200 man, blong singaotem olgeta oli kam long mared blong hem, ?from wanem hem i no save faenem taem blong raetem smol tok blong talem tangkyu from ol 163 presen we hem i kasem?” Plante man oli no stap talem smol tok ya “tangkyu.” Tingting ya, ‘mi fastaem,’ i stap tekem ples blong fasin tangkyu. Fasin ya we man i tingbaot hem wan fastaem i wan fasin we i makemaot ol las dei. Aposol Pol i givim woning ya se: “Yufala i mas luksave se ol las dei bambae oli fulap long denja. Bambae ol man oli tingbaot olgeta nomo . . . Bambae oli no gat tangkyu nating.”​—2 Timote 3:1, 2, Filips.

Samfala oli tok swit i bitim we oli talem tangkyu. Trufala fasin tangkyu i kamaot long hat, mo man we i soem fasin ya i no mekem olsem blong kasem wan samting blong hem wan. Be, plante taem, tok swit i no kamaot long hat mo i bitim mak. Mo maet tingting we i pusum man blong tok swit, hemia se hem i stap traem blong pulum narafala blong givim wan wok long hem we i hae moa, no blong mekem i gud long hem long wan narafala rod. (Jud 16) Ol naesfala tok olsem i blong trikim man, mo antap long samting ya, i soemaot fasin flas mo tingting we i antap tumas. ?Taswe, hu i wantem se narafala i trikim hem wetem ol swit tok we i no kamaot long hat? I no gat wan man we i wantem samting ya. Be, trufala fasin tangkyu i rili mekem man i haremgud.

Man we i soem fasin tangkyu, i mekem i gud long hem wan bakegen. Gudfala filing we hem i kasem from fasin tangkyu we i stap long hat blong hem, i mekem se hem i hapi mo i gat pis. (Lukluk Proveb 15:13, 15.) Mo tu, from we fasin tangkyu i wan gudfala fasin, hem i givhan long man blong blokem ol nogud filing olsem kros, jelas, mo fasin agens.

“Yufala i Mas Stap Talem Tangkyu”

Baebol i talem se yumi mas wokem fasin tangkyu. Pol i raetem se: “Long olgeta samting we oli stap kamtru long yufala, yufala i mas stap talem tangkyu long God. From we God i wantem we yufala ya we i stap joen long Jisas Kraes, bambae yufala i stap mekem olsem.” (1 Tesalonaeka 5:18) Mo Pol i givim advaes ya long ol man Kolosi se: “Yufala i mas letem pis ya we Kraes i stap givim long yufala i holem tingting blong yufala, i lidim yufala long rod blong Kraes . . . Mo oltaem yufala i mas stap talem tangkyu.” (Kolosi 3:15) Long plante Sam, i gat ol tok blong talem tangkyu. Samting ya i soemaot se trufala tangkyu i wan fasin blong God. (Ol Sam 27:4; 75:1) I klia se Jeova God i glad tumas taem yumi soem tangkyu long saed blong ol smosmol samting evri dei long laef blong yumi.

?Be wanem sam samting we oli mekem i had blong wokem fasin tangkyu, long wol ya we i no gat tangkyu long hem? ?Olsem wanem yumi save soem fasin tangkyu evri dei? Haf we i kam biaen bambae i tokbaot ol kwestin ya.

Wokem Fasin Tangkyu

LONG Nyu Yok Stet, wan dokta i wok kwik blong sevem laef blong Marie we i gat 50 yia blong hem. Be Marie i no talem tangkyu long dokta ya, mo i no pem hem tu. !Hemia wan nomo long plante store we oli soemaot fasin blong no gat tangkyu nating!

Baebol i tokbaot wan taem we Jisas i kamtru long wan velej, nao hem i luk ten man we oli gat nogud sik ya leprosi. Oli singaotem Jisas long bigfala voes, se: “!Jisas, Masta, plis yu sore long mifala!” Jisas i talem long olgeta se: “Yufala i go pas long pris blong i luk bodi blong yufala.” Ol man ya oli obei long hem, nao taem oli stap wokbaot i go, oli luk mo oli filim se bodi blong olgeta i stap kamgud.

Naen long ol man ya oli wokbaot i go nomo. Be namba ten man we i wan man Sameria, i tanraon, i gobak blong faenem Jisas. Man ya i presem God, mo taem hem i faenem Jisas, hem i nildaon long graon long leg blong Jisas, mo i talem tangkyu long hem. Blong ansa long hem, Jisas i talem se: “?Olsem wanem? Mi mi ting se i gat ten man we bodi blong olgeta oli kam klin. ?Wehem ol narafala naen man ya? Man ya i wan strenja ya. ?From wanem hem nomo i save kambak blong leftemap nem blong God, ol narafala naen ya oli no save kambak?”​—Luk 17:11-​19.

Yumi lanem wan impoten lesen from kwestin ya se: “?Wehem ol narafala naen man ya?” Olsem Marie, ol naen man ya oli gat wan bigfala nogud fasin​—oli no gat tangkyu. Fulap man tede oli olsem. ?From wanem?

Stampa Risen Blong No Gat Tangkyu

Fasin blong no gat tangkyu i kamaot from we man i tingbaot hem wan nomo. Olsem, faswan papa mama blong yumi, Adam mo Iv. Jeova i wokem tufala wetem ol gudfala fasin we oli kamaot long hem, mo i givim olgeta samting we tufala i nidim blong stap hapi, olsem wan naesfala garen blong stap long hem, ol nambawan samting raonabaot long tufala, mo wan wok we i givim mining long laef blong tufala mo i mekem tufala i haremgud. (Jenesis 1:​26-​29; 2:​16, 17) Be, Setan i yusum wan trik blong pulum tufala blong tingbaot tufala nomo. Ale, tufala i no moa obei long God, mo tufala i ting nating long gudfala fasin blong Jeova blong givim plante samting long tufala.​—Jenesis 3:​1-5; Revelesen 12:9.

Tingbaot tu, ol man Isrel we God i jusumaot olgeta oli blong hem nomo. !I sua se ol papa mama long Isrel oli gat tangkyu long naet blong Naesan 14, 1513 B.K.T.!a Long impoten naet ya, enjel blong God i kilim i ded “olgeta fasbon pikinini boe” long Ijip. Be hem i pasova long ol haos blong ol man Isrel we oli putum mak long olgeta, olsem God i bin talem. (Eksodas 12:12, 21-​24, 30) Afta we God i sevem Isrel oli aot long han blong ami blong Fero long Red Si, ‘Moses wetem ol laen blong Isrel oli sing long wan sing blong presem Jeova,’ from we hat blong olgeta i fulap long tangkyu.​—Eksodas 14:19-​28; 15:​1-​21.

Be, sam wik nomo afta we ol man Isrel oli aot long Ijip, ‘oli stat tok smosmol agens.’ !Kwiktaem nomo oli foldaon long fasin blong no gat tangkyu! Oli mestem ‘ol sospen we oli fulap long mit . . . , mo bred we oli save kakae olsem oli wantem,’ ol samting ya we oli bin haremgud long hem long Ijip, ples we oli bin wok slef long hem. (Eksodas 16:​1-3) I klia se fasin we man i tingbaot hem wan nomo, bambae i blokem hem blong wokem mo soemaot tangkyu.

Yumi evriwan i pikinini blong sinman ya Adam. Taswe, yumi bon wetem fasin we yumi tingbaot yumi nomo mo yumi no gat tangkyu. (Rom 5:​12) Mo tu, fasin ya blong no gat tangkyu i joen wetem stampa tingting blong wol ya, hemia se ol man oli tingbaot olgeta nomo. Tingting ya i stap raonabaot long yumi evri ples, olsem win we yumi pulum, mo hem i gat paoa long yumi. (Efesas 2:​1, 2) Taswe, yumi nidim blong wokem fasin tangkyu. ?Olsem wanem yumi save mekem olsem?

!Yumi Mas Tingting Dip!

Buk ya, Webster’s Third New International Dictionary, i talem mining blong fasin tangkyu se, “tingting we i fulap long tangkyu: kaengud filing mo filing blong laekem wan narafala man we i mekem i gud long yumi, mo filing ya i pulum yumi blong mekem i gud long hem bakegen.” Wan filing i no olsem wan laet we yumi save laetem mo kilim taem yumi wantem, no gat. Wan filing i kamaot hem wan. Fasin tangkyu i no minim nomo se yumi jes talem tangkyu olsem wan kastom we yumi folem oltaem. Fasin ya i kamaot long hat.

?Olsem wanem yumi save gat filing ya blong tangkyu long hat blong yumi? Baebol i talem se filing blong yumi i dipen bigwan long ol samting we yumi tingbaot. (Efesas 4:​22-​24) Blong gat filing ya blong tangkyu, fastaem yumi mas tingting dip long kaengud fasin we ol narafala oli mekem long yumi. Long saed blong samting ya, Dokta Wayne W. Dyer, we i stadi long saed blong tingting blong man, i talem se: “Yu no save gat wan filing sipos yu no gat wan tingting fastaem.”

Blong kasem save long samting ya, yu save tingbaot fasin tangkyu we yu yu gat from ol samting raonabaot long yu we God i wokem. Taem yu lukluk i go antap long skae we i fulap long ol sta, long wan naet we i no gat klaod, ?wanem filing i kamaot long yu? King Deved i tokbaot filing blong respek mo ona we hem i gat, i se: “Taem mi mi luk skae we yu yu mekem, wetem mun mo ol sta we yu yu putum oli stap long prapa ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu yu lukaotgud long hem.” Mo long naet, taem ples i kwaetgud, i olsem we ol sta oli toktok long Deved. Samting ya i pulum hem blong raetem se: “Skae i stap talemaot bigfala paoa blong God, mo ol samting ya long hem oli stap soemaot ol gudfala wok we God i mekem.” ?From wanem ol sta long skae oli gat bigfala paoa long filing blong Deved? Hem i ansa se: “Mi stap tingbaot olgeta samting ya we yu yu mekem, mi stap tingting long olgeta wok ya we yu bin mekem long mi.”​—Ol Sam 8:​3, 4; 19:1; 143:5.

Solomon, pikinini blong Deved, hem tu i luksave se i impoten blong tingbaot ol samting blong sapraes we God i wokem. Eksampel, long saed blong wok we ol klaod oli mekem blong hivimap wora we i foldaon olsem ren blong wasem ol tri mo flaoa, hem i raetem se: ‘Bigfala ren we i foldaon long koltaem i fulumap ol reva, nao i ron i godaon kasem solwora, be solwora i no fulap. Biaen, wora ya i gobak antap, long ples we i kamaot long hem fastaem, mo ren i foldaon bakegen.’ (Eklesiastis 1:7) Taswe, taem ren i foldaon mo wora blong ol reva i wasem ol flaoa mo tri finis, hem i ron i go long solwora nao san i pulum hem i go antap, blong i mekem ol klaod bakegen. ?Bambae wol ya i olsem wanem sipos i no gat fasin ya, we wora i klinim hem wan mo i gobak antap blong mekem ren i foldaon bakegen? !Ating Solomon i gat filing blong bigfala tangkyu taem hem i tingting dip long samting ya!

Mo tu, wan man we i gat tangkyu, i tinghae long fasin fren we hem i gat wetem famle blong hem, ol fren blong hem, mo ol narafala man we hem i save olgeta. Kaengud fasin blong olgeta i pulum tingting blong hem. Taem hem i tingbaot kaengud fasin ya blong olgeta, hem i gat filing blong tangkyu long hat blong hem.

Talem Tangkyu

!Tok ya “tangkyu” i smol nomo! I isi nomo blong talem, mo yumi gat plante jans blong talem. !Wan man we i openem doa blong letem yumi pas, no i pikimap wan samting blong yumi we i foldaon long graon, bambae i haremgud tumas sipos yumi talem Tangkyu long hem, we i kamaot long hat blong yumi mo i soemaot filing! Taem yumi talem smol tok ya long wan man we i wok long stoa, wan woman we i wok long restoron, no long man we i karem ol leta blong yumi oli kam, yumi mekem wok blong olgeta i isi moa, mo oli haremgud moa long hem.

Wan gudfala rod blong soem tangkyu from kaengud fasin we narafala i mekem long yumi, i blong sanem wan kad blong talem tangkyu. Long stoa, yumi save faenem plante kad we oli gat ol naesfala tok insaed long olgeta blong talemaot filing blong yumi. Be yumi save soemaot moa lav sipos yumi ademap prapa tok blong yumi blong talem tangkyu. Samfala oli no pem ol kad long stoa, oli laekem moa blong raetem wan smol leta wetem prapa han blong olgeta.​—Lukluk Proveb 25:11.

Ating olgeta we yumi mas soemaot tangkyu moa long olgeta, hemia famle blong yumi. Baebol i talem long saed blong wan gudfala waef se: “Man blong hem i girap, mo i presem hem.” (Proveb 31:28) Taem hasban i talem tangkyu long waef wetem fulhat blong hem, samting ya i givhan long famle blong gat pis mo glad. Mo taem hasban i kambak long haos, hem tu i haremgud sipos waef i talem halo wetem glad mo lav. Long taem blong yumi, ol mared man mo woman oli kasem plante hadtaem, mo taem ol traem oli kam antap tumas, i isi nomo blong kam kros. Be man we i gat tangkyu, i no save gat fasin we i strong tumas. Hem i rere blong fogetem plante mastik mo fogivim narafala.

Ol yangfala tu oli no mas fogetem blong talem tangkyu wetem fulhat blong olgeta long papa mama blong olgeta. I tru se ol papa mama oli no stretgud olgeta. Be hemia i no wan risen blong no soem tangkyu long tufala from ol gudfala samting we tufala i mekem long yu. Lav mo kaengud fasin we tufala i bin soem long yu stat long taem we yu bon, hem i gud moa i bitim eni samting we yu save pem. Sipos tufala i bin tijim yu long ol save blong God, hemia wan narafala risen blong soem tangkyu long tufala.

Ol Sam 127:3 i talem se: ‘Ol pikinini ya blong yumi, hemia wan presen we Jeova i givim long yumi.’ Taswe, ol papa mama oli mas tekem evri jans blong presem ol pikinini blong olgeta, i bitim we oli toktok tumas from evri smosmol samting. (Efesas 6:4) !Mo tu, oli gat blesing ya blong givhan long ol yangfala blong olgeta blong wokem fasin tangkyu!​—Lukluk Proveb 29:21.

Tangkyu Long God

Jeova God i stap Givim “evri samting we oli gud mo evri presen we oli nambawan.” (Jemes 1:​17) Wan presen we i impoten tumas, hemia laef. Sipos yumi no moa laef, be olgeta samting we yumi gat mo ol plan we yumi mekem, oli blong nating nomo. Baebol i talem long yumi blong no fogetem se Jeova i “stampa blong laef.” (Ol Sam 36:​5, 7, 9; Ol Wok 17:28) Blong wokem fasin tangkyu long God long hat blong yumi, yumi nidim blong tingting dip long olgeta samting we hem i stap givim blong sapotem yumi long saed blong bodi mo long saed blong speret. (Ol Sam 1:​1-3; 77:11, 12) Wan hat olsem bambae i pusum yumi blong soem tangkyu long ol tok mo ol fasin blong yumi.

Wan impoten rod blong talemaot tangkyu long God, hemia tru long prea. Deved, man blong raetem Ol Sam, i talem se: ‘Jeova, yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu. Yu yu mekem plante gudfala plan blong mifala i folem. Mi mi no save tokbaot olgeta evriwan, oli plante tumas.’ (Ol Sam 40:5) I gud sipos hat blong yumi i pusum yumi blong talem semkaen tok olsem Deved.

Deved i wantem tumas blong soemaot tangkyu long God long ol tok we hem i talem long ol narafala tu. Hem i talem se: ‘Jeova, mi bambae mi presem yu long olgeta tingting blong mi, mi bambae mi talemaot olgeta gudgudfala wok blong yu.’ (Ol Sam 9:1) Ating nambawan rod blong soemaot tangkyu long God, i blong tokbaot Hem long ol narafala, mo serem trutok blong Baebol wetem olgeta. Mo, samting ya bambae i givhan long yumi blong soemaot tangkyu long saed blong ol narafala samting long laef tu.

Jeova i talem se: “Man we i stap talem tangkyu long mi, i olsem we hem i stap mekem prapa sakrifaes ya, we i leftemap nem blong mi. Man we i stap obei long mi, mi bambae mi sevem hem.” Sipos yu soemaot tangkyu long Jeova wetem fulhat blong yu, bambae yu kasem bigfala glad from.​—Ol Sam 50:23; 100:⁠2.

[Futnot]

[Tok blong pija long pej 7]

Laef i wan presen we God i givim. Meksua se yu ademap wan samting blong soem prapa filing blong yu