“Yufala i Mas Mekem Tingting Blong Yufala i Longfala”

¹ Naoia we yumi kam klosap moa long en blong olfala wol blong Setan, ‘yumi mas mekem tingting blong yumi i longfala,’ go kasem dei we Jeova bambae i mekem olgeta man oli gofri. Antap moa long taem blong yumi, ol rabis enjel blong Setan oli traehad blong mekem se yumi no moa tingbaot se bambae i no longtaem, Jeova i leftemap hae rul blong hem. Setan i traem pulum yumi blong tingting long yumi nomo, mo blong trikim yumi blong mekem se yumi kam slak mo yumi no moa joen long wok blong talemaot Kingdom. (Jem. 5:​7, 8; Mat. 24:13, 14) Taswe yumi nidim wan tingting we i longfala. ?Olsem wanem yumi save wokem fasin ya?

² Stap Rere Blong Wet: Long wok blong prij, taem yumi mitim sam man we oli no intres nating, no oli agensem yumi, bambae yumi gohed long wok ya sipos yumi stap rere blong wet. Bambae yumi no kwik blong kam kros, mo yumi no fraet taem ol man we yumi mitim oli tok strong mo oli no kaen. (1 Pita 2:​23) Strong tingting ya bambae i blokem yumi blong talem sam tok we oli daonem ol man blong teritori blong yumi we oli no wantem lesin no oli agensem wok blong prij. Sipos yumi toktok olsem, samting ya i save mekem se tingting blong yumi i foldaon, mo tu yumi save spolem tingting blong olgeta we oli prij wetem yumi.

³ Stap Strong Blong Soem Wan Tingting We i Longfala: Samtaem, ating tingting blong yumi i foldaon lelebet taem yumi no moa faenem bakegen wan man we i bin intres gud. Samtaem i sem mak tu, taem ol studen blong yumi oli tekem tumas taem blong gru long saed blong spirit, no blong tekem disisen blong laenap laef blong olgeta wetem trutok. Be sipos yumi strong blong gat wan tingting we i longfala, bambae yumi kasem sam gudfala frut. (Gal. 6⁠:⁠9) Wan sista i visitim plante taem wan yangfala woman bifo we hem i akseptem wan Baebol stadi. Sista i kam luk woman ya faef taem, mo oltaem, woman i talem se hem i bisi tumas. Long namba sikis taem, nating se i gat wan hariken, sista ya i kam, be woman i no stap long haos blong hem. Nating se i olsem, sista i gat strong tingting blong givim jans long woman ya blong stadi Baebol, ale, hem i kam bakegen mo hem i faenem woman ya, mo taem ya nao, woman i rere blong stadi. Afta samting ya, studen ya i gohed gud, mo smoltaem biaen, hem i givim laef blong hem i go long Jeova.

⁴ Yumi save se dei blong Jeova bambae i no kam let. Taswe yumi wet long dei ya, mo yumi sua se longfala tingting blong Jeova bambae i karem sam nambawan frut. (Hab. 2:3; 2 Pita 3:​9-​15) Yumi mas wokem wan tingting we i longfala, olsem Jeova i mekem, mo yumi no mas lego wok blong prij blong yumi. Yumi mas gat wan ‘strong bilif, mo wan tingting we i longfala,’ mo yumi save trastem se Jeova bambae i givimbak long yumi from had wok we yumi mekem.​—Hib. 6:​10-​12.