No Lusum Glad Blong Joen Long Ol Miting
1 Ol miting oli impoten blong mekem se yumi stap strong long saed blong spirit. Glad we yumi kasem long ol miting ya i dipen long fasin blong yumi bifo, afta, mo long taem blong ol miting. ?Wanem i save givhan long yumi mo ol narafala blong no lusum glad ya we i kamaot taem yumi joen long ol miting?
2 Bifo Long Miting: Fasin blong rerem miting fastaem, i joen bigwan wetem glad we bambae yumi kasem long ol miting ya. Taem yumi reregud, i isi moa long yumi blong lesingud mo givim ansa. Mo tu, taem yumi gat wan haf long miting, yumi mas reregud long haf ya. Taem yumi mekem rere, yumi mas traem blong kasem wan mak. Mak ya i blong givim ol stret save mo pulum intres blong ol man we oli lesin. Yumi mas lanem haf ya gogo yumi save gud. Taem yumi mekem ol miting oli laef, mo yumi traehad blong mekem se olgeta haf blong miting oli bildimap yumi evriwan, yumi soemaot se yumi stap gru long saed blong spirit, mo glad blong yumi i save kam bigwan moa.—1 Tim. 4:15, 16.
3 Long Taem Blong Miting: Taem yumi givim ansa long ol miting, samting ya i givhan long yumi blong glad moa long ol miting ya. Yumi mas tingbaot ol haf blong miting we oli singaot yumi blong givim ansa, olsem wan haf blong miting we yumi evriwan long kongregesen i kasem. Ol ansa we oli sot mo we oli go stret long poen, oli gat moa paoa. Samtaem, i gud blong talem sam sotfala ekspiryens we oli save leftemap tingting blong narafala mo mekem olgeta oli strong moa. Yumi mas rere blong talem ol ekspiryens ya, antap moa taem program blong miting i askem yumi blong mekem olsem. (Prov. 15:23; Wok 15:3) Taem yumi mekem wan tok long miting, yumi mas toktok wetem fasin glad, mo yumi mas soem se yumi bilif fulwan long samting we yumi talem. Ol tok blong yumi oli mas pulum intres, oli mas laenap wetem samting we i tru, mo oli mas tokbaot samting we i save givhan long laef blong man.
4 Afta Long Miting: Soem kaengud fasin long narafala, talem halo, mo serem ol impoten poen we yumi harem long ol miting. Fasin ya i save givhan long yumi evriwan. Taem yumi soem se yumi glad blong luk ol yangfala, ol olfala, mo ol niuwan oli givim ansa long ol miting ya, yumi mekem se lav blong yumi long ol brata mo sista i kam strong moa. Taem samfala oli mestem ol miting, i no stret blong toktok smol agensem olgeta. I moagud yumi serem glad we yumi kasem long ol miting ya wetem olgeta, blong leftemap tingting blong olgeta blong kam long ol miting.—Hib. 10:24, 25.
5 Yumi no mas mestem ol miting. Miting i wan impoten haf blong olgeta samting we God i givim, blong yumi leftemap tingting blong yumi. (Rom 1:11, 12) Sipos yumi traehad fulwan blong sapotem ol miting, bambae yumi no lusum fasin glad we yumi gat blong kam long ol Kristin miting ya.