Ol Man Blong Givhan Oli Mekem Bigfala Wok
1 Buk ya Ol Rul Blong Mekem Minista Wok Blong Yumi long pej 55, i tokbaot ol man blong givhan hem i se: “Oli soemaot finis we oli rili givim laef blong olgeta long God. Oli strong blong mekem wok blong Kingdom mo blong halpem ol narafala man blong oli kam strong long bilif.” Yes, i gud blong folem gudfala eksampel long saed blong spirit we ol man blong givhan oli soem. Sipos yumi wok wetem olgeta ya mo ol elda, ‘yumi stap soemaot lav, nao bodi ya blong Kraes i save kam strong moa.’—Efes. 4:16.
2 Ol man blong givhan oli mekem wan impoten wok insaed long kongregesen. Tingbaot ol gudfala wok we oli stap mekem: lukaot long ol kaon blong kongregesen, ol buk, ol magasin, sabskripsen no ol teritori blong prij; mekem welkam mo lukaot long ol miting blong i gat oda long hem; lukaot long maekrofon; mo lukaot ol wok blong fiksimap Haos Kingdom mo blong mekem hem i stap klin oltaem. Oli gat haf long Tiokratik Skul mo long miting blong Kingdom wok. Olsem ol memba blong wan bodi, ol man blong givhan oli givim help we yumi nidim.—1 Kor. 12:12-26.
3 Taem ol man blong givhan mo ol elda oli wok gud tugeta, wetem respek mo kaen fasin, samting ya i leftemap tingting blong narafala blong mekem sem mak. (Efes. 4:16) Taem oli holem strong long wok blong olgeta evri wik mo taem oli soem intres long narafala, oli mekem se kongregesen i gohed gud long saed blong spirit.
4 ?Yumi save mekem wanem blong soem tangkiu long ol man blong givhan we oli wokhad? Yumi mas luksave ol wok we oli mekem mo rere blong wok gud wetem olgeta taem oli askem yumi blong mekem wan samting. Tru long ol tok mo wok blong yumi, yumi save soemaot long ol man blong givhan se yumi glad long wok blong olgeta. (Prov. 15:23) Olgeta we oli wok strong blong yumi oli mas kasem fasin tangkiu blong yumi.—1 Tes. 5:12, 13.
5 Tok blong God i eksplenem wanem wok we wan man blong givhan i mas mekem mo wanem ol gudfala fasin we hem i mas gat. (1 Tim. 3:8-10, 12, 13) Tabu wok blong olgeta i rili impoten insaed long kongregesen blong mekem se evri samting i ron gud. I gud sipos oltaem yumi leftemap tingting blong ol man olsem, from we “oli stap wok strong long wok blong Masta blong yumi.”—1 Kor. 15:58.