!Lukaot Long Saemoni!
SAEMON i wan man Sameria. Ol man long ples blong hem oli tinghae tumas long hem. Hem i laef long faswan handred yia K.T., mo plante man oli sapraes tumas long fasin blong hem blong mekem kleva. Oli stap tokbaot hem, oli se: “Hem i gat paoa ya we oli talem se ‘Prapa Paoa blong God.’ ”—Ol Wok 8:9-11.
Be afta we Saemon i baptaes blong kam wan Kristin, hem i luk wan paoa we i strong moa, i winim paoa ya we hem i stap yusum fastaem. Hemia paoa ya we Jisas i givim long ol aposol blong hem, blong mekem oli naf blong givim tabu spirit long ol narafala. Samting ya i mekem se Saemon i sapraes tumas. Nao hem i girap, i givim mane long ol aposol mo i askem long olgeta se: “Plis yufala i givim paoa ya long mi tu. Mi mi wantem se taem mi putum han blong mi long hed blong ol man, bambae oli kasem tabu spirit.”—Ol Wok 8:13-19.
Be aposol Pita i tok strong long hem, i se: ‘!Mane ya blong yu bambae i go lus wetem yu! ?Yu ting se yu save pem samting ya we God i stap givim fri nomo i go long ol man? Yu yu no gat bisnes long wok ya blong mifala. Yu no gat raet nating long hem, from we tingting blong yu i no stret long fes blong God.”—Ol Wok 8:20, 21.
Tok ya “saemoni” i kamaot long stori ya blong Baebol. Sam man oli bin givim mining blong tok ya se “sin ya blong pem no salem wan haeples no wan wok insaed long jos.” New Catholic Encyclopedia i talem se stat long ol yia 800 kasem 1000, “fasin ya i kam antap bigwan long ol spesel haos blong ol pris mo sista blong Katolik, long medel blong ol pris we oli no gat haeples, ol bisop, mo ol pop tu.” Buk naen blong The Encyclopædia Britannica (1878) i talem se: “Eni man we i mekem stadi long saed blong histri blong ol miting blong Pop, bambae i luksave se long evriwan we oli kasem wok insaed long jos, i no gat wan long olgeta we i no bin givim mane blong pem wok ya fastaem. Plante eksampel oli soem se long ol tabu miting blong jos, fasin ya i bitim mak, hem i wan fasin we oli no sem nating blong soem long fes blong ol man.”
Ol trufala Kristin tede, oli mas lukaot long fasin blong pem no salem ol haeples mo wok we oli tabu. Eksampel, maet samfala oli presem bitim mak no oli givim sam presen long man we i save givim sam spesel wok long olgeta. Be tu, olgeta we oli save givim ol spesel wok ya, maet oli laekem no mekem i gud moa long olgeta we oli naf blong mekem wan wok. Mo plante taem, oli wantem givim plante presen long olgeta ya. Tufala fasin ya tugeta i joen wetem fasin blong pem no salem ol haeples mo wok we oli tabu, mo i klia nomo se Baebol i agensem fasin ya. Pita i talem long Saemon se: “Yu mas tanem tingting blong yu from rabis plan ya blong yu. Mo yu mas prea long Hae God blong hem i fogivim yu, from samting ya we yu tingbaot blong mekem. Mi mi luk we sin i fasemgud yu, mo tingting blong yu i kam nogud finis, i fulap long jalus.”—Ol Wok 8:22, 23.
I gud tumas we Saemon i luksave se wanem we hem i wantem i rong olgeta. Hem i askem strong long ol aposol se: “Plis yufala i prea long God from mi, blong ol samting ya we yutufala i stap talem, bambae oli no kam kasem mi.” (Ol Wok 8:24) Ol trufala Kristin oli mas tingbaot impoten lesen we i stap long stori ya. Taswe oli traehad blong blokem fasin blong pem no salem ol haeples mo wok we oli tabu.