Ol Man We ‘Oli Gat Ol Semkaen Filing Olsem Yumi’

LONG taem bifo, i gat wan king we hem i wan profet, mo hem i wan papa we i laekem ol pikinini blong hem tu. Wan boe blong hem i gruap i kam wan man we i flas mo tingting blong hem i antap tumas. Boe ya i wantem sakemaot papa blong hem mo tekem ples blong hem olsem king. Blong traem kilim papa blong hem i ded, hem i statem wan faet bitwin ol man long kantri blong hem. Be, long faet ya, boe ya nao i ded. Taem papa blong hem i harem nyus se boe ya i ded, hem i klaem i go long wan rum antap long haos blong hem, mo i krae se: “!Boe blong mi Absalom, boe blong mi, boe blong mi Absalom! !I moagud we mi mi ded, i bitim yu, boe blong mi Absalom, boe blong mi!” (2 Samuel 18:33) Papa ya, hemia King Deved. Olsem ol narafala profet blong Jeova, hem i ‘gat ol semkaen filing olsem yumi.’​—Jemes 5:​17.

Ol man mo woman long Baebol, we oli bin talemaot ol tok blong Jeova, oli kamaot long ol defren kaen fasin blong laef, oli no ol spesel kaen man. No gat. Olsem yumi, olgeta ya oli kasem plante problem, mo oli harem nogud long plante slak fasin blong olgeta. ?Hu ya sam long ol profet ya, mo olsem wanem ol filing blong olgeta oli sem mak long ol filing blong yumi?

Moses i Lego Fasin Blong Trastem Hem Wan Tumas Mo i Kasem Tingting Daon

Wan impoten profet bifo long taem blong Kraes, hemia Moses. Be, taem hem i gat 40 yia, hem i no rere yet blong mekem wok blong talemaot tok blong Jeova. ?From wanem? Taem ol brata blong Moses oli stap harem nogud aninit long strong rul blong Fero long Ijip, Moses i stap gruap long haos blong Fero, “nao hem i kam wan strong man blong tok mo blong wok.” Baebol i talem se: “Hem i tingbaot se bambae ol man blong ples blong hem oli haremsave we bambae God i yusum hem blong mekem olgeta oli gofri.” Hem i trastem hem wan tumas, nao hem i kilim wan man Ijip i ded blong sevem wan Hibru slef.​—Ol Wok 7:​22-​25; Eksodas 2:​11-​14.

From samting ya, Moses i mas ronwe, ale, hem i go stap farawe long kantri blong Midian. Blong 40 yia, hem i mekem wok blong lukaot long ol sipsip. (Eksodas 2:​15) Afta we ol yia ya oli pas, Moses i gat 80 yia blong hem. Long taem ya nao, Jeova i givim wok long hem olsem wan profet. Moses i no moa trastem hem wan tumas. Naoia, hem i harem se hem i no naf, ale hem i no ting se i gud we Jeova i givim wok ya blong profet long hem. Hem i talem ol tok olsem: “Mi mi olsem nating nomo. Mi mi no naf blong go luk king ya [Fero],” mo, “?Bambae mi mi talem olsem wanem?” (Eksodas 3:​11, 13) Wetem lav, Jeova i mekem tingting blong Moses i strong mo i givhan long hem, nao Moses i go mekem wok ya long nambawan fasin.

?Yu yu olsem Moses? ?Yu bin letem fasin blong trastem yu wan tumas i lidim yu blong mekem no talem sam samting we oli no waes? Sipos yes, yu mas mekem tingting blong yu i stap daon blong kasem moa trening. ?Yu bin harem se yu no naf blong mekem samkaen Kristin wok? Bitim we yu no wantem mekem wok ya, yu mas lesin long advaes we Jeova mo ogenaesesen blong hem i givim. Man ya we i bin givhan long Moses i save givhan long yu tu.

Elaeja i Gat Semkaen Filing Olsem Yumi Taem Hem i Talemaot Panis

‘Elaeja i wan man we i gat ol semkaen filing olsem yumi, be hem i prea strong blong bambae i no ren, nao long tri yia haf i no gat ren nating long ples blong hem.’ (Jemes 5:​17) Prea blong Elaeja i laenap wetem samting we Jeova i wantem mekem, blong panisim wan nesen we i lego Hem. Be, Elaeja i save se draetaem ya we hem i prea from, bambae i mekem i had long ol man. Bighaf blong ol man Isrel, oli man blong wokem garen. Oli dipen long wora blong naet mo ren, blong kasem ol samting blong laef. Sipos draetaem i gohed longtaem, bambae oli harem nogud tumas. Ol kakae oli no save gru, garen bambae i kam drae. Ol anamol blong wok mo blong kakae, bambae oli ded. Sam famle tu oli save ded from hanggri. ?Hu bambae oli harem nogud moa? Ol man olbaot nomo. Biaen, wan widowoman i talem long Elaeja se, hem i bin gat smol sid blong mekem bred i stap, we i naf blong fulumap wan han blong hem nomo, wetem smosmol oel. Hem i bin ting se hem wetem boe blong hem, bambae tufala i ded. (1 King 17:12) Blong prea olsem, Elaeja i nidim strong bilif se Jeova bambae i lukaotgud long ol man blong Hem we oli no lego trufala wosip, nating se oli rij no oli pua. Olsem Baebol i soem, bilif blong Elaeja i no blong nating nomo, from we Jeova i mekem olsemia.​—1 King 17:13-​16; 18:​3-5.

Tri yia biaen, Jeova i soemaot se i no longtaem, bambae hem i mekem ren i foldaon. Yumi luk se Elaeja i wantem tumas we draetaem ya i finis, from we hem i prea strong, bakegen mo bakegen, “we hem i bodaon kasem graon, mo hed blong hem i stap bitwin long tufala leg blong hem.” (1 King 18:42) Plante taem, hem i talem long man blong wok blong hem se: “Plis yu go. Yu lukluk long saed i go long solwora.” Hemia blong traem faenem wan saen blong soem se Jeova i harem prea blong hem. (1 King 18:43) !I sua se hem i glad tumas taem Jeova i ansa long ol prea blong hem, nao “skae i lego ren mo graon i karem plante kakae”!​—Jemes 5:​18.

Sipos yu yu wan papa no mama no wan elda long Kristin kongregesen,a maet yu harem nogud long filing blong yu taem yu mas stretem narafala. Be, blong daonem ol filing olsem, we yumi evriwan i gat, yu mas tingbaot se sam samtaem man i nidim fasin stretem, mo se, taem yumi stretem narafala wetem lav, ‘hem i save faenem frut blong panis ya, bambae hem i gat kwaet laef we i stret nomo long fes blong God.’ (Hibrus 12:11) Oltaem i gat gudfala frut i kamaot taem man i obei long loa blong Jeova. Olsem Elaeja, yumi prea wetem fulhat blong yumi se ol loa blong Hem oli stanap strong.

Jeremaea i No Fraet, Nating Se Tingting i Slak

Ating Jeremaea i raetem moa tok long Baebol long saed blong ol prapa filing blong hem, i bitim ol narafala man. Taem hem i yangfala, hem i no ting se hem i naf blong mekem wok we Jeova i givim long hem. (Jeremaea 1:6) Nating se i olsem, hem i go talemaot tok blong God we hem i no fraet nating. Nao, ol narafala man Isrel oli agensem hem strong, i stat long king i go long ol man olbaot nomo. Samtaem, fasin agens ya i mekem hem i kros mo i krae. (Jeremaea 9:3; 18:20-​23; 20:​7-​18) Wan taem, wan grup blong man i girap agensem hem. Long sam narafala taem, ol man oli kilim hem, oli fasem ol han mo leg blong hem long wan wud, oli sakem hem long kalabus, oli talem se bambae oli kilim hem i ded, mo oli lego hem i stap long sofmad long wan emti wel, blong i ded. Mo tu, sam mesej we Jeova i givim long Jeremaea blong talemaot, oli mekem hem i harem nogud, olsem hem i soem long ol tok ya se: “!O gat blong mi, gat blong mi! Mi mi gat bigfala soa long hat blong mi.”​—Jeremaea 4:​19.

Nating se i olsem, hem i laekem tok blong Jeova tumas, i se: “Tok blong yu i mekem hat blong mi i glad tumas mo i hapi.” (Jeremaea 15:16) Be long semtaem, hem i harem nogud, hem i krae long Jeova, se: “Yu yu kam olsem wan man we i gyaman long mi, olsem wora we mi no moa save trastem,” hemia wora blong wan smol krik we i save kam drae kwiktaem. (Jeremaea 15:18) Jeova i kasem save long ol defren filing ya blong Jeremaea, mo i gohed blong givhan long hem blong finisim wok blong hem.​—Jeremaea 15:20; lukluk 20:​7-9 tu.

?Yu yu olsem Jeremaea, we ol man oli agensem yu long wok blong God, mo plante samting oli hapen blong mekem yu yu harem nogud? Ale, trastem Jeova. Gohed blong folem rod we Hem i soemaot, mo Hem bambae i givim pei long yu tu.

Jisas i Gat Ol Semkaen Filing Olsem Yumi

Profet we i hae moa long olgeta narafala profet, hemia stret Pikinini blong God, Jisas Kraes. Nating se hem i stretgud olgeta, hem i no blokem ol filing blong hem. Plante taem, yumi ridim tok long saed blong ol dip filing blong hem, we ating hem i bin soemaot long fes blong hem mo long ol fasin blong hem. Plante taem, “Jisas i sore” long ol man, mo hem i yusum semfala tok ya long sam pijatok blong hem.​—Mak 1:​41; 6:​34; Luk 10:33.

Ating Jisas i singaot strong taem hem i ronemaot ol anamol mo ol man we oli stap salem ol anamol long haos prea. Hem i se: “Yufala i tekem ol samting ya i go afsaed.” (Jon 2:​14-​16) Taem Pita i givim advaes ya, ‘Masta, yu no mas mekem i strong tumas long yu wan,’ Jisas i tok strong long hem se: “Setan, yu gowe long mi.”​—Matyu 16:22, 23.

Jisas i gat spesel lav long samfala we oli wokbaot wetem hem oltaem. Baebol i tokbaot aposol Jon olsem ‘disaepol we Jisas i laekem hem tumas.’ (Jon 21:​7, 20) Mo tu, yumi ridim se: “Jisas i laekem tumas Mata mo sista blong hem mo Lasros.”​—Jon 11:5.

Jisas i save harem nogud tumas long filing blong hem tu. Taem nogud nyus ya se Lasros i ded i kasem filing blong Jisas, “hem i krae.” (Jon 11:32-​36) Blong soemaot olsem wanem gyaman fren blong hem Judas Iskariot i mekem hem i harem nogud tumas long hat blong hem, Jisas i talem wan tok blong Ol Sam we i save stikim filing blong man, i se: “Man ya we bifo mitufala i kakae long wan plet nomo, naoia hem i tanem tingting blong hem, hem i agens long mi.”​—Jon 13:18; Ol Sam 41:9.

Nating se Jisas i harem i soa bitim mak taem hem i stap hang long pos, hem i soemaot dip filing yet. Hem i talem wetem lav long “man ya blong hem we i laekem hem tumas,” blong lukaot long mama blong hem. (Jon 19:26, 27) Taem hem i luk se man blong brekem loa we i hang long pos kolosap long hem i tanem tingting blong hem from sin, hem i talem wetem sore se: “Bambae yu yu stap wetem mi long paradaes.” (Luk 23:43) Yumi haremsave dip filing blong Jisas, taem hem i kraeaot se: “?God blong mi, God blong mi, olsem wanem yu yu livim mi mi stap olsem ya?” (Matyu 27:46) Mo ol lastok blong hem bifo we hem i ded oli soemaot dip lav mo tras we hem i gat long Papa blong hem, i se: “Papa, mi mi putum laef blong mi long han blong yu.”​—Luk 23:46.

!Ol samting ya oli leftemap tingting blong yumi! “Hae pris ya blong yumi [Jisas], hem i no olsem sam narafala hae pris ya we taem yumi no gat paoa, nao yumi mekem sin, be oli no gat sore long yumi. Hae pris ya blong yumi, hem i gat sore, from we olgeta samting blong traem yumi oli traem hem finis. Hemia nomo i narafala, hem i no mekem sin.”​—Hibrus 4:​15.

Jeova i Trastem Ol Man Blong Hem

Jeova i no sore se hem i bin jusum ol man ya blong talemaot tok blong hem. Hem i save se oli gat fasin blong stap tru long hem, mo hem i fogivim ol slak fasin blong olgeta ya we oli sinman, mo i soem sore long olgeta. Be, hem i strong tu se oli mas mekem wok we hem i givim long olgeta. Wetem help blong hem, oli naf blong mekem olsem.

Yumi mas gat longfala tingting mo soem se yumi trastem ol gudfala Kristin brata mo sista blong yumi. Olsem yumi, olgeta tu oli no save kam stretgud olgeta long wol ya. Yumi neva mas jajem ol Kristin brata blong yumi se oli no naf blong kasem lav mo fasin kea blong yumi. Pol i raetem se: “Yumi ya we yumi strong long fasin ya blong bilif, yumi mas givhangud long olgeta we bilif blong olgeta i no strong. Yumi no save folem ol fasin we yumi nomo i wantem.”​—Rom 15:1; Kolosi 3:​13, 14.

Ol profet blong Jeova oli gat ol semkaen filing we yumi gat. Be, oli trastem Jeova, mo Jeova i givhan long olgeta. Antap long samting ya, Jeova i givim plante risen long olgeta blong glad​—⁠wan gudfala tingting we i no stikim olgeta, oli luksave se Hem i glad long olgeta, ol gudfala fren we oli leftemap tingting blong olgeta, mo promes blong wan hapi fyuja. (Hibrus 12:​1-3) Yumi tu i mas stap tru long Jeova mo trastem hem fulwan. Gohed blong folem bilif blong ol profet ya blong bifo, we ‘oli gat ol semkaen filing olsem yumi.’

[Futnot]

Ol Dokta, Ol Jaj, Mo Ol Wetnes Blong Jeova

LONG Maj 1995, ol Wetnes blong Jeova oli singaot plante man oli kam long tu spesel miting long Brasil. ?Blong wanem? Blong traem mekem se ol dokta mo jaj oli kasem save moa long tingting blong ol Wetnes blong Jeova we oli no agri blong karem blad blong narafala man long hospital.​—Ol Wok 15:29.

Sore tumas, sam dokta oli no bin respektem disisen ya blong ol Wetnes, nao oli bin askem kot blong fosem sam Wetnes blong karem blad. Long ol taem olsem, ol Wetnes oli yusum enikaen rod folem loa blong traem blokem ol dokta ya. Be, oli laekem moa sipos ol dokta mo jaj oli traem kasem save long tingting blong olgeta, i bitim we oli mas rao wetem olgeta. Taswe, ol miting ya oli soemaotgud se i gat plante narafala meresin we ol dokta oli save yusum i bitim we oli givim blad, mo se ol Wetnes blong Jeova oli glad blong karem ol meresin ya.a

Bifo finis, wan miting blong Rijonal Kaonsel Blong Ol Dokta long Sao Polo i sapotem ol Wetnes. Long Janewari 1995, taem kaonsel ya i mekem miting long Sao Polo Stet, oli tekem disisen se sipos wan sikman i no agri long samting we dokta i wantem mekem blong traem winim sik blong hem, hem i gat raet blong talem se hem i no wantem, mo blong jusum wan narafala dokta.

I gud tumas we, naoia i gat plante handred dokta long Brasil we oli rere blong yusum ol narafala meresin i bitim we oli givim blad, sipos sikman i askem olgeta blong mekem olsem. Afta ol miting long Maj 1995, fasin fren bitwin ol dokta, ol jaj, mo ol Wetnes blong Jeova long Brasil i kam antap bigwan. Long 1997, nyuspepa blong ol dokta long Brasil, Âmbito Hospitalar, i karem wan store we i talem strong se ol Wetnes blong Jeova oli gat raet blong no tekem blad sipos oli no wantem. Naoia, fulap man oli agri long tok ya we Rijonal Kaonsel Blong Ol Dokta long Rio de Janero mo Sao Polo i talem finis, se “wok blong dokta blong traem sevem laef blong sikman, i no mas kam moa impoten i bitim wok blong hem blong respektem raet blong sikman blong mekem prapa disisen blong hem.”