?Yu Yu Rili Gat Tangkyu From Ol Blesing We Jeova i Givim?

KENICHI, wan man we i olfala lelebet, i kasem kof, ale hem i go long drag stoa blong pem meresin. Taem hem i dring meresin ya, bodi blong hem i solap olbaot mo i skras, from we meresin ya i nogud long hem. Yumi luksave from wanem Kenichi i stat tingting se man long drag stoa ya i no bin traehad blong save stret meresin we hem i nidim.

Maet samfala oli tingbaot Jeova God long sem fasin we Kenichi i bin tingbaot man ya long drag stoa. Oli no bilif fulwan se Jeova, God ya we i gat olgeta paoa, i rili intres long yumi wanwan. Oli agri se God i gud, be oli no sua se hem i kea long yumi wanwan. Samting ya i tru moa taem oli gat trabol, no taem oli kasem hadtaem from oli folem ol rul blong Baebol. Mo, from we oli no gat fasin luksave, oli tingbaot ol trabol ya olsem sik ya we i mekem bodi blong Kenichi i skras mo i solap olbaot.​—Proveb 19:3.

Yumi no save skelem Jeova wetem ol sinman. Ol man oli gat smol save nomo mo oli no naf blong mekem plante samting. Oli no luksave fulwan ol trufala nid blong ol narafala, olsem man long drag stoa i no luksave nid blong Kenichi. Be i no gat wan samting we Jeova i no save luk. Plante taem, Jeova i givhan long yumi, be yumi no luksave samting ya mo yumi no gat tangkyu from. Yumi tingbaot moa ol samting we yumi no gat, mo yumi fogetem ol blesing we yumi gat. Yumi no mas talem se ol trabol we yumi kasem oli fol blong Jeova. I moagud we yumi traem luksave ol blesing we hem i stap givim long yumi.

Buk ya Webster’s Ninth New Collegiate Dictionary i talem se, wan “blesing” hemia “wan samting we i mekem man i glad no i mekem i gud long man.” ?Yu yu luksave se samting ya i tru tumas long saed blong ol blesing we Jeova i stap givim?

Nambawan Man Blong Givim Ol Samting We Yumi Nidim

Sipos waef i talem se hasban blong hem i wan gudfala man blong wok, hem i minim se man ya i givim ol samting we famle blong hem i nidim, olsem kakae, haos, mo klos, blong mekem famle i glad mo mekem i gud long olgeta. ?Fasin blong Jeova blong givim ol samting we yumi nidim, i gud olsem wanem? Tingbaot Wol we i olsem haos blong ol man. Hem i stap 150,000,000 kilomita longwe long san. Hemia long stret ples nomo blong mekem se i no hot tumas mo i no kolkol tumas long ol laef samting long wol. Wol i lei smol, long 23.5 digri, mekem se i save gat kol taem mo hot taem. Samting ya i stretgud blong mekem garen i karem plante kakae. From samting ya, graon i givim kakae we i naf long bitim faef bilyan man. !Tru ya, Jeova i rili nambawan Man blong Givim Ol Samting we yumi nidim!

Mo tu, Baebol i talem klia se Jeova i rili intres bigwan long yumi wanwan mo ol samting we oli gud long yumi. Tingbaot se Jeova i save nem blong ol bilyan sta wanwan, mo hem i save sipos wan smosmol pijin nomo i foldaon long graon. (Aesea 40:26; Matyu 10:29-​31) !I sua se hem i intres moa long ol man we oli laekem hem mo we hem i pemaot olgeta wetem nambawan blad blong Pikinini blong hem Jisas Kraes, we hem i laekem tumas! (Ol Wok 20:28) Wan waes man i talem tru taem hem i se: “Blesing blong Jeova, hemia nao samting we i mekem man i rij. Mo hem i no givim soa wetem.”​—Proveb 10:22.

Ol Blesing We Oli Mekem Yumi Rij

Yumi gat wan samting we i nambawan tumas, mo yumi mas gat bigfala tangkyu from. ?Wanem samting ya? Baebol i talem se: “Long mi, Loa blong yu i gud moa, i winim olgeta mane long wol ya.” (Ol Sam 119:72; Proveb 8:10) Nating se gol i sas tumas, be Loa blong Jeova i gud moa. Stret save long Loa blong hem, mo fasin luksave we hem i givim long olgeta we oli lukaot trutok wetem fulhat blong olgeta, oli olsem samting we i sas tumas. Bambae ol fasin ya oli lukaotgud long yumi, mo givhan long yumi blong winim ol trabol. Olsem nao, yumi save stap glad mo haremgud.

Hemia i tru long saed blong ol pikinini tu. Tingbaot olsem wanem wan smol gel i winim problem blong hem taem hem i folem loa blong Jeova. Gel ya Akemi, i stap kolosap long Tokyo. Papa mama blong hem i folem ol rul blong Baebol blong tijim gel ya. From ol tok mo gudfala eksampel blong tufala, sloslou gel ya i laekem Jeova mo ol man raonabaot long hem. Tufala i save se bambae hem i kasem trabol long skul, taswe tufala i traem bes blong tufala blong mekem tingting blong hem i rere from ol problem ya. Nating se i olsem, taem Akemi i stat long skul, sam pikinini oli luk se hem i “defren,” from we hem i prea bifo we hem i kakae, mo hem i no joen long ol samting we oli agensem tok blong Baebol. I no longtaem, wan grup blong ol stronghed pikinini oli stat mekem nogud long hem. Afta we skul i finis, oli holem hem, slavem fes blong hem, tantanem han blong hem, mo laf long hem.

Smol Akemi i no givimbak, mo hem i neva lusum strong tingting blong hem long fored blong olgeta ya. Hem i traem folem ol samting we hem i bin lanem. Gudfala fasin mo strong tingting blong hem i pulum plante pikinini blong gat respek long hem. Oli talemaot long tija wanem i stap hapen, mo stat long dei ya, Akemi i no moa kasem trabol long skul.

?Wanem i halpem Akemi blong stanap strong tru long ol trabol ya? Stret save, fasin luksave, mo waes blong Jeova we papa mama blong hem i bin tijim long hem. Hem i savegud se Jisas i stanap strong tru long ol hadtaem, mo samting ya i pusum hem blong folem eksampel blong Jisas. Baebol i givhan long Akemi blong luksave se samfala oli mekem i nogud from we oli no gat save. Mo Baebol i pulum hem blong laekem ol man, be no laekem nating ol nogud fasin we ol man ya oli mekem.​—Luk 23:34; Rom 12:​9, 17-​21.

I sua se i no gat wan papa mama we i wantem se narafala i jikim mo i mekem nogud long pikinini blong tufala. Be, tingbaot glad blong papa mama blong Akemi taem tufala i harem store blong ol samting we oli bin hapen. Ol pikinini olsem oli rili wan blesing we Jeova i givim.​—Ol Sam 127:3; 1 Pita 1:​6, 7.

Wet Long Jeova Wetem Longfala Tingting

Sam samtaem, yu mas wet bifo we yu kasem blesing blong Jeova. Hem i savegud laef blong yu, mo bambae hem i givim ol wanwan samting we yu nidim long taem we oli gud moa long yu. (Ol Sam 145:16; Eklesiastis 3:1; Jemes 1:​17) Maet yu laekem blong kakae frut, be ?wanem tingting blong yu long wan man we i singaot yu blong kakae long haos blong hem, nao i givim wan frut long yu we i no rere blong kakae yet? I sua se yu yu laekem moa blong kakae wan frut we i raep, i gat wora long hem, mo i swit, nomata se hem i wan apol, wan aranis, no wan narafala frut. Sem mak nao, Jeova i stap givim samting we yu nidim long stret taem​—i no eli tumas mo i no let tumas.

Tingtingbak long store blong Josef. Nating se hem i no gat fol, oli sakem hem i go long kalabus long Ijip. Man we i stap karem waen i go long Fero oltaem, hem tu i kalabus wetem Josef. Hem i hop blong aot long kalabus ya afta we smoltaem i pas, mo i promes blong tokbaot problem blong Josef wetem Fero. Be taem hem i aot long kalabus, hem i no moa tingbaot Josef. Nao, i olsem we olgeta man evriwan oli lego Josef i stap hem wan nomo. Be, tu yia biaen, hem i aot long kalabus mo hem i kam namba tu rula blong Ijip. Josef i gat longfala tingting mo hem i wet long Jeova. From samting ya, hem i kasem wan blesing we i givim jans long hem blong sevem laef blong ol man Isrel mo ol man Ijip tu.​—Jenesis 39:1–​41:57.

Masashi i wan elda long wan kongregesena long not blong Japan. Hem i no stap long kalabus olsem Josef, be hem tu i mas wet long Jeova. ?From wanem? Stat long taem we Ministeriol Trening Skul i stanap, hemia wan kos blong trenem ol Kristin man we oli nafgud blong mekem wan spesel wok, Masashi i wantem tumas blong mekem kos ya. Hem i prea strong blong kasem blesing ya. Oli singaotem brata we i stap paenia wetem hem blong mekem kos ya be oli no singaotem Masashi, nating se hem i wantem tumas blong mekem. Tingting blong hem i foldaon bigwan.

Hem i traehad blong winim ol filing blong hem. Hem i stadi Baebol mo ol buk we Wajtaoa Sosaeti i wokem, we oli tokbaot tingting daon mo olsem wanem blong bos long ol filing blong yumi. Hem i stretem sam tingting blong hem, mo long rod ya, hem i faenem moa glad long wok blong hem. Biaen, oli singaotem hem blong mekem kos ya, long wan taem we hem i no tingbaot nating.

From we Masashi i wokem finis ol fasin olsem longfala tingting mo tingting daon, kos ya i givhan moa long hem i bitim sipos hem i bin mekem bifo finis. Biaen, hem i kasem blesing ya blong wok olsem wan elda we i goraon blong visitim ol kongregesen. Yes, Jeova i save samting we Masashi i nidim, mo i givim samting ya long taem we i moa gud long hem.

Traehad Blong Kasem Blesing

Taswe, Jeova i no olsem man ya long drag stoa we yumi tokbaot fastaem. Nating se samtaem yumi no luksave samting we Jeova i mekem blong lukaotgud mo soem lav long yumi, be kaengud fasin blong hem i kasem yumi long ol defren rod. Yumi kasem samting ya long ol taem mo ol fasin we oli stretgud long yumi. Taswe, yumi mas traehad blong kasem blesing blong hem. Tingbaot se yu gat plante risen blong talem tangkyu long hem. Yu gat ol stampa samting we yu nidim blong laef long wol ya. Yu gat save long saed blong Jeova mo ol fasin blong hem we oli stretgud olgeta. Yu gat waes mo fasin luksave. Ol fasin ya oli mekem i gud long yu mo oli givim glad.

Blong kasem ol blesing blong Jeova we oli bigwan moa, yu mas gohed blong stadi Baebol oltaem. Askem long Jeova blong halpem yu blong kasem save long ol nambawan tijing blong Baebol, mo blong folem olgeta long laef blong yu. Bambae oli mekem se yu yu rij long saed blong speret, mo yu no save sot long wan samting. Yes, bambae oli mekem yu yu hapi mo yu haremgud naoia, mo bambae yu kasem laef blong olwe long nyufala wol we i stap kam.​—Jon 10:10; 1 Timote 4:​8, 9.

[Futnot]

[Pija long pej 23]

Blesing blong Jeova i sas moa i bitim gol