mas tingbaot oltaem se yumi no gat raet blong jajem wan narafala Kristin, se hem i stap wok wetem ful laef blong hem no nogat. (Rom 14:10-​12) Jeova i tinghae tumas long wok we wanwan blong ol milyan pablisa blong Kingdom oli mekem wetem ful laef blong olgeta, mo yumi mas gat semfala tingting.

20. ?I moagud we yumi tingting olsem wanem long saed blong ol Kristin brata mo sista blong yumi?

²⁰ ?Be, olsem wanem sipos i luk olsem we samfala oli no stap mekem bes blong olgeta long wok blong prij? Sipos ol elda, we oli wari long ol sipsip blong God, oli luk se haoa blong prij blong wan Kristin brata no sista i godaon, maet samting ya i soem se oli nidim blong givhan mo leftemap tingting blong hem. Be yumi no mas fogetem tu se, maet samfala we oli wok wetem ful laef blong olgeta oli save mekem smol nomo, olsem wido we i givim smosmol mane, i no olsem sas senta we Meri i givim. I moagud blong tingting se ol brata mo sista blong yumi oli laekem Jeova tumas, mo se lav ya bambae i pusum olgeta blong mekem bes blong olgeta​—i no blong mekem smol nating nomo. !I sua se ol man blong God we oli tinghevi long wosip blong olgeta, bambae oli neva jusum blong mekem smol nomo long wok blong God, sipos oli naf blong mekem plante!​—1 Korin 13:4, 7.

21. ?Plante Kristin oli jusum wanem wok we i stap givim bigfala glad long olgeta, mo wanem ol kwestin we oli stanap?

²¹ Sam man blong God we oli wok wetem ful laef blong olgeta, oli jusum wan wok we i givim fulap blesing long olgeta​—hemia wok blong paenia. ?Wanem ol blesing we oli kasem? ?Mo olsem wanem long yumi we i no gat rod yet blong joen long wok blong paenia? ?Olsem wanem yumi save soem speret blong paenia? Bambae yumi tokbaot ol kwestin ya long nekis haf.

Ol Blesing Long Wok Blong Paenia

“Blesing blong Jeova, hemia nao samting we i mekem man i rij. Mo hem i no givim soa wetem.”​—PROVEB 10:22.

1, 2. (a) ?Wanem filing blong wan paenia long saed blong fultaem wok blong prij? (b) ?From wanem ol paenia oli stap kasem moa glad long wok blong mekem disaepol?

“I GAT wan glad we i bigwan moa i bitim hemia we yu kasem taem wan man we yu stadi Baebol wetem hem i stat presem Jeova? Taem mi luk olsem wanem Tok blong God i gat paoa blong pusum man blong jenisim laef blong hem blong mekem Jeova i haremgud, samting ya i mekem mi mi glad tumas mo i mekem bilif blong mi i kam strong moa.” Hemia wan leta we wan paenia long Kanada i raetem. Hem i mekem wok blong paenia blong bitim 32 yia. Long saed blong wok blong paenia, hem i talem se: “Mi no save tingbaot blong mekem wan narafala wok. Mo i sua se mi no save tingbaot wan narafala wok we i save givim semfala glad olsem wok blong paenia.”

² ?Yu yu agri se yumi glad tumas taem yumi givhan long wan man blong faenem rod blong kasem laef? I tru se, i no ol paenia nomo we oli kasem bigfala glad ya. Oda ya blong ‘pulum ol man oli kam man blong Kraes’ i go long olgeta man blong Jeova, mo oli traehad blong mekem samting ya. (Matyu 28:19) Be, ol paenia oli save spenem plante haoa long wok blong prij. Taswe, oli gat moa jans blong kasem glad ya we i kamaot from wok blong halpem ol man blong kam disaepol blong Kraes. Be, i gat sam narafala blesing tu long wok blong paenia. I gud yu storeyan wetem ol paenia, mo bambae oli talem long yu se wok blong paenia i wan nambawan rod blong kasem ‘blesing blong Jeova we i mekem man i rij.’​—Proveb 10:22.

3. ?Wanem i save pusum yumi blong gohed moa long wok blong Jeova?

³ I no longtaem i pas, mifala i askem long sam paenia long ol defren ples blong wol blong eksplenem ol blesing we oli bin kasem long wok blong Jeova fultaem. Bambae yumi tokbaot ol ansa blong olgeta. Sipos yu no save mekem bigfala wok olsem, from we yu sik, yu olfala finis, no from wan narafala samting long laef blong yu, yu no mas harem nogud. Rimemba se, samting we i impoten, se yu mekem wok blong Jeova wetem ful laef blong yu, nomata se hemia bigfala wok no smol nomo. Be, maet ol tok blong ol paenia ya i mekem se yu wantem joen long gudfala wok ya we i givim plante blesing, sipos yu save mekem olsem.

Dip Filing Blong Glad Mo Blong Haremgud

4, 5. (a) ?From wanem wok blong talemaot gud nyus long ol narafala i karem plante bigfala blesing? (b) ?Wanem tingting blong ol paenia long saed blong wok blong prij fultaem?

⁴ Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Yes, taem yumi givim presen from we yumi tingbaot narafala fastaem long yumi wan, ale yumi kasem blesing. (Proveb 11:25) Samting ya i tru moa long saed blong wok blong talemaot gud nyus. Tingbaot, ?yumi save givim wanem presen we i bigwan moa i bitim we yumi givhan long wan man blong kasem stret save blong God, we bambae i lidim hem long laef we i no save finis?​—Jon 17:3.

⁵ I no wan sapraes se, olgeta we oli prij fultaem, oli tokbaot glad mo dip filing blong haremgud we oli kasem long wok blong prij. Wan paenia long Briten we i gat 64 yia finis, i talem se: “Mi mi save se i no gat wan narafala wok we i save mekem mi mi haremgud olsem wok ya blong seremaot trutok long ol narafala man.” Wan wido blong Sair i talemaot tingting blong hem long saed blong wok blong paenia, i se: “Afta we gudfala hasban blong mi i ded, wok blong paenia i givhan bigwan long mi blong haremgud bakegen. Taem mi mekem moa long wok blong prij blong givhan long ol narafala, filing blong harem nogud tumas from we mi lusum nambawan fren blong mi, i godaon moa. Mi mekem bilif blong mi i kam strong long ol promes blong Jeova, mo mi tingting moa long ol rod blong givhan long ol man we mi stadi wetem olgeta, blong oli save jenisim laef blong olgeta. Long en blong dei mi slipgud, mo hat blong mi i fulap long glad.”

6. ?Wanem spesel glad we sam paenia oli bin kasem?

⁶ Samfala we oli bin mekem wok blong paenia blong plante yia, oli bin kasem wan spesel glad taem oli gat jans blong wok long ol ples farawe, mo stanemap ol nyufala kongregesen we biaen oli kam ol nyufala seket. Eksampel, long Abasiri, Hokaedo (laswan aelan blong Japan long not), i gat wan sista we i mekem wok blong paenia blong 33 yia finis. Hem i tingtingbak long faswan seket asembli we hem i bin go long hem. I gat 70 man i stap long asembli ya we i blong fulwan aelan blong Hokaedo. ?Naoia, i gat hamas man blong Jeova long ples ya? I gat 12 seket long aelan ya, mo bitim 12,000 man blong talemaot Kingdom. !Tingbaot olsem wanem hat blong sista ya i fulap long glad taem hem i go long ol asembli, mo i joen wetem plante taosen narafala man blong talemaot Kingdom long aelan ya!

7, 8. ?Wanem samting i mekem olgeta we oli paenia longtaem finis oli glad?

⁷ Sam narafala we oli bin mekem wok blong paenia blong longtaem, oli bin kasem bigfala glad taem oli luk ol studen blong olgeta oli baptaes mo oli tekem ol jans blong mekem moa long wok blong Jeova. Long Japan, wan sista we i bin mekem wok blong paenia long naen ples i stat long 1957, i tingbaot wan taem we hem i livim wan Wekap! wetem wan yangfala woman we i wok long bang. Naen manis biaen, yangfala woman ya i baptaes finis. Biaen, hem i mared, mo hem wetem man blong hem tufala i joen long wok blong spesel paenia. !Tingbaot glad blong paenia sista ya taem hem i go long namba tri ples we hem i paenia long hem, nao wan nyufala seket elda mo waef blong hem oli visitim kongregesen ya​—hemia yangfala gel ya we sista ya i bin mekem stadi long hem!

⁸ !I klia from wanem olgeta we oli bin givim ful laef blong olgeta blong mekem wok blong paenia oli talem semfala tok olsem wan brata we i paenia blong 22 yia finis, se wok blong paenia i “wan blesing we i sas mo we mi tinghae tumas long hem”!

Pruf Se Jeova i Lukaotgud Long Olgeta

9. ?From we Jeova i Bigfala Man Blong Givim Ol Samting We Yumi Nidim, hem i mekem wanem promes long ol man blong hem, mo wanem mining blong promes ya?

⁹ Jeova, Bigfala Man Blong Givim Ol Samting We Yumi Nidim, i promes blong givhan long ol man blong hem, lukaot long olgeta long saed blong speret, mo givim ol samting we oli nidim blong laef. Taswe, King Deved bifo i talem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Ol Sam 37:25) I tru se, promes ya blong God i no min se yumi no nidim blong wok blong pem ol samting we famle blong yumi i nidim, mo i no givim raet long yumi blong askem tumas samting long ol Kristin brata blong yumi we oli gat gladhat blong givim presen. (1 Tesalonaeka 4:​11, 12; 1 Timote 5:8) Be, taem yumi glad blong lego sam samting we yumi wantem long laef blong yumi blong mekem moa long wok blong Jeova, bambae hem i neva lego yumi.​—Matyu 6:​33.

10, 11. From ol samting we i kamaot long laef blong ol paenia, ?oli save wanem long saed blong fasin blong Jeova blong givim ol samting we oli nidim?

¹⁰ From ol samting we i kamaot long laef blong ol paenia long olgeta ples blong wol, oli save se Jeova i stap lukaotgud long ol man we oli putum laef blong olgeta long han blong hem. Tingbaot store blong wan hasban mo waef we tufala i paenia, nao tufala i muf i go long wan smol taon we i nidim moa man blong talemaot Kingdom. Afta we sam manis i pas, tufala i no save faenem naf wok blong winim mane, ale tufala i no moa gat mane. Long semtaem, tufala i mas pem kaon blong 8,100 vatu blong insurens long trak blong tufala. Brata ya i talem se: “Mitufala i no gat mane blong pem kaon ya. Long naet ya, mitufala i prea wetem fulhat mo filing blong mitufala.” Long nekis dei, tufala i kasem wan kad long wan famle we olgeta tu oli gat hadtaem long saed blong mane. Famle ya i eksplenem long kad ya se oli bin kasem wan jek from we oli givim tumas mane taem oli pem takis blong olgeta, ale oli wantem givim smol mane long paenia brata ya wetem woman blong hem, from we mane we oli kasem i bitim mane we oli bin tingbaot blong kasem. !Ale, oli sanem wan jek blong 8,100 vatu! Brata ya we i paenia i talem se: “Mi no save fogetem dei ya. Filing blong mi i mekem skin blong mi i kam olsem skin blong faol. !Mitufala i talem bigfala tangkyu long famle ya from presen ya we oli givim wetem gladhat!” Jeova tu i laekem tumas kaengud fasin olsemia. Hemia nao fasin ya blong givim presen wetem gladhat we hem i wantem olgeta man blong hem blong folem.​—Proveb 19:17; Hibrus 13:16.

¹¹ Plante paenia oli save talem ol store olsemia. Askem olgeta, mo bambae oli talem long yu se Jeova i neva bin ‘lego olgeta.’ Wan paenia we i gat 72 yia finis, i stap tingtingbak long wok blong paenia we hem i bin mekem blong 55 yia, mo i talem se: “Jeova i neva bin livim mi mi stap mi wan nomo.”​—Hibrus 13:​5, 6.

“Wan Nambawan Rod Blong Kam Kolosap Moa Long Jeova”

12. ?From wanem wok blong talemaot gud nyus i wan nambawan blesing?

¹² Taem Jeova i askem long yumi blong talemaot gud nyus blong Kingdom blong hem, hemia i wan blesing finis. Nating se yumi sinman nomo, hem i stap luk yumi olsem ‘ol man blong joen wetem hem’ long wok ya blong sevem laef blong man. (1 Korin 3:9; 1 Timote 4:​16) Taem yumi talemaot Kingdom blong God, taem yumi talemaot se bambae ol rabis fasin oli finis, taem yumi eksplenem long ol man olsem wanem God i laekem yumi tumas mo i givim pikinini blong Hem olsem wan ransom, taem yumi openem Tok blong Hem we i laef mo tijim ol man we hat blong olgeta i stret long ol nambawan tok ya, ol samting ya oli pulum yumi i kam kolosap moa long Man ya we i Wokem yumi, Jeova.​—Ol Sam 145:11; Jon 3:​16; Hibrus 4:​12.

13. ?Samfala oli talem se wok blong paenia i mekem wanem long fasin fren blong olgeta wetem Jeova?

¹³ Ol paenia oli save spenem plante taem evri manis blong kasem moa save long saed blong Jeova mo tijim ol narafala long ol save ya. ?Olsem wanem samting ya i stap givhan long fasin fren blong olgeta wetem God? Wan elda long Franis we i bin mekem wok blong paenia blong bitim ten yia nao, i talem se: “Wok blong paenia i wan nambawan rod blong kam kolosap moa long Jeova.” Wan narafala paenia long Franis we hem i bin mekem wok blong prij fultaem blong 18 yia, i talem se: “Wok blong paenia i givim jans long yumi blong ‘traem trastem Jeova mo luk se hem i gud tumas.’ Evri dei, yumi gat jans blong mekem fasin fren blong yumi wetem Man ya we i Wokem yumi, i kam strong moa.” (Ol Sam 34:8) Wan sista long Briten we i bin mekem wok blong paenia blong 30 yia finis, hem i gat semfala filing. Hem i se: “Taem mi dipen long speret blong Jeova blong lidim mi long wok blong prij, mi mi kam kolosap moa long Hem. Mi rili bilif se, plante taem, speret blong Jeova i bin lidim mi long haos blong wan man long taem we i stret nomo blong prij long man ya.”​—Skelem wetem Ol Wok 16:​6-​10.

14. ?Olsem wanem fasin blong yusum Baebol mo ol buk we oli tokbaot Baebol evri dei blong tijim ol narafala, i stap givhan long ol paenia?

¹⁴ Plante paenia oli luk se taem oli yusum Baebol mo ol buk we oli tokbaot Baebol evri dei blong eksplenem mo tijim ol trutok blong Baebol long ol narafala, samting ya i givhan long olgeta blong kasem moa save long saed blong Tok blong God. Wan brata long Spen we i gat 85 yia, i mekem wok blong paenia blong 31 yia finis. Hem i talem se: “Wok blong paenia i bin givhan long mi blong kasem dip save long saed blong Baebol. Mo mi bin yusum save ya blong halpem plante man blong save Jeova mo ol stampa tingting blong hem.” Wan sista long Briten we i mekem wok blong paenia blong 23 yia finis, i talem se: “Wok blong prij fultaem i stap pulum mi blong wantem tekem moa kakae oltaem long saed blong speret.” Taem yu talemaot oltaem ‘from wanem yu putum tingting blong yu i stap strong’ long ol promes blong God, samting ya i save mekem se yu yu bilif strong moa long ol tijing ya we yu holem long hat blong yu. (1 Pita 3:​15) Wan paenia long Ostrelya i talem se: “Taem mi stap talemaot bilif blong mi long ol narafala long wok blong paenia, bilif ya i stap kam strong moa.”

15. ?Plante oli glad blong mekem wanem blong joen long wok blong paenia mo stap gohed long hem, mo from wanem oli glad blong mekem olsem?

¹⁵ I klia se, ol paenia ya oli suagud se oli bin jusum wan wok we i save karem fulap blesing blong Jeova i kam long olgeta. !Taswe, plante brata mo sista oli bin glad blong jenisim sam samting long laef blong olgeta​—maet oli bin lego wan gudfala wok no plante sas samting​—blong joen mo gohed long wok blong paenia!​—Proveb 28:20.

?Yu Yu Stap Wantem Long Hat Blong Yu Blong Mekem Moa Wok?

16, 17. (a) Sipos yu stap ting se maet bambae yu save paenia, ?wanem samting we i gud blong mekem? (b) ?Wanem filing blong samfala we oli no naf blong paenia?

¹⁶ Taem yu ridim ol tok blong ol paenia ya long saed blong ol blesing long wok blong paenia, maet yu stap ting se i gud we yu traem joen long wok ya. Sipos i olsem, i gud yu toktok wetem wan paenia we i stap gohed gud. Mo tu, maet i gud we yu toktok wetem wan elda long kongregesen we i savegud yu, helt blong yu, ol samting we yu yu naf blong mekem, mo ol wok we yu mas mekem insaed long famle. (Proveb 15:22) Ol trufala tok we ol narafala oli talem long yu i save givhan long yu blong luksave sipos yu yu naf blong mekem wok blong paenia. (Ridim Luk 14:28.) Sipos yu save mekem wok ya, bambae yu yu kasem plante bigfala blesing.​—Malakae 3:​10.

¹⁷ Be, ?olsem wanem long bigfala namba blong man we oli stap holemstrong long wok blong talemaot Kingdom, be oli no naf blong paenia, nating se maet oli wantem tumas blong prij moa? Eksampel, tingbaot filing blong wan Kristin sista we hem i stap traehad hem wan blong tijim mo lukaotgud long ol fofala pikinini blong hem. Hem i talem se: “Mi harem nogud from we bifo mi mi wan fultaem paenia, be naoia laef blong mi i jenis, mekem se mi no moa save prij plante.” Sista ya i laekem tumas ol pikinini blong hem mo i wantem lukaotgud long olgeta. Be, hem i wantem prij moa tu. Hem i eksplenem se: “Mi mi laekem tumas wok blong prij.” Plante narafala Kristin we oli stap onagud long God, oli gat semfala filing ya. Lav we oli gat long God i pusum olgeta blong wantem mekem wok blong Jeova ‘wetem fulhat blong olgeta.’​—Ol Sam 86:12.

18. (a) ?Jeova i askem wanem long yumi? (b) ?From wanem yumi no mas letem tingting blong yumi i foldaon sipos yumi no save mekem plante long wok blong prij?

¹⁸ Rimemba se, Jeova i wantem we yumi wok wetem ful laef blong yumi. Hemia i no minim se yumi evriwan i mekem i sem mak. Laef blong yumi wanwan i defdefren. Samfala oli save jenisim sam samting long laef blong olgeta blong mekem wok blong fultaem paenia. Plante narafala oli joen long wok blong haftaem paenia sam samtaem no oltaem. Hemia i min se oli spenem 60 haoa evri manis long wok blong prij. Be, bighaf blong ol man blong Jeova we oli prij mo tij wetem ful laef blong olgeta, oli ol pablisa long kongregesen. Taswe, sipos yu no gat rod nating blong mekem moa wok, from we yu yu sik, yu olfala, yu gat plante tumas wok insaed long famle, no from wan narafala samting olsem, yu no mas letem tingting blong yu i foldaon. !Sipos yu stap mekem bes blong yu, God i stap tinghae tumas long wok blong yu, olsem we hem i tinghae long wok blong olgeta we oli prij fultaem!

Yumi Evriwan i Save Soem Speret Blong Paenia

19. ?Wanem ya speret blong paenia?

¹⁹ Nating sipos yu no naf blong mekem wok blong paenia, yu save soem speret blong paenia. ?Wanem ya speret blong paenia? Kingdom Wok Blong Yumi long Julae 1988 i talem se: “Hemia i minim se yumi gat positif tingting long saed blong oda ya blong prij mo mekem disaepol, mo yumi traehad fulwan blong soem lav mo kea long ol narafala man. Yumi rere blong lego sam samting we yumi nomo i wantem, yumi glad blong folemgud Masta blong yumi, mo yumi haremgud tumas long ol samting long saed blong speret, i no long ol sas samting blong laef.” ?Olsem wanem yu yu save soem speret ya blong paenia?

20. ?Olsem wanem ol papa mama oli save soem speret blong paenia?

²⁰ Sipos yu yu wan papa no mama wetem ol smol pikinini, yu save pulum olgeta wetem fulhat blong yu blong putum wan mak blong joen long wok blong paenia long fyuja. Positif tingting blong yu long saed blong wok blong prij i save mekem olgeta oli luksave we wok blong Jeova i moa impoten long ol narafala samting long laef blong olgeta. Maet yu save singaot sam paenia mo elda we oli goraon blong visitim ol kongregesen wetem waef blong olgeta, oli kam long haos blong yu. Eksampel blong olgeta ya we oli stap kasem bigfala glad from wok blong prij fultaem, i save givhan long ol pikinini blong yu. (Skelem wetem Hibrus 13:7) Long famle we samfala nomo oli folem trutok, ol tok mo fasin blong papa no mama we i gat bilif, i save givhan long ol pikinini blong traehad blong kasem mak ya long laef blong olgeta we oli joen long wok blong prij fultaem.​—2 Timote 1:5; 3:​15.

21. (a) ?Olsem wanem yumi evriwan i save sapotem ol paenia? (b) ?Ol elda oli save mekem wanem blong leftemap tingting blong ol paenia?

²¹ Long kongregesen, yumi save sapotem wetem fulhat blong yumi olgeta we oli naf blong mekem wok blong paenia. Eksampel, ?yu yu save mekem wan spesel traehad blong prij wetem wan paenia, antap moa, long wan taem we maet hem i no gat narafala blong prij wetem hem? Ating bambae yu luk se ‘bilif blong hem i givhan long yu, olsem we bilif blong yu i givhan long hem.’ (Rom 1:​11, 12) Sipos yu yu wan elda, yu save mekem moa yet blong givhan long ol paenia. Taem ol elda oli mekem miting, oli mas tokbaot nid blong ol paenia. Taem tingting blong wan paenia i foldaon no hem i kasem wan problem, yu no mas kwik blong talem long hem se i moagud sipos hem i lego wok blong paenia. Maet advaes ya i stret long samfala, be yu no mas fogetem se wok blong paenia i wan nambawan blesing we ating paenia ya i laekem mo tinghae tumas long hem. Maet hem i nidim nomo we yu talem sam tok blong leftemap tingting blong hem, mo givim sam gudfala advaes mo help long hem. Ofis blong Sosaeti long Spen i raetem se: “Taem ol elda oli leftemap wok blong paenia, sapotem ol paenia long wok blong prij, mo visitim ol paenia oltaem blong leftemap tingting blong olgeta, ale, ol paenia oli moa glad, oli harem se kongregesen i nidim olgeta, mo oli wantem gohed nating se oli kasem problem.”

22. Long hadtaem ya we yumi laef long hem, ?yumi mas gat strong tingting blong mekem wanem?

²² Yumi stap laef long wan taem we i had tumas. Jeova i givim wan wok long yumi we i save sevem laef blong ol man. (Rom 10:13, 14) Nating se yumi save mekem wok ya fultaem olsem ol paenia no nogat, yumi save soem speret blong paenia. Yumi mas holem tingting ya se wok blong prij i impoten tumas from we taem i sot, mo yumi mas rere blong lego sam samting we yumi nomo i wantem. Yumi mas gat strong tingting blong givim long Jeova samting we hem i askem​—wok wetem ful laef blong yumi. !Mo yumi no mas fogetem se taem yumi givim olgeta samting we yumi naf blong givim, nating se hemia i olsem smosmol mane blong wido ya no sas senta blong Meri, be sipos yumi mekem wok ya wetem ful laef blong yumi, ale Jeova i stap tinghae tumas long wok ya!

?Yu Yu Tingbaot?

◻ ?From wanem wok blong prij fultaem i mekem man i haremgud mo i glad?

◻ From ol samting we i hapen long laef blong ol paenia, ?oli save wanem long saed blong fasin blong Jeova blong lukaotgud long ol man blong hem?

◻ ?Ol paenia oli harem se wok blong prij i mekem wanem long fasin fren blong olgeta wetem Jeova?

◻ ?Olsem wanem yu save soem speret blong paenia?

[Tok Blong Pija Long Pej 23]

Ol paenia oli kasem bigfala glad from wok blong mekem disaepol

[Tok Blong Pija Long Pej 23]

Fasin blong joen wetem olgeta we oli talemaot Kingdom fultaem i save givhan long ol pikinini blong yu

[Tok Blong Pija Long Pej 23]

Ol elda oli save leftemap tingting blong ol paenia long saed blong wok blong prij