!Meksua Se Yu Putum Ol Impoten Samting Long Fasples!

Yu save se i gat miting tunaet, be yu gat wok blong mekem. ?Wanem samting nao bambae yu putum long fasples?

YU YU wan hasban mo wan papa. Afta wan longfala dei blong hadwok we yu mekem, yu stat tingbaot program blong Kristin miting long naet. Sipos yu kambak long haos kwiktaem, yu gat smoltaem nomo blong swim, jenis, kakae wan samting kwiktaem mo go long miting. Wantaem nomo, bos blong yu i kam mo i askem yu blong wok sam moa haoa. Mo hem i promes se bambae hem i leftemap pei blong yu sipos yu mekem olsem. Yu nidim mane ya tumas.

Maet yu yu wan waef mo wan mama. Yu stap rerem kakae blong sapa, nao yu luk wan hif klos we yu no aenem yet. Sam long ol klos ya, yufala i mas werem tumora. Yu stat tingting se: ‘Sipos mi go long miting tunaet, ?wetaem bambae mi save aenem ol klos ya?’ From we yu jes stat wok fultaem, yu kasem save se i had blong mekem ol wok long haos mo wok blong winim vatu long semtaem.

Maet yu yu wan studen. Long rum blong yu, tebel blong yu i fulapgud wetem ol homwok. Bighaf blong ol homwok ya oli bin givim long yu longtaem lelebet finis, be yu no mekem yet. Mo naoia, yu mas mekem sam long ol homwok ya kwiktaem. Yu wantem askem papa mama blong yu blong tufala i letem se bambae yu no go long miting, olsem nao yu save finisim homwok blong yu.

?Weswan long ol samting ya bambae yu yu putum long fasples? ?Wok sam moa haoa? ?Aenem ol klos? ?Mekem ol homwok? no ?Go long miting blong kongregesen? Long saed blong speret, ?i minim wanem se putum ol impoten samting long fasples? ?Wanem tingting blong Jeova long saed ya?

?Wanem Samting i Mas Stap Long Fasples?

Smoltaem afta we ol man Isrel oli kasem ol Ten Komanmen, oli faenem wan man we i stap tekem faea wud long Sabat dei. Hemia wan fasin we i brekem Loa blong Sabat. (Namba 15:32-​34; Dutronome 5:​12-​15) Sipos yu nao yu jaj long taem ya, ?bambae yu jajem bisnes ya olsem wanem? ?Bambae yu jes letem man ya i gofri, from we hemia i no wan wok blong kasem ol sas samting long laef blong hem, be i blong givim wanem we famle blong hem i nidim? ?Bambae yu gat tingting ya se, i gat plante Sabat dei long wan yia, mo i stret blong fogivim hem from we hem i no plan gud fastaem, nao i mestem, i wok long Sabat dei ya?

Tingting blong Jeova long bisnes ya i moa impoten. Baebol i talem se: “Nao Hae God i talem long Moses se, ‘Yufala i mas tekem hem i go afsaed long ples ya blong yufala, mo yufala i go kilim hem i ded.’ ” (Namba 15:35) ?From wanem Jeova i mekem i strong tumas long man ya?

Ol man oli gat sikis dei blong tekem faea wud mo blong lukaot ol narafala samting we oli nidim, olsem kakae, klos, mo haos. Be, namba seven dei, i blong oli kasem ol samting we oli nidim long saed blong speret. I tru se i no rong blong go tekem faea wud. Be, i rong blong yusum taem ya we i blong wosip long Jeova, blong mekem samting ya. I tru se ol Kristin oli no moa stap aninit long Loa blong Moses, ?be yu ting se store ya i save tijim yumi long stret rod blong putum ol impoten samting i stap fasples long laef blong yumi tede?​—Filipae 1:​10.

Afta we ol man Isrel oli spenem 40 yia long draeples, oli rere nao blong go insaed long Promes Lan. Samfala oli taed finis blong kakae mana we God i givim long olgeta long draeples, mo ating oli wantem tumas blong jenisim kakae lelebet. Blong halpem olgeta blong holemtaet stret tingting taem oli go insaed long kantri ya we i “fulap long melek mo eg blong sugabag,” Jeova i mekem olgeta oli tingbaot poen ya se: “Kakae nomo i no save mekem man i laef. Evri tok we [Jeova] i talem, hemia nao i save mekem man i laef.”​—Eksodas 3:8; Dutronome 8:3.

Ol man Isrel bambae oli mas wokhad blong kasem ‘melek mo eg blong sugabag’. Oli mas faet agensem ol ami, bildim ol haos, mo planem ol garen. Nating se i olsem, Jeova i givim oda long olgeta se oli mas tekem smoltaem evri dei blong tingting dip long ol samting long saed blong speret. Mo tu, oli mas tekem taem blong tijim pikinini blong olgeta long ol rod blong God. Jeova i talem se: “Yufala i mas tijim ol pikinini blong yufala long [ol loa blong mi]. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.”​—Dutronome 11:19.

Tri taem long wan yia, evriwan we oli man long Isrel wetem ol proselaet long kantri ya, oli mas kam stanap long fored blong Jeova. Plante hed blong famle, oli luksave se hemia wan taem we ful famle i save harem gud long saed blong speret. Taswe oli tekem waef mo ol pikinini blong olgeta tu, i go wetem olgeta. Be, ?hu bambae i blokem ol enemi blong oli no kam spolem haos mo garen blong famle ya taem oli aot? Jeova i promes se: “Sipos yufala i wokbaot blong kam mekem lafet long ples ya we bambae mi mi makem, be bambae i no gat man i save kam blong stilim graon blong yufala.” (Eksodas 34:24) Ol man Isrel ya oli rili nidim strong tingting blong bilif fulwan se sipos oli putum ol samting long saed blong speret fastaem, bambae oli no lusum wan samting long saed blong bodi. ?Jeova i holem promes blong hem? !Yes, hem i mekem!

Gohed Blong Lukaot Kingdom Fastaem

Jisas i tijim ol man blong hem blong putum ol samting long saed blong speret fastaem long ol narafala samting. Long Bigfala Toktok blong hem antap long Hil, hem i givim advaes long ol man we oli lesin long hem, se: “I nogud yufala i stap tingting tumas, se ‘?Bambae yumi kakae wanem?’ no ‘?Bambae yumi dring wanem?’ no ‘?Bambae yumi kasem klos blong yumi olsem wanem?’ Fastaem yufala i mas [lukaot Kingdom blong God mo stret fasin]. Nao biaen, hem i save givim olgeta samting ya [long saed blong bodi] tu long yufala.” (Matyu 6:​31, 33) Smoltaem afta long ded blong Jisas, ol Kristin we oli jes baptaes, oli folem advaes ya. Plante long ol Kristin ya oli man Jyu, mo ol proselaet long skul blong ol man Jyu. Oli bin wokbaot i go long Jerusalem blong joen long lafet blong Pentekos long yia 33 K.T. Taem oli stap long Jerusalem, wan samting blong sapraes i hapen long olgeta. Oli harem gud nyus long saed blong Jisas Kraes mo oli bilif long hem. From we oli wantem tumas blong lanem moa long saed blong nyufala bilif ya we oli kasem, oli stap longtaem lelebet long Jerusalem. Oli sot long kakae, be ol samting long saed blong bodi oli no impoten tumas long tingting blong olgeta. !Oli faenem Mesaea finis! Ol Kristin brata blong olgeta oli serem olting we oli gat, wetem olgeta blong mekem se oli save gohed blong ‘lesin long ol tok ya we ol aposol oli stap tijim olgeta long hem, . . . mo blong mekem prea.’​—Ol Wok 2:​42.

Biaen, sam Kristin oli lego fasin ya blong joen oltaem long ol miting. (Hibrus 10:23-​25) Ating oli stat tingting tumas long ol samting blong bodi, nao oli lego ol samting long saed blong speret from we oli traehad blong kasem plante mane blong lukaot long olgeta mo famle blong olgeta. Afta we aposol Pol i leftemap tingting blong ol brata blong hem blong no lego ol miting, hem i raetem se: “I nogud yufala i mekem fasin ya we yufala i laekem mane tumas. Sipos yufala i gat wanem samting, be yufala i mas harem gud long hem. From we God i talem finis se ‘Bambae mi mi no save livim yu yu stap yu wan. Bambae mi mi no save lego yu samtaem.’ ”​—Hibrus 13:5.

Advaes ya blong Pol i kamaot long stret taem blong hem. Samwe long faef yia afta we Pol i raetem leta blong hem i go long ol man Hibru, ami blong Rom we Cestius Gallus i lidim, i raonem Jerusalem. Ol Kristin we bilif blong olgeta i strong, oli tingbaot woning blong Jisas se: ‘Taem yufala i luk samting ya . . . , man we i stap spel afsaed long haos blong hem, bambae hem i no save go insaed long haos blong hem bakegen blong tekem sam samting blong hem. Sipos man i stap long garen blong hem, bambae hem i no save gobak long haos blong tekem klos blong hem.’ (Mak 13:14-​16) Ol Kristin ya oli save se blong kasem laef, oli mas obei long ol advaes blong Jisas. Be wan gudfala wok no ol sas samting oli no save sevem laef blong olgeta. Ol man we oli obei long advaes ya mo oli putum ol samting long saed blong speret long fasples, i sua se i moa isi long olgeta blong lego haos, wok, klos, mo ol sas samting blong olgeta mo ronwe i go long ol hil. Be olgeta we oli laekem mane tumas, oli faenem se i had blong mekem olsem.

Olsem Wanem Samfala Tede, Oli Putum Ol Impoten Samting Fastaem

Ol Kristin tede, we oli gat strong bilif, oli laekem tumas blong joen oltaem wetem ol brata mo sista blong olgeta. Plante long olgeta oli lego sam samting we olgeta nomo i wantem, blong oli save joen long ol miting. Long samfala ples, i hadwok long ol brata blong faenem wok. Samtaem oli mas wok long ples blong narafala. Wan brata i askem ol man we oli wok wetem hem, sipos hem i save wok long ples blong olgeta long Sarede naet, wan taem we plante man blong ples ya oli wantem spel. Nao olgeta ya oli save wok long ples blong hem long ol naet we hem i gat miting. Sam narafala brata we oli mekem semfala wok, oli joen long miting we i stap kolosap long ples we oli wok long hem, sipos wok blong olgeta i mekem se oli no save joen wetem prapa kongregesen blong olgeta. Long rod ya, kolosap se oli neva mestem wan miting. Wan woman Kanada, we i intres long trutok, i luksave kwiktaem se i impoten blong joen long miting blong Tiokratik Skul mo Kingdom Wok, be wok blong hem i mekem se hem i no save go long tufala miting ya. Ale, hem i askem wan we i wok wetem hem, blong i tekem ples blong hem nao hem i save fri blong go long tufala impoten miting ya.

Plante brata sista we oli safa from wan sik we i stap longtaem, oli traehad blong no mestem wan miting. Sipos oli harem se oli no naf blong go long Haos Kingdom, oli lesin long ol tok blong miting long haos blong olgeta, tru long telefon no wan kaset we ol brata oli rikodem long Haos Kingdom. !Oli soem bigfala tangkyu long Jeova from ol kakae long saed blong speret we hem i givim long yumi tru long ‘slef we i stret mo waes’! (Matyu 24:45) Ol Kristin we oli mas lukaot long olfala papa mama blong olgeta, oli rili glad sipos wan brata no sista i wantem lukaot long ol olfala blong olgeta, mekem se ol Kristin ya oli save joen long wan miting blong kongregesen.

!Mekem Plan Fastaem!

Ol papa mama we oli luksave nid blong olgeta long saed blong speret, bambae oli helpem pikinini blong olgeta blong gat tangkyu from ol Kristin miting. Oli mas luk se pikinini blong olgeta i finisim homwok blong olgeta long stret taem, bitim we oli livim i stap gogo i kam plante tumas. Long ol naet we i gat miting, i gud ol pikinini oli mekem homwok blong olgeta taem oli kambak long haos jes afta long skul. Spel mo pleplei oli no mas blokem olgeta blong go long ol miting blong kongregesen.

Sipos yu yu wan hasban mo wan papa, ?fasin blong go long ol miting i stap fasples long laef blong yu? Sipos yu wan waef mo wan mama, ?yu yu mekem gud plan long ol wok blong yu, nao yu gat taem blong go long ol miting? Sipos yu wan yangfala, ?wanem i moa impoten long yu? ?Homwok blong yu no ol miting?

Miting blong kongregesen i wan nambawan samting we Jeova i givim. Yumi mas traehad long evri rod blong joen long ol miting. !Jeova bambae i blesem yu bigwan sipos yu putum ol impoten samting long fasples long laef blong yu!