We Yumi Kasem
1 Olgeta disaepol blong Jisas Kraes oli mas kasem save se ol traehad blong olgeta blong sapotem mo joen long wok blong talemaot Kingdom, oli impoten tumas. Jisas i luksave we ol disaepol blong hem wanwan bambae oli no karem semfala namba blong frut blong Kingdom. (Mat. 13:23) Nating se plante paenia we oli wok strong oli stap mekem bighaf blong wok blong prij, ol narafala oli mekem gudfala wok tu, taem oli yusum olgeta paoa blong olgeta blong presem God mo karem frut we oli naf blong karem.—Jon 15:8.
2 Traehad Blong Olgeta Evriwan i Karem Moa Frut: Jisas i talemaot se, ol traehad blong olgeta disaepol blong hem tugeta, bambae oli mekem wan wok we i bigwan moa i bitim wok blong hem. (Jon 14:12) Nating sipos ol samting long laef blong yumi wanwan oli blokem yumi blong mekem plante wok no oli letem yumi blong mekem plante long wok blong talemaot Kingdom, be i nidim yumi evriwan blong finisim wok ya. Olsem Pol i talem se: “Olgeta haf blong bodi oli joengud, mo ol joen oli stap givim ol samting we ol haf ya oli nidim blong wokgud tugeta. Taem ol wanwan haf blong bodi oli mekem olsem we i stret nomo blong oli mekem, bodi ya i save gru.”—Efes. 4:16, NW.
3 Maet samfala oli ting se wok we oli mekem i nating nomo. Be long tingting blong Jeova, samting we i moa impoten i blong wok wetem ful sol blong yumi. Olgeta samting we yumi mekem blong hem, oli gud tumas mo hem i gat tangkyu from.—Lukluk Luk 21:1-4.
4 Gohed Blong Sapotem Wok: Yumi evriwan i gat jans blong givim presen mane blong givhan long wok blong prij long ful wol. Samfala oli save wok strong wetem bodi blong olgeta blong givhan long sam wok we i joen wetem wok blong Kingdom. Evriwan oli save traehad blong givim ol ansa long miting we oli reregud fastaem, mo blong joen long Tiokratik Skul tu. Sipos yumi tekem olgeta jans blong leftemap tingting blong ol narafala, yumi givhan long kongregesen long nambawan fasin long saed long speret, mo hemia i save mekem se kongregesen i kamgud moa long wok we God i givim long hem.
5 Tru, i nidim evriwan blong yumi blong finisim wok we yumi gat. I no mas gat wan we i ting se yumi no nidim hem. Traehad blong yumi evriwan long wok blong Jeova, nating se i plante no smol, i makemaot yumi olsem ol trufala man blong wosipim God. (Mal. 3:18) Evriwan long yumi, oli save mekem wan impoten wok blong presem Jeova, mo blong givhan long ol narafala blong save hem mo blong mekem wok blong hem.