?Bambae Yu Muf i Go Long Narafala Ples?

Taem ansa blong kwestin ya hem i yes, i gat plante samting we yu mo ol narafala i nidim blong mekem fastaem. Taem yu folem ol defren poen we oli stap biaen, kwiktaem nomo bambae yu save joengud long niufala kongregesen blong yu.

(1) Taem yu save weples yu mas muf i go long hem, sekretari blong kongregesen we yu joen yet long hem, bambae i save givim adres blong Haos Kingdom we niufala kongregesen blong yu i stap long hem. Taem yu kasem ples ya, i gud blong stat kwiktaem blong faenem ples we Haos Kingdom i stap long hem, mo faenemaot stret taem blong ol miting blong kongregesen blong yu. Sipos plante kongregesen oli yusum Haos Kingdom ya, askem long ol elda blong talem long yu weswan kongregesen i stap lukaot long teritori we yu bambae yu stap long hem. Yu no mas tektaem tumas blong joen long ol miting mo save ol elda long niufala kongregesen blong yu.

(2) Sekretari blong kongregesen ya we yu stap long hem fastaem mo niufala kongregesen blong yu tu, bambae tufala i wok tugeta blong sanem Kad blong Pablisa blong yu wetem famle blong yu. Sekretari blong olfala kongregesen blong yu bambae i mas sanem wan leta long ol elda blong niufala kongregesen blong yu, blong talemaot se bambae yu joen wetem olgeta. (Lukluk Kingdom Wok blong Yumi blong Febuwari 1991, long haf ya Ansa long Wan Kwestin.) Sevis Komiti blong Kongregesen bambae i mas talemaot long brata we i lukaot long wan long ol buk stadi blong kongregesen ya, se bambae yu joen wetem olgeta. Long rod ya, brata ya bambae i save toktok wetem yu mo halpem yu blong faenem stret ples blong niufala buk stadi we bambae yu joen long hem.​—Rom 15:7.

(3) Olgeta pablisa long niufala kongregesen blong yu oli gat wan haf we oli mas glad blong mekem​—hemia blong save yu mo mekem yu yu welkam long ples ya. (Skelem wetem 3 Jon 8.) Be, samting ya i minim se yu mas kam long ol miting, blong haremgud long storeyan wetem ol brata sista we i leftemap tingting mo mekem yumi strong moa.

(4) Yu no mas wet blong joen long wok blong prij wetem niufala kongregesen blong yu, nating sipos yu no stretem evri samting blong yu yet. Taem yu putum Kingdom fastaem, bambae God i lukaot long ol narafala samting, mo bambae yu haremgud long niufala ples we yu stap long hem. (Mat. 6:​33) Taem yu stap long niufala ples blong yu, maet bambae yu wantem singaot sam brata sista blong kongregesen blong yu, blong kam long haos blong yu blong yufala i save yufala moa.​—Rom 12:13b.

I no wan isi samting taem yu mas muf i go long wan narafala ples. Be, sipos evriwan i folem ol advaes ya, bambae i no gat trabol long saed blong spirit i save kamaot. Yumi evriwan i save haremgud blong luk nambawan lav we i stap long medel blong ol Kristin brata sista blong yumi.